Kinikkingngua 12

1Kan yan nga tiempo, hinnian/asan dudduma/karruan nga totolay kan ya iglesia nga nepagafut y Herodes nga patul tase ipatattazzi na ira. 2Nepafutul na ya ulu y Santiago nga kaka nga wahi y Juan. 3Kattu nasingan na nga napayayat ya Judio ira kan ya kiningngua na, nepagafut na pay y Pedro. Nesimmu yan kan ya algaw ira nga nekaselebra ya Fiesta ya Pan nga Awan na nga Lebadura. 4Kattu nepagafut na iggina, nepekarsel na nga nepe-alawat na kan appat nga grupo nga suddalu nga taggi-appat. Matturubbat da nga magguardia kan iggina. Plano na nga ipelawan iggina nga mabista kan ya paratubangan ya totolay kabalin ya fiesta. 5Gaggafen, pinassige na y Pedro kan karsel, ngam napafutu ya nepangngidasadasal ya iglesia kan iggina kan y Afu Dios. 6Sangaw, kan yan nga gabi kallie ya appelawan zinan y Herodes kan iggina, aggakaturug y Pedro nga aggakawad kan ya naddatanan/nallatanan ya dua nga suddalu. Hinnian pay suddalu ira kan ya puerta nga magguardia kan ya akkarselan. 7Gavvat nga hinnian anghel nga nappasingan kan ya dian na, en hinnian nawag nga nanilag kan ya unag ya kuarto na. Sinappek na ya bikat na tase malukag, en kunna nga nakkahi, "Alistuan mu ya gumangun!" Insigida nazza ya kawad na ira kan ya ima na. 8Kunna peba ya anghel nga nakkahi, "Igalut mu ya kordon mu, en massandallia ka." Kiningngua na yan, en kunna peba ya anghel, "Mololat ka, en mevulun ka kan yakan." 9Nevulun iggina kan ya anghel en nallawan da. Mari na ammu nga kurug yaw nga paddaggunan nga kuan ya anghel kan iggina, ngam ya nangabbattan na, tatenap na yaw laman. 10Sinalebaran da ya unna en ya mekaddua nga guardia, en nakakaddet da kan ya trangka nga balayang nga mattaffut kan ya siudad. Nororay ya trangka nga navvukat, en nallawan da, en nanalan da addet kan ya isa nga duhu ya isa nga dalan, en gavvat nga awan ngin ya anghel. 11Kattu nantindian na nga kurug ya nesimmu kan iggina, kunna kan ya nonot na pe laman, "Sangaw, ammu kun nga kurug nga binon y Afu Dios ya isa nga anghel na nga minang namalliad kan yakan kan ya paka-awayya y Herodes en kan ngammin nga innanaman ya Judio ira nga mesimmu kan yakan." 12Kattu nantindian na nga kurug nga nesimmu yan kan iggina, minang iggina kan ya balay y Maria nga ina y Juan nga ne-ammawan/nengahanan kan Marcos. Napakaru ya narammung kannay nga maddaggun nga mangidasal kan iggina. 13Sangaw, nattottok iggina kan ya puerta kan ya atubang ya balay ra, en hinnian isa nga babbonan nga mangngahan kan Roda nga minang tase ammuan na nu innia ya makatottottok. 14Nengaralan na y Pedro, en megafu kan ya nelot/nafulotan nga aggayayat na, mari na vinukatan ya puerta, nu azzi nappalapaladdiaw iggina nga minang na nepadumug nga aggatadag y Pedro kan ya atubang ya puerta. 15Ngam kunda nga nakkahi, "Ulapa ka nakuay!" Ngam ne-insisti na nga kurug ya kinahi na. Sangaw, kunda gafen nga nakkahi, "Anghel na nay." 16Ngam nassige y Pedro nga makatottottok. Mari nabbayag, vinukatan da ya puerta, en kattu nasingan da iggina, nelot ya nekalagat da. 17Nesenniat na kan ira nga malumamak da. Sangaw, pinakoli na kan ira nga nepelawan y Afu Dios iggina kan ya akkarselan, en kunna nga nakkahi, "Ipadumug nu ira yan nga nesissimmu kan yakan kan y Santiago en kan ya wawwahi tera kan pangurug." Sangaw, napanaw iggina nga minang kan tanakkuan nga lugar. 18Kan kamatarukan na, nagulu ya suddalu ira megafu kan ya nesimmu kan y Pedro. 19Sangaw, nepataful y Herodes iggina, ngam mari ra natafulan. Nepa-imbistiga na ya guardia ira, en sangaw, nepapatay na iran. Kabalin na, napanaw y Herodes kan Judea en minang naddian labbit kan ya siudad ya Cesarea. 20Nelot ya lussaw y Herodes kan ya totolay kan ya siudad ya Tiro en ya siudad ya Sidon. Megafu kan yan, navvurulun da nga minang kan iggina. Kan unna, nakikkofun da kan y Blasto nga ingkargadu kan ya aggiddan ya patul, en sangaw, nakiyareglo ra kan ya patul, gafu ta ya lugar na ya paggafanan maitu/kelattan ya kanan da. 21Kan ya algaw nga sinunnak y Herodes nga akkiyatubang na kan ira, nassinnun iggina kan anaddu nga bisti patul, nanuttud iggina kan ya trono na, en nappalappat iggina kan ira. 22Kunda nga nangikukkullet, "Yan ya ngaral ya isa nga dios, mari na kan tolay." 23Insigida kinastigo ya isa nga anghel y Afu Dios iggina gafu ta mari na neddan kan y Afu Dios nay nga nepaddayaw ra, en nabbalin kan inulag ya baggi na, en natay iggina. 24Nassige nga nawwarak ya ergo y Afu Dios, en minara-aru ya mangurug ira. 25Kabalin y Bernabe en y Saulo nga namalin kan ya nabonan da kan Jerusalem, napanaw ra kannay nga nattoli kan Antiokia, en nevulun da y Juan nga ne-ammawan kan Marcos.

will be added

X\