Kinikkingngua 20

1Kabalin ya gulu, nepakkul y Pablo ya disipulo ira, en pinagapagutuk/pinatapaturid/pinatapataggad na ira. Sangaw, nappakammu iggina kan ira, en minang kan ya probinsia ya Macedonia. 2Sinibisibal/Zinahadahat na ya lugar ira kannay, en pinagapagutuk na ya disipulo ira kannay. Sangaw, nakakaddet iggina kan ya probinsia ya Grecia, 3en naddian iggina kannay kan tallu nga vulan. Napanonot na ya mattakay kan dakadakal nga barangay nga umang kan ya nasion ya Siria, ngam nammuan na nga igatagatak/igatagatab ya Judio ira iggina. Zinisidi na gafen nga dalanan na ya Macedonia. 4Nevulun kan iggina y Sopatro nga taga Berea nga anak y Pirro, y Aristarco en y Segundo nga taga Tesalonica, y Gayo nga taga Derbe, y Timoteo, y Tikico en y Trofimo nga taga probinsia ya Asia. 5Nonna ra nga napanaw kan Filipos, en sinaronan da kami kan ya siudad ya Troas. 6Kabalin ya algaw ira ya Fiesta ya Pan nga Awan na nga Lebadura, nattakay kami pay kan dakadakal nga barangay nga napanaw kan Filipos. Kabalin ya lima nga algaw, naganat mi ira kan Troas, en naddian kami kannay kan pitu algaw. 7Kan ya unna nga algaw ya tangaligguan, nakiparammung kami kan ya wawwahi tera kan pangurug, tase maggaddagaddua kami kan pan. Nappalappat y Pablo kan ikami, en nesige na ya aggergo na addet kan tangnga gabi, gafu ta zinisidi na ya mapanaw kan kamatarukan na. 8Aru ya allamparan kan ya kuarto kan utun nga narammungan mi. 9Hinnian/Asan balabbagitolay nga mangngahan kan Eutico nga aggatuttud kan ya benta. Gafu ta nabayabayag ya nepappalappat y Pablo, nallollomad iggina. Kattu firmi nakakaturug, natanag/nakabok iggina nga naggafu kan ya mekatallu nga piso, en kattu minang da binangun iggina, nasingan da nga natay ngin. 10Minuttad y Pablo, linakabban na nga ginakkap iggina, en kunna nga nakkahi, "Mari nu mavurung gafu ta natolay igginan." 11Uli naddulot kami, naggaddagaddua kami kan pan, en nangan kami. Sangaw, nakiergo y Pablo kan ikami addet kan mataruk. Kabalin na yan, napanaw kami. 12Nelot/Nafulotan ya payayat da nga nangilabbet kan ya balabbagitolay kan ya balay na pe laman nga siggamatolay. 13Sangaw, nonna kami nga nattakay kan dakadakal nga barangay, en minang kami kan ya siudad ya Asson, en pinanonot mi nga patakayan mi y Pablo kannay. Iggina ya naka-uray kan yan gafu ta ikayat na ya manalan nga umang kannay. 14Sangaw, zinafung na kami kan Asson, pinattakay mi iggina, en navvurulun kami nga minang kan ya siudad ya Mitilene. 15Nattakay kami manin kan dakadakal nga barangay nga napanaw kannay, en kan ya netunud nga algaw, nakakaddet kami kan ya lugar nga aranni kan ya fugu ya Chio. Kan ya netunud manin nga algaw, nakakaddet kami kan ya siudad ya Samos, en kan ya netunud peba nga algaw, nakakaddet kamin kan ya siudad ya Mileto. 16Dana zinisidi na nga mattalebad kami kan ya siudad ya Efeso, tase mari mi manayun nga maddian kan ya probinsia ya Asia, gafu ta maka-ararat/maka-ararak iggina nga makakaddet kan Jerusalem, tase nu awayya na, hinnian kami kannay kan ya kalgawan Pentecostes. 17Kannia kasan mi kan Mileto, nabbon y Pablo kan totolay kan Efeso nga umang mangakkul kan ya lalakay ira nga panakallan kan ya iglesia kannay nga umang da kan iggina. 18Kattu nakalabbet da kan iggina, kunna nga nakkahi kan ira, "Ammu nu ya nepattolek kannia neke-evulun ku kan ikayu kan ya interu nepakipaddian ku kan ikayu namegafu kattu unna nga algaw nga nepallabbet ku kan yaw nga probinsia ya Asia. 19Ammu nu pay nga sinesserbian ku y Afu Jesus kan nelot nga appakalinak, en naming aru nga nanurut ya luak, en aru ya nekapazapaziyat ku nga nesissimmu megafu kan ya nepangngigatagatab ya Judio ira kan yakan. 20Ammu nu pay nga marik nabbabang nga nakkahi kan hanna laman nga pammakapianan nu, en nanuttuldu kan ikayu kan ya paratubangan ya totolay en kan ya gibbalayan nu. 21Nepalapalappat ku kan ya Judio ira en kan ya mari Judio ira pay nga mabbabawi ra kan ya liwaliwat da kan y Afu Dios, en mangurug da kan y Afu tera nga Jesu Cristo. 22En sangaw, mafersa nak nga umang kan Jerusalem, en marik ammu nu hanna ya mesimmu kan yakan kannay, 23fera laman yaw, kan kada siudad, ipakapakammu ya Espiritu Santo kan yakan nga mabalud nak en mapazapaziyat nak kannay. 24Ngam marik ikuenta nga hinnian balor ya angat ku basta laman makakaddet nak kan ya pantay, en mabalin ku ya asserbik nga inalawat ku kan y Afu Jesus nga ipalapalappat ku ya napia nga dumug nga me-annung kan ya allak y Afu Dios. 25"Sangaw, ammuk nga ikayu ngammin nga inanga-angayan ku nga nangipalappatan kan ya appatul y Afu Dios, mari rak kun masingan. 26Gaggafen, kayan ku kan ikayu kan sangaw nga algaw, nga narenu nak nga awan nga tabbahan ku kan ya daha ngammin ya totolay. 27On, gafu ta marik nabbabang nga nangikahi kan ya interu nga bilin y Afu Dios kan ikayu. 28Gaggafen, innan nu ya attolotolay nu en ya attolotolay ya disipulo ira nga megitta kan karneru, gafu ta sinunnak na kayu ya Espiritu Santo nga ikayu ya makammu nga mananggaw kan ya iglesia y Afu Jesus nga ginatang na kan ya daha na pe laman. 29"Ammuk nga kabalin ya appanok, hinnian totolay nga megitta kan naporoporay nga tanam/tanang nga atu nga umang kan ikayu, en mari ra ikallak ya disipulo ira. 30En hinnian pay dudduma/karruan mismu kan ikayu nattaruk nga mangituttuldu kan falso tase me-awawan ya disipulo ira nga me-evulun kan ira. 31Gaggafen, malerto kayu! Dandamman nu nga, kan lahuman ya tallu rahun, gabi en algaw, marik nemmang nga nanabatabarang kan ya kada isa kan ikayu nga nanuruturut ya luak. 32"Sangaw, ikatalak ta kayu kan y Afu Dios en kan ya ergo na nga me-annung kan ya allak na nga makapasikan kan ya angngurug nu en makakeddan kan ya erensian nu nga netabba na kan ikayu en kan ngammin nga pinabbalin na kan nasantuan. 33Awan nga sinamsam ku nga pirak, vulawan onu sinnun nga kukua ya innia laman. 34Ammu nu mismu nga nattrabahu nak pe laman nga nanaful kan ya mawag ku en ya kakavulun ku. 35Kan ngammin nga ganagannud, nepasingan ku kan ikayu nga kannia attrabahu nu kan kagittak, mawag kan uffunan tera ya mazziyariyat ira. En mawag pay kan dandamman tera ya ergo y Afu Jesus nga iggina mismu ya nakkahi nga kunna, 'Mas mabendisionan ya mangiddan annek/ngam kan ya mangalawat.' " 36Kabalin na nga nakkahi kan ira yan, iggina en ira ngammin, nappalentud da nga naddasal. 37Nattangatangit da ngammin, en ginakkap en inamma-amman da iggina. 38Nelot ya dandam da, nepatalluaring gafu ta nakahi na nga mari ra uli masingan ngin iggina. Sangaw, netulud da iggina kan ya dakadakal nga barangay.

will be added

X\