Kinikkingngua 17

1Sangaw, sinalebaran da ya siudad ya Amfipolis en ya siudad ya Apolonia, en nakakaddet da kan ya siudad ya Tesalonica nga dian ya isa nga sinagoga ya Judio ira. 2Segun kan ya kustumbre ra Pablo, minang da kannay, en kan tallu nga matturunud nga algaw nga angngilinan da, nakiergo iggina kan ya totolay kannay kan me-annung kan ya hinnian/asan kan ya Sagrado nga Turak. 3Nepakanawag na en pinakurug na kan ira nga neturak kannay nga mawag kan mapazapaziyat, matay en magginnolay ya Cristo. Kunna nga nakkahi peba, "Yaw nga Jesus nga ipalappat ku kan ikayu, iggina ya Cristo." 4Hinnian dudduma/karruan kan ira nga nangurug, en netadday ra kan y Pablo en y Silas, en kunna tian pay ya kiningngua ya aru nga Griego nga minaddayarayaw kan y Afu Dios en babbay nga me-ekakua. 5Ngam gafu ta hinnian mari Judio ira nga nangurug, namassil ya Judio ira. Nangammung da gafen kan dudduma nga lallaki nga lokolokowan nga nasimmuan da kan ya dalan tase pagapagulluan da ya siudad. Kannia annaful da kan y Pablo en y Silas tase iyatubang da ira kan ya totolay, minang da sinallung ya balay ya tolay nga mangngahan kan Jason. 6Ngam kattu mari ra natafulan ira, zinedelag da y Jason en ya dudduma nga wawwahi kan pangurug nga ne-angay ra kan ya atubang ya mammoray ira kan ya siudad. Kunda nga nangikullet, "Ya totolay nga namagapagulu kan aru nga lugar kan ya interu mundo, minang da pay ngin kanniaw, 7en inalaba y Jason ira kan ya balay ra. Ira ngammin, tutturiyan da ya dorob y Emperador nga kayan da nga hinnian tanakkuan nga patul nga mangngahan kan Jesus." 8Napagulu ya totolay en ya mammoray ira kan ya siudad kannia nepakagina ra kan yan. 9Sangaw, pinaffiansa ra y Jason en ya kakavulun na, en pinapanaw ra iran. 10Kattu naggabi ngin, ya wawwahi ira kan pangurug, insigida binon da y Pablo en y Silas kan ya siudad ya Berea. Kattu nakakaddet da kannay, minang da kan ya sinagoga ya Judio ira. 11Mas napia ya appanapanonot ya Judio ira kannay annek/ngam kan ya Judio ira nga maddian kan Tesalonica, gafu ta navukatan ya ginnonotan da nga maggiggina kan ya netuttuldu ra Pablo nga giligilammuan da kan kagalgaw ya Sagrado nga Turak tase mammuan da nu kurug ira yan nga kinahakahi ra. 12Gaggafen, aru kan ira ya nangurug, en hinnian pay dudduma nga Griego nga me-ekakua nga babbay en lallaki nga nangurug. 13Ngam kattu nammuan ya Judio ira kan Tesalonica nga nepalapalappat da Pablo ya ergo y Afu Dios kan Berea pay, minang da pay kannay tase bensian da ya totolay nga maddian kannay nga maggulu. 14Sangaw, ya wawwahi kan pangurug, nerame ra pinapanaw y Pablo nga minang kan ya dappit ya bebay, ngam nattalan/nabbattang y Silas en y Timoteo kan Berea. 15Ya nevulun ira kan y Pablo, netulud da iggina addet kan ya siudad ya Atenas, en nattoli ra balalaman kan Berea kabalin ya nepangngibilin na kan ira kan mallian y Silas en y Timoteo nga gumanat kan iggina. 16Kannia attalattaron y Pablo kan ira Silas kan Atenas, nasingan na nga hinnian napakaru nga rebultu kan ya siudad, en nelot/nafulotan ya neka-istorbo ya nonot na. 17Sangaw, nakiergo iggina kan ya Judio ira en ya mari Judio ira nga minaddayarayaw kan y Afu Dios kan ya sinagoga, en kan ya totolay pay nga nasimmuan na kan plasa kan kagalgaw. 18Hinnian dudduma nga minattuldu nga nammuan kan Epicureo en kan Estoico nga nakiddibate kan iggina. Kunda ya dudduma nga namovut, "Hanna ya ikayat nga kayan yan nga wangit nga tolay?" Kunda ya dudduma nga nakkahi, "Alale mangipalappat iggina kan dayu nga dios ira." Kinahi ra yan gafu ta nepalappat na ya napia nga dumug nga me-annung kan y Jesus en ya agginnolay ya nakkakatay ira. 19Gafu ta nepalappat na yan, inalak da en ne-angay ra iggina kan ya konseho ra nga narammung kan ya isa nga bakulud nga nangahanan kan Areopago nga hinnian kan ya siudad. Kunda nga namovut, "Awayyam kazze/pano nga kayan kan ikami nu hanna yan nga bahu nga ituttuldum? 20On, gafu ta mekapakkapalat ya kayakayan mu nga magina mi. Gaggafen, ikayat mi nga kammuan ya kebalinan ira yan." 21Ngammin ya maddian ira kan Atenas en ya dayu ira nga maddian kannay, yan laman ya ikayat da nga pangufutan kan ya orat da, ya appakoli ra onu ya aggina ra kan hanna laman nga bahu. 22Sangaw, minang nanadag y Pablo kan ya atubang ya konseho en ya dudduma nga totolay kan ya Areopago, en kunna nga nakkahi, "Ikayu nga maddian kan Atenas, ammuk nga relihioso kayu. 23On, gafu ta, kannia annaladalan ku kan ya siudad nu, nasingan ku ya addayarayawan nu, en nasimmuan ku pay ya isa nga addayarayawan nu nga neturakan ya kunna tiaw, 'Kan ya dios nga mari tera ammu.' Ya Dios gafen nga dayarayawan nu maski mari nu inamammu, iggina ya ipalappat ku kan ikayu. 24Y Afu Dios nga namaratu kan ya mundo en kan ngammin nga ganagannud nga hinnian kan ya mundo, iggina ya Afu ngammin ya hinnian ira kan langit en kan ya utun lusak, en mari na maddian kan templo nga pinatadag totolay. 25En awan vulvua/pulus awahan na nga iddan ya totolay kannia assesserbi ra kan iggina, gafu ta iggina mismu ya mangiddan kan angat, aggangangat en ngammin nga ganagannud kan ngammin nga matolay. 26Kattu gafagafu, namaratu iggina kan isa nga tolay nga naggafanan ngammin ya totolay kan ngammin nga nasion, en pinaddian na ira kan maddumuruma nga lugar kan ya utun lusak. Dana zinisidi nan ya kanaddu ya attolay ra en nu be tiaw ya paddianan da. 27Kinikkingngua na ira yan tase tafulan da iggina aber laman nu matafulan da iggina, maski mari na kuru arayyu kan kada isa kan ittera. 28Yan ya nakahi kattun nga kunna tiaw, 'Megafu kan iggina, matolay tera, magguyu tera en hinnian tera.' Kunna tiaw ya neturak ya dudduma kan ikayu mismu nga minabberso, 'Kurug nga gakagaka na ittera.' 29Gafu ta anak y Afu Dios ittera, mari tera zinan abbattan nga megitta y Afu Dios kan hanna laman nga vulawan, onu pirak onu batu, rebultu nga pinanday tolay megafu kan ya kalalaki en appanonot na. 30Pinorrian y Afu Dios kattun ya kinikkingngua ya totolay gafu ta mari ra ammu iggina, ngam sangaw, manduan na ngammin ya totolay kan ngammin nga lugar nga mabbabawi ra kan ya liwaliwat da. 31On, gafu ta hinnian isa nga algaw nga sinunnak na kattun nga angngipapanunut na kan ya totolay ira kan ya interu mundo, en natunung ya kapanunut da. Sinunnak nan ya tolay nga mamanunut, en kannia nepammaginnolay na kan iggina, pinakurug na kan ngammin nga totolay nga firmi kuan na yan." 32Kattu nagina ra ya kinahi y Pablo nga me-annung kan ya agginnolay ya nakkakatay ira, hinnian dudduma nga nanguyaw kan iggina, en hinnian dudduma nga kunda nga nakkahi, "Ikayat mi nga ginan manin ya me-annung kan yan nga kinahim." 33Sangaw, pinanawan y Pablo ira, 34ngam hinnian dudduma nga totolay nga netadday kan iggina, en nangurug da. Hinnian tolay kan ira nga mangngahan kan Dionisio nga miembro kan ya konseho ra kan ya Areopago, en isa nga babay nga mangngahan kan Damaris, en dudduma peba nga totolay.

will be added

X\