Kinikkingngua 18

1Kabalin na yan, napanaw y Pablo kan Atenas, en minang iggina kan ya siudad ya Corinto. 2Hinnian/Asan isa nga Judio nga mangngahan kan Akila nga ne-anak kan ya siudad ya Ponto nga nasimmuan na kannay. Bahu luminabbet iggina en y Priscila nga atawa na nga naggafu kan ya nasion ya Italia. Napanaw ra kan Italia gafu ta nemandu y Emperador Claudio nga mapanaw ngammin ya Judio ira kan ya siudad ya Roma. Minang y Pablo 3nga nakipaddian kan ira en nakipattrabahu kan ira gafu ta naggitta ra kan trabahu nga minappanday kan tolda. 4Minang iggina kan ya sinagoga kan kada algaw nga angngilinan da, en nakiergo iggina kan ira, tase mabensi na ya ginnonotan ya Judio ira en ya Griego ira. 5Kattu nakakaddet y Silas en y Timoteo kan Corinto nga naggafu kan Macedonia, ya sinungutungul y Pablo, ya angngipalapalappat na kan ya ergo y Afu Dios en ya attettestigu na kan ya Judio ira nga y Jesus, iggina ya Cristo. 6Ngam sinutturiya ra en nakkayakayanan da iggina. Megafu kan yan, sinattak na ya sinnun na, en kunna nga nakkahi, "Ikayu pe laman ya tumabbag kan ya kiningngua nu. Bakkan kan yakan ya mapaliwat. Mamegafu kan sangaw, ya mari Judio ira ya angayan ku." 7Sangaw, napanaw iggina kannay en minang kan ya balay ya isa nga mari Judio nga mangngahan kan Ticio Justo nga minaddayarayaw kan y Afu Dios. Hinnian ya balay na kan ya bikat ya sinagoga. 8Ngam y Crispo nga panakallan kan ya sinagoga en ngammin ya kabbalay na ira, nangurug da kan y Afu Jesus. Kan ya maddian ira kan Corinto, napakaru peba ya nangurug en nabawtisowan kattu nagina ra ya ergo y Afu. 9Kan isa nga gabi, nappasingan y Afu Jesus kan y Pablo, en kunna nga nakkahi, "Marim mattalaw, nu azzi massige ka nga mangipalappat, en marim memmang, 10gafu ta hinnian nak kan ikaw, en awan nga manukkal kan ikaw. On, gafu ta napakaru ya totolay kan yaw nga siudad nga mabbalin kan totolek." 11Naddian y Pablo gafen kan Corinto kan tangarahun se gaddua nga netuttuldu na ya ergo y Afu Dios kan ira. 12Ngam kannia kagubernador y Galio kan ya probinsia ya Acaya, nattaradday ya Judio ira nga minang nanggafut kan y Pablo. Ne-angay ra iggina kan husgadu, 13en kunda nga nakkahi, "Yaw nga tolay, bensian na ya totolay nga dayarayawan da y Afu Dios kan paddayarayaw nga kontra kan ya dorob na." 14Mappanget y Pablo nga makiergo kan ira, ngam ginunnan y Galio iggina nga kunna nga nakkahi, "O, ikayu nga Judio, nu hinnian narakat/napot onu kuru nadammat nga nakua, hinnian zinan rason ku nga maggina kan ikayu. 15Ngam gafu ta ya paddiriskusionan nu, me-annung kan ergo ira, ngahan ira en ya dorob nu pe laman, ikayu pe laman ya maddisidi. Ammarik nga panunutan ya kunna tian." 16Sangaw, pinapanaw na ira kan ya husgadu. 17Sangaw, ginafut ya Judio ira y Sostenes nga panakallan kan ya sinagoga, en sinissintut/kinakkaddug da iggina kan ya atubang ya husgadu, ngam pinorrian y Galio ira yan nga kinikkingngua ra. 18Nabbayag peba y Pablo nga nakipaddian kan ya wawwahi ira kan pangurug kan Corinto. Kattu pinanawan na ira, nattakay iggina kan dakadakal nga barangay nga umang kan Siria, en nevulun y Priscila en y Akila kan iggina. Kannia kasan na peba kan ya siudad ya Cencrea, kallie ya nepattakay na kan ya barangay, naki-usip/naki-usit iggina gafu ta hinnian nehuramento na kan y Afu Dios. 19Kattu nakakaddet da kan ya siudad ya Efeso, nattalan/nabbattang da Akila kannay, en minang y Pablo kan ya sinagoga en nakiergo kan ya Judio ira. 20Nekiddaw ra kan iggina nga makipaddian iggina kan ira kan mabayag, ngam ne-ammari na. 21Kannia appanaw na kan ira, kunna nga nakkahi, "Nu uray y Afu Dios, mattoli nak kan ikayu balalaman." Sangaw, nattakay iggina kan dakadakal nga barangay nga napanaw kan Efeso. 22Kattu nakakaddet iggina kan ya siudad ya Cesarea, nakkazzat iggina, en minang na binisita ya iglesia kan Jerusalem. Sangaw, minang iggina kan Antiokia kan ya nasion ya Siria. 23Mediu nannayun iggina nga naddian kannay. Sangaw, napanaw iggina nga sinibisibal/zinahadahat na ya lugar ira kan ya probinsia ya Galacia en ya probinsia ya Frigia, tase pasikannan na ya angngurug ngammin ya disipulo ira. 24Kan yan pay nga tiempo, hinnian Judio nga mangngahan kan Apolos nga ne-anak kan ya siudad ya Alejandria nga minang kan ya siudad ya Efeso. Malalaki iggina nga mergo, en ama-ammu na ya Sagrado nga Turak. 25Natulduan iggina kan ya tuldu y Afu Jesus. Napafutu ya nepappalappat na, en fustu ya kinahi na en ya netuldu na nga me-annung kan y Jesus. Ngam ya ammu na laman nga pamawtiso, ya netuldu y Juan nga Minabbawtiso. 26Sangaw, namegafu iggina nga mangipalappat kan ya ammu na nga siggagutuk/siggaturid/siggataggad kan ya unag ya sinagoga. Kattu nagina y Priscila en y Akila iggina, nelabbet da iggina, en nepakanawag da kan napia kan iggina ya tuldu y Afu Dios. 27Kattu zinisidi na ya maddakit nga umang kan ya probinsia ya Acaya, pinasikan ya wawwahi kan pangurug ya nonot na, en natturak da kan ya disipulo ira kannay kan alaban da iggina. Kattu nakakaddet iggina kannay, dakal ya ne-uffun na kan ya nabbalin ira kan mangurug megafu kan ya allak y Afu Dios. 28On, gafu ta inaffut na ya Judio ira kan ya paratubangan ya totolay megafu kan ya nasikan nga pamakurug na nga y Jesus, iggina ya Cristo, kannia nepangngiyusa na kan ya Sagrado nga Turak.

will be added

X\