Kinikkingngua 13

1Kan ya iglesia kan Antiokia, hinnian/asan profeta ira en mestru ira. Ira Bernabe, Simeon nga ne-ammawan/nengahanan kan Niger, Lucio nga taga Cirene, Manaen nga kagindan y Herodes nga natebi en y Saulo. Y Herodes, patul kan pakkappat kattun. 2Kannia ira nga masserbi kan y Afu en mayuno, kunna ya Espiritu Santo nga nakkahi kan ira, "Ilinnay nu y Bernabe en y Saulo tase kuan da ya trabahu nga nanunnakkan ku kan ira." 3Sangaw, kattu nabalin da nga nayuno en naddasal, nepotun da ya ima ra kan ira nga dua, en binon da iran. 4Gaggafen, megafu kan ya nepabbon ya Espiritu Santo kan y Bernabe en y Saulo, minang da kan ya siudad ya Seleucia, en kannay nattakay ra kan dakadakal nga barangay, en minang da kan ya fugu ya Chipre. 5Nevulun da y Juan nga ne-ammawan kan Marcos nga manguffun kan ira. Kattu nakakaddet da kan ya siudad ya Salamina, nepalapalappat da ya ergo y Afu Dios kan ya sinagoga ira ya Judio ira kannay. 6Sangaw, minang da zinaladalan ya interu fugu addet kan ya siudad ya Pafo. Hinnian isa nga Judio nga mangngahan kan Bar-Jesus nga nasimmuan da kannay nga salamangkeru/madyikeru en falso nga profeta. 7Isa iggina nga kavulun ya gubernador nga mangngahan kan Sergio Paulo nga ma-utak nga tolay. Nepakkul ya gubernador y Bernabe en y Saulo gafu ta ikayat na nga ginan ya ergo y Afu Dios. 8Ngam y Bar-Jesus (ya ngahan na kan Griego, "Elimas," nga ya kebalinan na, "salamangkeru") sinuriya na ira nga kinakkapan na nga pammarrian ya gubernador kan ya kurug nga ergo y Afu. 9Ngam y Saulo nga mangngahan peba kan Pablo, napannuan ngin kan Espiritu Santo. Zinulangngan na y Elimas, 10en kunna nga nakkahi, "O anak na ka ya diablo. Napannu ya futum kan nelot/nafulotan nga kinadakkut en angngilohot, en turiyadu ka kan ngammin nga napia. Kurug kazze/pano nga marim immangan nga kakkapan nga pabbalinan kan laddud/busid ya kurug nga me-annung kan y Afu? 11Ipotun sangaw y Afu Dios ya ima na kan ikaw tase mavvulaw ka, en marim makasingan ngin kan ya nawag ya sinag kan manayun." Nerame nagguribat en nakkokopan/nakkallap ya anningan na, en nakkarakaralap iggina nga nanafataful kan mangebit en mangigiya kan iggina. 12Sangaw, kattu nasingan ya gubernador ya nesimmu kan iggina, nangurug iggina nga nappabbaw kan ya pakapangngua y Afu Jesus. 13Nattakay ra Pablo manin kan dakadakal nga barangay nga napanaw kan Pafo, en minang da kan ya siudad ya Perge kan ya probinsia ya Pamfilia. Yan nga lugar ya namanawan y Juan Marcos kan ira en nattoli kan Jerusalem. 14Ngam y Pablo en y Bernabe, napanaw ra kan Perge en minang da kan ya siudad ya Antiokia kan ya probinsia ya Pisidia. Kan ya angngilinan ya Judio ira, minang da nga nakipanuttud kan ya sinagoga. 15Kabalin ya nekebibbid ya isa nga parte kan ya dorob en ya isa nga parte kan ya neturak ya profeta ira, ya ofisial ira kan ya sinagoga, nepakahi ra kan ira Pablo, "Wawwahik ira, nu hinnian ikayat nu nga kayan nga pamasikan kan ya ginnonotan ya totolay, kayan nu." 16Sangaw, nanadag y Pablo, en netayad na ya ima na kan ira tase memamak da, en kunna nga nakkahi, "Ikayu nga kagittak nga Israelita en ikayu nga mari Judio nga maddayarayaw kan y Afu Dios, ginan dak. 17Ya Dios mi nga Israelita ira, pinili na kattun ya ginafu mi ira, en pinaggaka na ira kan aru kannia nepaddayu ra nga naddian kan ya nasion ya Egipto. Kan panguzzanan, nepanaw na ira kannay megafu kan ya dakal nga pakapangngua na. 18Kan appattafulu kan dahun, inatta-attamman na ira kan ya disierto. 19Kannia nepangnguffun na kan ira, nangaffut da kan pitu nga nasion kan Canaan, en pinabbalin nan kan ira ya makakkua kan ya lusak. 20Nesissimmu ngammin ira yan kan mappattatut se limafulu kan dahun. "Kabalin ira yan, nanuttunnak iggina kan natturunud nga mammoray ira kan ira nga nammuan pay kan minammanunut ira addet kan ya tiempo y Samuel nga profeta. 21Kattu nakkiddaw ya ginafu mi ira kan patul, sinunnak y Afu Dios y Saul nga anak y Kis nga isa kan ya gakagaka y Benjamin. Appattafulu kan dahun ya nepappatul na kan ira. 22"Kattu inazzan na y Saul kan patul, pinabbalin na y David kan patul da. Kunna tiaw ya kinahi y Afu Dios nga me-annung kan iggina, 'Nasimmuan ku kan y David nga anak y Jesse ya tolay nga makapayayat kan yakan nga maka-angngua kan ngammin nga ikayat ku.' 23Segun kan ya netabba y Afu Dios, hinnian isa kan ya gakagaka y David nga ne-atanang na nga Minammalliad kan ya totolay na nga Israelita ira. Iggina y Jesus. 24Kallie ya nepallabbet na, nepalapalappat y Juan nga Minabbawtiso kan ngammin nga totolay ya Israel nga mabbabawi ra kan ya liwaliwat da en mabawtisowan da. 25"Kattu mappanget y Juan nga mabalin kan ya nabonan na, pinovutan na kan ya totolay, 'Hanna ya pangabbattan nu kan yakan? Bakkan kan yakan ya talattaronan nu, nu azzi tumunud iggina kan yakan en marik mepangngat nga mangubbad/mamubbad kan ya galut ya sandallia na.' 26"Wawwahik ira nga gakagaka y Abraham en ikayu nga mari Judio nga maddayarayaw kan y Afu Dios, neddan kan ittera ya ergo nga me-annung kan kapalliad. 27Ya totolay nga maddian kan Jerusalem en ya panakallan ira kan ira, mari ra ammu nga y Jesus ya Minammalliad kan ira, en mari ra nantindian ya neturak ya profeta ira nga ibibbibbid da kan kada kalgawan nga angngilinan da. Kannia nepappapatay ra kan y Jesus, natumpal da ira nay nga kinahi tu profeta ira kattun 28Maski awan nga mepangngat nga gafu ya kapatay na, nekiddaw ra kan y Pilato nga ipapatay na iggina. 29Kattu natumpal da ngammin ya neturak kan ya Sagrado nga Turak nga me-annung kan iggina, zinittag da ya baggi na kan ya kurut, en netanam da. 30Ngam pinagginnolay y Afu Dios iggina, 31en kan aru nga algaw, nappasapasingan iggina kan ya taga Galilea ira nga dana ne-evulun kan iggina nga minang kan Jerusalem. Iran ya mattestigu kan ya totolay kan ya nepagginnolay nan. 32Minang kami gafen kan ikayu tase ipalappat mi ya napia nga dumug kan ikayu nga iggina yaw, ya netabba y Afu Dios kattun kan ya ginafu mi ira nga Judio ira, 33sinumpal nan kan ikami nga gakagaka ra kannia nepammaginnolay na kan y Jesus. Kunna tian pay ya neturak kan ya mekaddua nga Salmo nga kunna, 'Ikaw ya anak ku, Kan sangaw nga algaw, nabbalin nak kan amam.' 34"Nu me-annung kan ya nepammaginnolay y Afu Dios kan y Jesus, en nu me-annung kan ya zi kavurut ya baggi na kan ya netanamman na, kunna tiaw ya nepeturak na, 'Iddan ku kan ikaw ya nasantuan en mapammakatalakkan nga bendision nga netabbak kan y David.' 35En nepeturak na yaw peba kan ya isa nga Salmo nga kunna, 'Ammuk nga marim ipamavulun nga mavurut nak nga nasantuan mu.' 36"Kabalin ya nepasserbi y David kan ya uray y Afu Dios kattu katolay na, natay iggina, netanam kan ya bikat ya ginafu na ira, en navurut ya baggi na. 37Ngam ya pinagginnolay y Afu Dios, mari navurut ya baggi na. 38Gaggafen, wawwahik ira, mawag kan mammuan nu nga megafu kan y Jesus, maddaggun nga mepalappat kan ikayu ya ergo nga me-annung kan ya kapakoma ya liwaliwat nu. 39En megafu kan iggina, ya kada mangurug kan iggina, awayya na nga mapakoma ya liwaliwat na. Mari na awayya nga mapakoma ya tolay megafu kan ya ammaraparulot na kan ya dorob nga nepeturak y Afu Dios kan y Moises laman. 40Memmuhud kayu gafen tase mari mesimmu kan ikayu ya nepeturak y Afu Dios kattun kan ya profeta na ira nga kunna, 41'Ikayu nga minangnguyaw, innan nu. Makkapalat kayu, en sangaw, makkakatay kayu. On, gafu ta hinnian kuan ku kan ya tiempo nu nga mari nu vulvua/pulus kurruan maski nu mepakanawag kan ikayu.' " 42Kannia allawan y Pablo en y Bernabe kan ya sinagoga, nekiddaw ya tolay ira nga mattoli ra kan ya metunud nga algaw nga angngilinan da tase kayan da manin kan ira, ira yan nga ganagannud. 43Kannia nepappanaw ya totolay kan ya sinagoga, napakaru nga Judio ira en mari Judio ira nga mangayat kan y Afu Dios, nga dana nabbalittag kan ya relihion ya Judio ira, nevulun da kan y Pablo en y Bernabe. Sinabarangngan da Pablo ira, en pinasikan da ya ginnonotan da tase pannayunan da ya mattolay kan ya allak y Afu Dios. 44Kan ya netunud nga algaw nga angngilinan da, gunese ngammin ya totolay kan ya siudad ya Antiokia ya minang tase maggina ra kan ya ergo y Afu. 45Ngam kattu nasingan ya Judio ira ya totolay, nelot ya passil da. Sinuriya ra ya kinahakahi y Pablo, en pinaraparakat da iggina. 46Ngam mas naggutuk/natturid/nattaggad y Pablo en y Bernabe nga kunda nga nakkahi, "Mawag kan ikayu nga Judio ya unna nga nakkayanan mi kan ya ergo y Afu Dios. Ngam gafu ta zinispresio nu yan, en nebilang nu kan mari nu mepangngat nga meddannan kan angat nga awan na nga panda, sangaw gafen, ya mari Judio ira ya angkami pappalappatan. 47On, gafu ta kunna tiaw ya nemandu y Afu Dios kan ikami kattun kan ya Sagrado nga Turak nga kunna, 'Sinunnak ta ka kan kagitta zilag kan ya mari Judio ira tase ipakammum ya pamalliad y Afu Dios kan ngammin nga totolay kan ya interu mundo.' " 48Kattu nagina ya totolay nga mari Judio yan, nayayat da, en zinayarayaw ra y Afu megafu kan ya ergo na. En ngammin ya totolay nga natunnak nga matolay kan awan na nga panda, nabbalin da kan mangurug. 49Nepakapakammu ya ergo y Afu Jesus kan ya interu pallehut ya Antiokia. 50Ngam binensi ya Judio ira ya babbay nga me-ekakua nga mangayat kan y Afu Dios en ya panakallan ira kan yan nga siudad nga negafu ra ya nepammazapaziyat da kan y Pablo en y Bernabe, en pinappaw ra ira kan nay nga lugar da. 51Megafu kan yan, sinattak da Pablo ya gahuk ya gittakan da nga kuenta sennial kontra kan ya totolay, en minang da kan ya siudad ya Iconio. 52Ngam ya disipulo ira kan Antiokia, napannuan da kan payayat en kan Espiritu Santo.

will be added

X\