Kinikkingngua 14

1Kan ya siudad ya Iconio, minang y Pablo en y Bernabe kan ya sinagoga nga kunna tian ya kustumbre ra, en megafu kan ya pia ya nepangngipalappat da kan ya ergo y Afu Dios, napakaru ya Judio en ya mari Judio nga nangurug. 2Ngam ya Judio ira nga nammari nga nangurug, binensi ra ya mari Judio ira tase turiyan da ya maggurwahi kan pangurug. 3Nannayun da Pablo nga naddian kannay nga nagutuk/naturid/nataggad da nga nangipalapalappat kan me-annung kan y Afu. Pinakurug y Afu ya kinahakahi ra nga me-annung kan ya allak na kannia nepangngiddan na kan ira kan ya pakapangngua ra nga maka-angngua kan milagro ira en mekapakkapalat nga ganagannud. 4Nakkaddua ya totolay kan ya siudad. Ya dudduma/karruan, netadday ra kan ya Judio ira, en ya dudduma kan ya apostol ira. 5Sangaw, pinanonot ya Judio ira en ya mari Judio ira en ya panakallan ira kan ira nga tattazzian da en batabatuan da ira Pablo. 6Ngam nammuan da Pablo yan, en nerame ra gafen nga nattammang nga minang kan ya siudad ya Listra en ya siudad ya Derbe kan ya probinsia ya Licaonia, en kan ya lugar ira kan ya pallehut da. 7Nepalapalappat da kannay ya napia nga dumug. 8Kan ya siudad ya Listra, hinnian/asan tolay nga mari vulvua/pulus makadalan gafu ta ne-anak nga pilay, en awan vulvua sikan ya taka na. 9Aggatuttud iggina nga maggiggina kan ya napia nga dumug nga nepalappat y Pablo. Zinulangngan y Pablo iggina, en nasingan na nga hinnian angngurug na nga mapammapia iggina. 10Kunna y Pablo nga nangikullet kan iggina, "Manadag ka kan natunung ngin!" Sangaw, nanadag en nanalan igginan. 11Kattu nasingan ya totolay yan nga kiningngua y Pablo, kunda nga nangikullet kan ya perergo ra nga naddian kan Licaonia, "Nazzittag ya dios ira kan itteran, en nabbalin da kan kagitta tolay!" 12Nginahanan da y Bernabe kan Zeus, en nginahanan da pay y Pablo kan Hermes gafu ta iggina ya malalaki nga mergo. 13Hinnian templo y Zeus kan ya liwan ya siudad, en nangiyangay ya pari y Zeus kan baka ira en kan natalapid nga lappaw ira kan ya trangka ya templo, gafu ta ikayat na en ya totolay nga iyofresi/idedika ira yaw kan ya apostol ira. 14Ngam y Bernabe en y Pablo nga apostol, kattu nammuan da ya kuan ya totolay, binerget da ya gissinnunan da pe laman. Nappaladdiaw ra Pablo kan ya pattarangngan ya totolay, en kunda nga nangikullet, 15"Wawwahi ira, ka-am ta kuan nu ya kunna tian? Tolay kami laman kan kagitta nu! Minang kami kanniaw nga mangipalapalappat kan ya napia nga dumug kan ikayu, tase likuran nu ira yan nga ganagannud nga awan da nga serbi, en mangurug kayu kan y Afu Dios nga siggamatolay nga namaratu kan ya langit, lusak, bebay en ngammin nga ganagannud nga hinnian kan ira. 16Kattun, nepamavulun na kan ngammin nga totolay kan kuan da ya hanna laman nga ikayat da. 17Ngam maski kunna tian, kannia angnga-angngua na kan napia para kan ikayu, nepasapasingan na nga hinnian iggina. Iddannan na kayu kan uran nga maggafu kan langit en kan apit kan ya fustu nga tiempo. Battabattuhan na kayu kan napia, en pannuan na ya giffutuan nu kan payayat." 18Maski peba kunna tiaw ya kinahi ra Pablo kan ira, nararriatan da nga nappemmang kan ya tolay ira nga mangiyofresi kan ira yan kan ira. 19Ngam hinnian Judio ira nga naggafu kan ya siudad ya Antiokia en ya siudad ya Iconio nga luminabbet kannay. Nabensi ra ya ginnonotan ya totolay nga mevulun kan ira nga mangontra kan ira Pablo. Sangaw, binatabatu ra y Pablo, en zinedelag da ya baggi na addet kan ya liwan ya siudad nga inabbat da kan natay igginan. 20Ngam kattu minang narammung ya disipulo ira kan ya pallehut na, nanadag iggina, en siminallung da kan ya siudad. Kan kamatarukan na, napanaw y Pablo en y Bernabe, en minang da kan ya siudad ya Derbe. 21Nepalapalappat da Pablo ya napia nga dumug kan Derbe, en napakaru ya napabbalin da kan disipulo kannay. Kabalin na yan, nattoli ra kan Listra en kan Iconio, en kan Antiokia kan ya probinsia ya Pisidia. 22Kan kada lugar nga inangayan da, pinasapasikan da ya ginnonotan ya mangurug ira, en pinaggutuk da ira nga isigisige ra ya angngurug da. Kunda peba nga nakkahi, "Mawag kan aru ya ziyariyat nga mapasan tera kallie tera nga tumallung kan ya pappatulan y Afu Dios." 23Nanunnak da Pablo kan lalakay ira nga mabbalin kan panakallan kan kada iglesia para kan ya iglesia ira pe laman. Kattu nayuno en naddasal da, nekatalak da ira kan y Afu Jesus nga kinurug da. 24Sangaw, kattu sinalebaran da ya probinsia ya Pisidia, nakakaddet da kan ya probinsia ya Pamfilia. 25Nepalappat da ya napia nga dumug kan ya siudad ya Perge, en sangaw, minang da kan ya siudad ya Atalia. 26Napanaw ra kannay nga nattakay kan dakadakal nga barangay nga nattoli kan ya siudad ya Antiokia kan ya nasion ya Siria. Kan yan nga siudad, nekatalak da kattun kan ya allak y Afu Dios tase kuan da ya trabahu nga nabalin dan. 27Kattu luminabbet da kannay, inammung da ya mangurug ira, en pinakoli ra kan ira ya kinikkingngua y Afu Dios nga nangiyusa kan ira Pablo, en ya nepappesimmu na kan awayya na nga mangurug ya mari Judio ira. 28Nannayun da Pablo nga nakipaddian kan ya disipulo ira kannay.

will be added

X\