Kinikkingngua 15

1Hinnian/Asan dudduma/karruan nga lallaki nga naggafu kan ya probinsia ya Judea nga minang kan ya siudad ya Antiokia. Kunda nga nattuldu kan ya wawwahi kan pangurug kan y Jesus nga mari nakugit, "Nu mari nu mappakugit segun kan ya nepeturak y Afu Dios kan y Moises, mari nu mapalliad." 2Megafu kan yan, napatu ya nepakiddiskusion en nepakiddibate y Pablo en y Bernabe kan ira kan me-annung kan yan. Zinisidi ya mangurug ira nga umang y Pablo en y Bernabe en ya dudduma nga maddian kan Antiokia kan ya apostol ira en ya lalakay ira nga panakallan kan ya iglesia kan Jerusalem kan me-annung kan yan nga gannud. 3Gaggafen, ya tolay ira kan ya iglesia, pinagannukat da ira. Zinalan da Pablo en sinibisibal/zinahadahat ya probinsia ya Fenicia en ya probinsia ya Samaria, en pinakoli ra nga hinnian mari Judio ira nga nangurug kan y Afu Jesus. Kattu nagina ngammin ya wawwahi yan nga nepadumug da, nelot/nafulotan ya payayat da. 4Kattu nakalabbet da kan Jerusalem, ya totolay kan ya iglesia, ya apostol ira en ya panakallan nga lalakay ira, inalaba ra ira kan napia. Pinakoli ra Pablo ngammin ya kinikkingngua y Afu Dios nga nangiyusa kan ira. 5Ngam hinnian dudduma kan ya grupo ya Fariseo ira nga mangurug kan y Jesus nga nanadag, en kunda nga nakkahi, "Mawag kan makugit ya mari Judio ira nga mangurug kan y Jesus, en mawag kan mamanduan da nga mamaraparulot kan ya dorob y Moises." 6Narammung sangaw ya apostol ira en ya panakallan nga lalakay ira tase perergowan da yan nga gannud. 7Kattu nannayun da nga naddiriskusion, nanadag y Pedro, en kunna nga nakkahi, "Wawwahik ira, ammu nu nga yakan, nga isa kan ikayu, ya pinili kattun y Afu Dios nga mangipalappat kan ya napia nga dumug kan ya mari Judio ira tase ginan da en kurruan da. 8En y Afu Dios nga makakammu kan ya ginnonotan ya totolay, nepasingan na kan alawatan na ira kannia nepangngiddan na kan ya Espiritu Santo kan ira kan kagitta pay ya nepangngiddan na kan dudduma kan ittera. 9Nepasingan na peba nga mari na mappadumuruma kan ittera en kan ira, nu azzi pinakarennuan na ya giffutuan da megafu kan ya angngurug da. 10Sangaw gafen, ka-am ta purban nu y Afu Dios? Ka-am ta ifersa nu nga vuluvulunan ira nay nga disipulo ya dorob nga mari tera navulun onu ya ginafu tera ira nga alale pakattuan tera ira kan karga nga mari makakkattu? Mari na awayya! 11Ngam mangurug tera nga mapalliad tera megafu kan ya allak y Afu Jesus, en kunna tian pay ya kapalliad ya mari Judio ira." 12Ngammin ya narammung ira, nemamak da kannia nepaggina ra kan ya nepangngipakoli y Pablo en y Bernabe kan ira kan ya milagro en mekapakkapalat ira nga nepakapakua y Afu Dios kan ira nga dua kan ya tolay ira nga mari Judio. 13Kabalin da nga nergo, kunna nga nakkahi y Santiago, "Wawwahik ira, ginan dak. 14Kattu abit, kinahi y Simon Pedro ya unna nga nepangngipasingan y Afu Dios kan ya allak na kan ya mari Judio ira kannia nepabbon na kan iggina kan ira tase pabbalinan na ya dudduma kan ira kan kua na. 15Kan yan nga kiningngua y Afu Dios, natumpal ya nepeturak na kan ya profeta ira kattun. Yaw ya neturak da, 16'Kunna y Afu, "Mattoli nak nattaruk, en uli patadaggan ku ya balay y David nga nerabbiong. Ya balay na nga nadaral, uli patadaggan ku en uli pakappian ku, 17tase ya dudduma peba nga totolay en ngammin ya mari Judio ira nga pabbalinan ku kan kuak, tafulan dak nga Afu," 18kunna y Afu Dios nga mangngua kan ira yaw nga nepakammu na kattun.' " 19Kunna peba y Santiago nga nakkahi, "Ya napanonot ku gafen, mari tera zinan nga paziyatan ya mari Judio ira nga mabbalittag nga umang kan y Afu Dios. 20Ngam iturak tera kan ira nga mari ra mangan kan hanna laman nga mekuenta kan mari narenu megafu kan ya neke-ofresi/nekededika na kan rebultu, en mari ra maddallaw, en mari ra mangan kan daha onu kan ayam nga mari napadaha. 21Namegafu kattun, kan kada algaw nga angngilinan tera nga Judio, kan ya sinagoga ira kan kada siudad, mebibbibbid ya dorob nga neturak y Moises, en hinnian mangipalapalappat kan yan." 22Sangaw, ya apostol ira, ya panakallan nga lalakay ira en ya interu iglesia, napanonot da nga napia nu mamili ra kan lallaki kan ira nga pevulunan da kan y Pablo en y Bernabe nga umang kan Antiokia. Pinili ra y Judas nga ne-ammawan/nengahanan kan Barsabas en y Silas nga panakallan kan ya wawwahi kan pangurug. 23Kunna tiaw ya turak nga nevulun da: "Ikami nga apostol en panakallan nga lalakay ira nga wawwahi nu, diot mi kan ikayu nga wawwahi mi ira nga mari Judio nga maddian kan ya siudad ya Antiokia, kan ya nasion ya Siria en kan ya probinsia ya Cilicia. 24Nagina mi nga hinnian totolay nga napanaw kan ya iglesia kanniaw nga minang nattuldu kan ikayu, en megafu kan ya netuldu ra, pinavvurung da kayu en pinagulu ra ya ginnonotan nu, ngam mari mi mamba iniddannan ira kan paka-awayya ra nga mangituldu kan yan kan ikayu. 25Gaggafen, narammung kami en nakkara-anahutan mi nga napia nu mamili kami kan lallaki nga bonan mi kan ikayu. Pevulunan mi ira kan y Bernabe en y Pablo nga ideddukan tera, 26nga lallaki nga nesubu/nesibba ra ya gi-angattan da kannia assesserbi ra kan y Afu tera nga Jesu Cristo. 27Bonan mi gafen y Judas en y Silas kan ikayu tase umang da nga baggabaggian nga pakurruan kan ikayu ira yaw nga iturak mi kan ikayu. 28Zinisidi ya Espiritu Santo en nakkara-anahutan mi pay nga napia nu awan nga tanakkuan ngin nga ipaparulot mi kan ikayu nga alale nadammat nga ipakattu mi kan ikayu, nu azzi ira yaw laman nga mawag kan mari nu kuan. 29Mari nu mangan kan hanna laman nga mebilang kan mari narenu gafu ta ne-ofresi kan rebultu onu daha onu ayam nga mari napadaha, en mari nu maddallaw. Nu vuluvulunan nu ira yaw nga bilin, napia ya kuan nu. Awan ngin." 30Sangaw, minang ya nabon ira kan Antiokia. Kattu nakalabbet da kannay, inammung da ya mangurug ira, en neddan da ya turak kan ira. 31Kattu nebibbid da yan kan ira, nayayat da kan yan nga namasikan kan ya angngurug da. 32Y Judas en y Silas nga profeta ira, kan aru nga ergo, pinagutuk/pinaturid/pinataggad da ya wawwahi ira, en pinasikan da ya angngurug da. 33Kabalin ya nepaddian da kannay kan mediu nabayag, ya wawwahi kan pangurug, pinagannukat da ira, en kinahi ra kan ira kan pare zinan ta mapalliad da kannia annaladalan da, en nattoli ra Judas kan ya nabbon kan ira. 34Ngam nattalan/nabbattang y Silas kannay. 35Nattalan y Pablo en y Bernabe kan Antiokia nga mangituttuldu en mangipalapalappat kan ya ergo y Afu Jesus, en aru peba ya naka-angngua kan yan. 36Nappasa kan pia nga algaw, kunna y Pablo nga nakkahi kan y Bernabe, "Tollian ta nga bisitan ya wawwahi ira kan pangurug kan ngammin nga siudad nga nangipalappatan ta kattun kan ya ergo y Afu Jesus tase mammuan ta nu minnia/manna ra." 37Ikayat y Bernabe nga ivulun da y Juan nga ne-ammawan/nengahanan kan Marcos. 38Ngam napanonot y Pablo nga mari napia nu ivulun da iggina, gafu ta pinanawan na ira kattun kan Pamfilia, en mari na nevulun kan ira kan ya trabahu ra. 39Sangaw, nadammat ya nepakkatabbag da nga dua kan me-annung kan yan, en sangaw, naggungay ra. Inalak y Bernabe y Marcos, en nattakay ra kan dakadakal nga barangay nga minang kan ya fugu ya Chipre, 40ngam pinili y Pablo y Silas. Ya wawwahi ira kan pangurug, nekatalak da ira nga dua kan ya allak y Afu, en sangaw, napanaw ran. 41Zinalan da ya nasion ya Siria en ya probinsia ya Cilicia nga pasapasikannan da ya angngurug ya totolay kan ya iglesia ira.

will be added

X\