Kinikkingngua 11

1Sangaw, ya apostol ira en ya wawwahi ira kan pangurug kan Judea, nadumug da nga hinnian/asan mari Judio ira nga nangurug kan ya ergo y Afu Dios. 2Kattu luminabbet da Pedro kan Jerusalem, ya mangurug ira kan y Jesus kannay nga nakugit, nevuya ra iggina 3nga kunda nga nakkahi, "Ka-am ta minang ka kan ya totolay nga mari nakugit en nakipangan ka kan ira?" 4Sangaw, pinakoli na kan ira ya natturunud nga nesissimmu namegafu kattu gafu na. Kunna nga nakkahi, 5"Kattu hinnian nak kan ya babalay ya Joppe nga maddaggun nga maddasal, hinnian nasingan ku nga megitta kan dakadakal nga ulat nga aggabesin ya appat nga duhu na nga naggafu kan langit nga mappagukab kan ya dian ku. 6Kattu iningan ku ya hinnian kan ya ulat, nasingan ku ya maddumuruma nga klase ayam, mesipat ya tanam/tanang ira nga ayam, ya makkarekay en mammanuk ira. 7Hinnian ngaral nga naginak nga kunna nga nakkahi kan yakan, 'Pedro, lumakkat ka. Mamarti ka kan kanan mu.' 8"Ngam kungku nga siminabbag, 'Afu, mari na awayya, gafu ta marik peba vulvua/pulus nangan kan hanna laman nga mekuenta kan mari narenu onu mari mepangngat.' 9"Ngam ya ngaral nga naggafu kan langit, kunna nga nakkahi manin, 'Marim kayan nga mari narenu ya pinakarennuan y Afu Dios ngin.' 10"Nesimmu yan kan namilu, en kabalin na, nattoli nga minutun ngammin kan langit. 11Mismu kan yan nga orat, hinnian tallu nga lallaki nga nabon kan yakan nga naggafu kan ya siudad ya Cesarea nga nakalabbet kan ya balay nga dian ku. 12"Kinahi ya Espiritu Santo kan yakan nga marik mabbabang nga mevulun kan ira gafu ta marik zinan mappadumuruma. Minang nak gafen, en nevulun pay kan yakan ira yaw nga annam nga wawwahi tera kan pangurug nga taga Joppe. Siminallung kami kan ya balay ya tolay nga nabbon kan ya tallu. 13Pinakoli na kan ikami ya nepakasingan na kan ya isa nga anghel nga aggatadag kan ya unag ya balay na nga kunna nga nakkahi kan iggina, 'Mabbon ka kan umang kan Joppe nga mangalak kan y Simon nga ne-ammawan/nengahanan kan Pedro. 14Hinnian bilin nga ipe-addet na tase mapalliad ka en ngammin ya kabbalem ira.' 15"Kattu namegafu nak nga makiergo kan ira, neddan ya Espiritu Santo kan ira kan kagitta pay ya nekeddan na kan ikami. 16Sangaw, nerandamman ku ya kinahi y Afu Jesus kattun kan ikami nga kunna, 'Namawtiso y Juan kan danum, ngam mabawtisowan kayu nattaruk kan Espiritu Santo.' 17Kattu nasingan ku nga neddan y Afu Dios kan ira ya regalu nga megitta kan ya neddan na kan ikami nga nangurug kan y Afu Jesu Cristo kattu nepammegafu mi kan ya trabahu mi, innia nak gafen nga manuriya kan y Afu Dios?" 18Kattu nagina ra ira yan nga kinahi na, awan nga nappikat/nakkanggak, en zinayarayaw ra y Afu Dios nga kunda nga nakkahi, "Gaggafen, maski ya mari Judio ira pay, iniddannan y Afu Dios ira kan paka-awayya ra nga mabbabawi tase hinnian angat da nga awan na nga panda." 19Ya mangurug ira kan y Jesus nga nawwarawarak megafu kan ya nekapazapaziyat da nga namegafu kattu nekapatay y Esteban, nakakaddet da kan ya probinsia ya Fenicia en ya fugu ya Chipre en ya siudad ya Antiokia kan ya nasion ya Siria. Ya Judio ira laman ya nangipalappatan da kan ya ergo nga me-annung kan y Afu Jesus. 20Ngam hinnian dudduma/karruan kan ira nga taga Chipre en taga siudad ya Cirene nga minang kan Antiokia, en nepalapalappat da ya napia nga dumug nga me-annung kan y Afu Jesus kan ya mari Judio ira kannay pay. 21Hinnian ya pakapangngua y Afu Dios kan ira, en napakaru ya nabbalittag en nangurug da kan y Afu Jesus. 22Nadumug ya iglesia kan Jerusalem yan, en binon da y Bernabe kan ya wawwahi kan pangurug kan Antiokia. 23Kattu nakalabbet iggina kannay, en kattu nasingan na ya bendision ira y Afu Dios kan ira megafu kan ya allak na, nelot/nafulotan ya payayat na, en pinasikan na ya ginnonotan da ngammin nga mangisigisige kan ya angngurug da kan y Afu Jesus kan napafutu nga gakkad. 24Napia nga tolay iggina, en napannu kan Espiritu Santo, en nasikan ya angngurug na. Napakaru ya totolay nga nangurug nga netadday kan y Afu Jesus. 25Sangaw, napanaw y Bernabe, tase umang na tafulan y Saulo kan ya siudad ya Tarso. 26Kattu natafulan na, ne-angay na iggina kan Antiokia. Netadday ra kan ya iglesia kannay kan tangarahun, en napakaru ya sinuttulduan da. Kan Antiokia, ya disipulo ira, namegafu nga nangahanan kan Cristiano. 27Kan yan nga tiempo, hinnian dudduma nga profeta ira nga naggafu kan Jerusalem nga minang kan Antiokia. 28Nanadag ya isa kan ira nga mangngahan kan Agabo, en nepepakammu ya Espiritu Santo kan iggina, en kinahi na kan ira nga hinnian dakal nga bisin nattaruk kan ya interu mundo. (Nesimmu yan kannia appatul y Claudio kan Roma.) 29Megafu kan yan, zinisidi ya disipulo ira nga mangiddan ya kada isa kan ira kan ya hanna laman nga awayya ra nga me-uffun kan ya wawwahi ra kan pangurug nga maddian kan ya probinsia ya Judea. 30Kiningngua ra yan, en netuhug da ya uffun da nga ne-angay y Bernabe en y Saulo kan ya lalakay ira nga panakallan kan ya iglesia ira kan Judea.

will be added

X\