Kinikkingngua 16

1Nakakaddet y Pablo en y Silas kan ya siudad ya Derbe en ya siudad ya Listra. Hinnian/Asan disipulo kannay nga mangngahan kan Timoteo nga anak ya isa nga babay nga Judio nga mangurug kan y Jesus, ngam Griego ya ama na. 2Napia ya ke-ergowan y Timoteo kan ngammin ya wawwahi kan pangurug kan Listra en kan Iconio. 3Nekayat y Pablo nga ivulun y Timoteo kan ira, ngam nepakugit na iggina bitan gafu ta ammu ngammin ya Judio ira kan ira nay nga lugar nga Griego ya ama na. 4Kannia ira Pablo nga nassibisibal/naddahadahat kan ya siudad ira, nepakammu ra kan ya mangurug ira ya mandu ira nga nakkara-anahutan ya apostol ira en ya panakallan nga lalakay ira kan Jerusalem, en kinahi ra kan ira nga mawag kan paraparulotan da ira yan. 5Gaggafen, napasikan ya angngurug ya totolay kan ya iglesia ira, en minara-aru ya bilang da kan kagalgaw. 6Nanalan da Pablo kan ya sakupan ya probinsia ya Frigia en ya probinsia ya Galacia, gafu ta negamma ya Espiritu Santo kan ipalappat da ya ergo y Afu Dios kan ya probinsia ya Asia. 7Kattu nakaranni ra kan ya probinsia ya Misia, kinakkapan da ya umang kan ya probinsia ya Bitinia, ngam mari nepamavulun kan ira ya Espiritu y Jesus. 8Sinalebaran da gafen ya Misia, en naddahut da nga minang kan ya siudad ya Troas. 9Kan isa nga gabi, hinnian nappasingan nga tolay nga taga probinsia ya Macedonia nga aggatadag kan ya atubang y Pablo nga kunna nga nakimallak, "Angka kan Macedonia, en uffunan mu ikami." 10Kattu nasingan na yan nga nappasingan kan iggina, nerame mi naggannukat tase angkami kan Macedonia, gafu ta napanonot mi nga inakkulan y Afu Dios ikami nga umang mangipalapalappat kan ya napia nga dumug kan ya totolay kannay. 11Sangaw, nattakay kami kan dakadakal nga barangay nga napanaw kan Troas, en nakkawat kami kan ya fugu ya Samotracia, en kan kamatarukan na, naffundu kami kan ya siudad ya Neapolis. 12Sangaw, napanaw kami kannay nga nanalan nga minang kan ya siudad ya Filipos kan ya unna nga distrito ya probinsia ya Macedonia. Napakaru ya taga Roma nga maddian kannay. Naddian kami kan nay nga siudad kan pia nga algaw. 13Kan ya algaw nga angngilinan ya Judio ira, nallawan kami kan ya trangka ya siudad, en minang kami kan ya dappit ya kayan/wangag gafu ta inabbat mi nga hinnian lugar kannay nga addasallan. Nanuttud kami, en nakiergo kami kan ya babbay nga narammung kannay. 14Isa kan ya naggina kan ikami, babay nga mangngahan kan Lydia nga taga siudad ya Tiatira. Minallaku iggina kan sinnun nga kulor ubi nga nangina. Minaddayarayaw iggina kan y Afu Dios. Neddan y Afu Dios kan iggina ya pakantindi tase mantindian na ya kinahi y Pablo. 15Kabalin na nga nabawtisowan en ya kabbalay na ira, inimbita na kami nga kunna nga nakkahi, "Nu abbattan nu kan napafutu ya angngurug ku kan y Afu Jesus, angkayu nga makipaddian kan balay." Sangaw, nabensi kami. 16Kan isa nga algaw, kannia ikami nga umang kan ya lugar nga addasallan, hinnian maginganay nga babbonan nga nadafung mi nga inafunan narakat/napot nga espiritu. Iniddannan na iggina kan pakapangngua nga mallavvalavvun. Aru nga kuartu ya nalak ya paki-afuan na ira kannia allavvalavvun na. 17Sinunutunud na ikami en y Pablo, en kunna nga nangikukkullet, "Ira yaw nga totolay, minasserbi ra kan y Afu Dios nga Katanangan, en ipalapalappat da kan ikayu nu annianna/kunnasi/manna ya kapalliad nu." 18Kunna tian ya kinikkingngua na kan aru nga algaw. Sangaw, nofut ya pasensia y Pablo, nabbira en inatubang na ya maginganay, en kunna nga nakkahi kan ya narakat nga espiritu, "Kan ya ngahan y Jesu Cristo, manduan ta ka nga mapanaw kan yan nga babay!" Insigida pinanawan ya narakat nga espiritu iggina. 19Ngam kattu nantindian ya paki-afuan ira ya babay kan awan ngin nga kuartu nga innanaman da nga malak kan iggina, ginafut da y Pablo en y Silas, en zinedelag da ira nga dua nga ne-angay kan ya mammoray ira kan ya siudad kan ya lugar nga ammanunutan. 20Ne-atubang da ira kan ya mammoray ira, en kunda nga nakkahi, "Judio ira yaw nga lallaki, en pagapagulluan da ya siudad tera. 21Mangituttuldu ra kan kustumbre nga mari mepangngat kan alawatan onu vulunan tera nga Romano." 22Nattangesa ya totolay nga mangontra kan ira Pablo. Nepazza ya mammoray ira ya gissinnunan da Pablo, en nemandu ra kan mapalapaluk da. 23Kabalin ya nekapalapaluk da Pablo, nepekarsel da ira, en nemandu ra kan ya guardia nga guardian na ira kan napia. 24Kattu inalawat na yan nga mandu, ne-angay na ira Pablo kan ya bartolina ya akkarselan, en neguhu na ya gittakan da kan ya nattangngan ya dua nga kayu nga nadammat nga nalattukan nga naddappil. 25Kan mattangnga gabi, maddaggun nga maddasal en makkansion y Pablo en y Silas kan paddayarayaw kan y Afu Dios. Maggiggina ya kagitta ra nga presu ira kan ira. 26Gavvat nga nallunig kan nasikan, en naguyag ya interu akkarselan. Insigida navvukat ngammin ya puerta ira, en nalaffut ngammin ya kawad ira ya presu ira. 27Nalukag ya guardia, en nasingan na nga navukatan ya puerta ira kan ya akkarselan. Sangaw, gafu ta inabbat na nga nattammang ngin ya presu ira, sinakkut/kinasut na ya ispada na tase patayan na iggina pe laman. 28Ngam kunna y Pablo nga nangikullet, "Marim kuan yan, gafu ta hinnian kami peba ngammin kanniaw." 29Nappalak ya guardia kan afi en nalistu nga siminallung kan ya akkarselan. Nappalentud iggina kan ya atubang y Pablo en y Silas nga mamippilpig megafu kan ya talaw na. 30Nelawan na ira, en kunna nga namovut, "Wawwahik ira, hanna ya mawag kan kuan ku tase mapalliad nak?" 31Sangaw, kunda nga siminabbag, "Mangurug ka kan y Afu Jesus en mapalliad ka, en kunna tian pay kan ya kabbalem ira." 32Nepalappat da ya ergo y Afu Jesus kan iggina en kan ngammin nga kabbalay na. 33Inalak na ira kan yan nga orat, en pinakarennuan na ya biad da ira. Sangaw, nabawtisowan da ngammin nga makkarabbalay nga awan nga talantan. 34Pinadulot na ira kan ya balay ra, en pinakan na ira. Nelot/Nafulotan ya payayat da ngammin nga makkarabbalay gafu ta nangurug dan kan y Afu Jesus. 35Kan kamatarukan na, ya mammoray ira, binon da ya pulis ira nga kunda nga makkahi kan ya guardia, "Sueltan mu tu dua nga tolay." 36Sangaw, kunna nga nakkahi ya guardia kan ira Pablo, "Nepakahi ya mammoray ira kan masueltan kayun. Awayya nu gafen nga mapanaw ngin nga sigga-imamak ya ginnonotan nu." 37Ngam kunna y Pablo nga nakkahi kan ya pulis ira, "Romano kami pay kan kagitta ra, ngam maski awan nga natafulan da nga liwat mi, nepapalapaluk da kami kan ya paratubangan ya totolay, en nepekarsel da kami peba. En sangaw, ikayat da kami kazze/pano nga papanawan kan sekreto? Mari na awayya! Ngam mawag kan ira mismu ya umang mangilawan kan ikami." 38Sangaw, minang nepadumug ya pulis ira ya nepakahi y Pablo kan ya mammoray ira. Kattu nammuan da nga Romano ra Pablo, nakatalaw ra. 39Minang da gafen nga nakipakoma kan ira. Pinallawan da ira, en nekiddaw ra kan ira nga mapanaw ran kan ya siudad. 40Kattu nallawan da Pablo kan ya akkarselan, minang da be laman kan ya balay ra Lydia, en kannay, nasingan da ya wawwahi ira kan pangurug. Pinagutuk/Pinaturid/Pinataggad da ira, en sangaw, napanaw ran kan ya siudad.

will be added

X\