Kinikkingngua 10

1Hinnian/Asan isa nga tolay kan ya siudad ya Cesarea nga mangngahan kan Cornelio nga kapitan ya matut nga suddalu nga taga siudad ya Roma nga parte kan ya Batallion Italiano. 2Makadios iggina en hinnian attalaw na kan y Afu Dios, en kunna tian pay kan ya kabbalay na ira. Napakaru ya inuffunan na kan ya maziyat ira nga Judio, en kanakanayun nga maddasal iggina kan y Afu Dios. 3Kan isa nga algaw, maga-alas tres kan giram, hinnian anghel y Afu Dios nga nappasingan kan iggina. Nanawanawag ya nepakasingan na kan ya anghel nga minang kan iggina nga kunna nga nakkul, "Cornelio!" 4Nakatalaw y Cornelio, iningan na ya anghel, en kunna nga siminabbag, "Hanna, Afuk?" Kunna nga siminabbag, "Ginina y Afu Dios ya dasadasal mu, en nasingan na ya angnguffu-uffun mu, en neparandam da ka kan iggina. 5Sangaw, mabbon ka kan lallaki nga umang kan ya siudad ya Joppe nga mangilabbet kanniaw kan ya tolay nga mangngahan kan Simon nga ne-ammawan/nengahanan kan Pedro. 6Makipaddian iggina kan isa nga tolay nga mangngahan kan Simon nga minakkorti kan gaddang ayam nga aranni ya balay na kan ya bebay." 7Kattu napanaw ya anghel nga nakiergo kan iggina, nangakkul y Cornelio kan dua kan ya babbonan na en isa nga makadios nga suddalu nga isa nga masserbi pay kan iggina. 8Pinakoli na kan ira ngammin ya nesimmu, en binon na ira kan Joppe. 9Kan ya netunud nga algaw kan ya orat attataruk, kannia aggangay ya nabon ira nga umara-aranni ran kan Joppe, nekanna kan minunek y Pedro kan ya piesa nga utun ya balay ra tase maddasal iggina. 10Nabisin igginan, en ikayat nan ya mangan. Kannia apparan ya kabbalay na ira kan ya panaruk da, nasingan na 11nga alale navvukat ya langit, en hinnian nasingan na nga megitta kan dakadakal nga ulat nga aggabesin ya appat nga duhu na nga maddaggun nga mappagukab kan ya utun lusak. 12Kan yan, hinnian ngammin nga klase ya aya-ayam, mesipat pay ya makkarekay en mammanuk ira. 13Hinnian ngaral nga kunna nga nakkahi, "Pedro, lumakkat ka. Mamarti ka kan kanan mu." 14Ngam kunna y Pedro nga siminabbag, "Afu, mari na awayya, gafu ta marik peba vulvua/pulus nangan kan hanna laman nga mekuenta kan mari narenu onu mari mepangngat." 15Kunna manin ya ngaral nga nakkahi, "Marim kayan nga mari narenu ya pinakarennuan ngin y Afu Dios." 16Nesimmu yan kan namilu, en sangaw, nattoli ngin yan nga ulat nga minutun kan langit. 17Kannia appalappanonot y Pedro nu hanna ya kebalinan na yan nga nasingan na, ya totolay nga binon y Cornelio, bahu pinovutan da ya balay ra Simon, en sangaw, hinnian dan nga aggatadag kan ya trangka. 18Nakkul da, en pinovutan da nu makipaddian y Simon nga ne-ammawan kan Pedro kannay. 19Kannia appalappanonot peba y Pedro kan ya nasingan na, kunna ya Espiritu Santo nga nakkahi, "Innan mu. Hinnian tallu nga lallaki nga manaful kan ikaw. 20Manadag ka, mazzittag ka, en mevulun ka kan ira, en marim mabbabang, gafu ta yakan ya nappabon kan ira kan ikaw." 21Gaggafen, zinittahan y Pedro ya lallaki, en kunna nga nakkahi, "Yakan yaw nga tafulan nu. Ka-am ta hinnian kayu kanniaw?" 22Kunda nga siminabbag, "Binon na kami kanniaw ya isa nga kapitan nga mangngahan kan Cornelio, gafu ta kinahi kanu ya isa nga nasantuan nga anghel kan iggina nga ipakkul na ka nga umang kan ya balay ra tase ginan na ya hanna laman nga kayan mu. Natunung iggina, en hinnian attalaw na kan y Afu Dios, en ngammin ya Judio ira nga makakammu kan iggina, ikakua ra iggina." 23Pinatallung y Pedro ira, en pinakkaturug na ira kan nay nga gabi. Kan kamatarukan na, naggannukat da, en nevulun y Pedro kan ira nga napanaw. Hinnian dudduma/karruan nga wawwahi kan pangurug nga maddian kan Joppe nga nevulun pay kan ira. 24Kan ya netunud nga algaw, nakalabbet da kan Cesarea. Dana nepakkul y Cornelio ya papparrientes na en ya nazikkat nga kakkofun na, en narammung da kan ya balay na nga mattalattaron kan y Pedro. 25Kattu siminallung y Pedro, zinafung y Cornelio iggina, en nappalentud iggina kan ya atubang na, en zinayarayaw na. 26Ngam pinattadag y Pedro iggina nga kunna, "Manadag ka, gafu ta isa nak laman nga tolay." 27Kannia maddaggun y Pedro nga makiergo kan iggina, siminallung da kan ya balay, en nasingan na ya aru nga totolay nga narammung. 28Kunna y Pedro nga nakkahi kan ira, "Ikayu mismu, ammu nu mamba nga megamma kan ya relihion mi nga Judio ya akkipattangesa onu abbisita kan ya innia laman nga mari Judio. Ngam nepakammu y Afu Dios kan yakan nga marik ikuenta ya innia laman kan mari narenu onu mari mepangngat. 29Yan ya gafu na nga marik nabbabang nga minang kanniaw kattu nepakkul nak. Povutan ku bitan nu ka-am ta nepakkul nak." 30Kunna y Cornelio nga siminabbag, "Kattu nappasa ya appat algaw kan kunna tiaw nga orat balalaman, kan alas tres kan giram, kannia yakan nga maddasal kan balay, gavvat nga hinnian lalaki nga makatulang ya sinnun na nga nanadag kan ya atubang ku. 31Kunna nga nakkahi, 'Cornelio, ginina y Afu Dios ya dasadasal mu en ya angnguffu-uffun mu kan ya maziyat ira, en neparandam da ka kan iggina. 32Mabbon ka gafen kan Joppe, en ipakkul mu y Simon nga ne-ammawan kan Pedro. Makipaddian iggina kan y Simon nga minakkorti kan gaddang ayam nga maddian kan aranni kan ya bebay.' 33"Sangaw, neramek nabbon kan mangakkul kan ikaw, en napia gafu ta minang ka. Hinnian kami gafen ngammin kanniaw kan ya paningan y Afu Dios, en maggina kami kan ngammin nga ipekahi na kan ikaw kan ikami." 34Sangaw, kunna y Pedro nga nangipalappat kan ira, "Kurukurug, nammuan kun nga mari mappadumuruma y Afu Dios, 35nu azzi awayya na alawatan ya innia laman nga hinnian attalaw na kan iggina nga maka-angngua kan napia, maski nu hanna ya rasa na. 36Yaw ya ergo nga nepeddan na kan ya Israelita ira nga nepepalapalappat na nga napia nga dumug nga hinnian imamak megafu kan y Jesu Cristo, iggina ya Afu kan ngammin. 37En yaw, ammu nu mamba ya nakanakua kan ya interu lugar ya Judio ira nga namegafu kan ya probinsia ya Galilea kabalin ya nepangngipalapalappat y Juan nga mabawtisowan zinan ya totolay. 38Ikayat ku nga kayan, pinannu y Afu Dios y Jesus nga taga babalay ya Nazaret kan Espiritu Santo en kan pakapangngua, en minang iggina kan aru nga lugulugar nga kanakanayun nga naka-angngua kan napia, en pinammapia na ngammin ya pinazapaziyat ya diablo, gafu ta hinnian y Afu Dios kan iggina. 39Ikami ya mattestigu kan ngammin nga kinikkingngua na kan Jerusalem en kan ya lugar ira ya Judio ira. Nepapatay ra iggina nga nepepatak da kan kurut, 40ngam pinagginnolay y Afu Dios iggina kan ya mekatallu nga algaw, en pinappasingan na iggina, 41mari na kan ngammin nga totolay, nu azzi kan ikami laman nga pinili y Afu Dios kattun nga mattestigu kan ya nepagginnolay na, ikami nga nakipangan en nakiyenum kan y Jesus kabalin na nga nagginnolay. 42Nemandu na nga ipalappat mi en testiguan mi kan ya totolay nga iggina ya sinunnak y Afu Dios nga mamanunut kan ya matolay ira en ya nakkakatay ira. 43Iggina ya kinahi ngammin ya profeta ira kattun nga ya innia laman nga mangurug kan iggina, mapakoma ya liwaliwat na megafu kan ya ngahan y Jesus." 44Kattu maddaggun peba nga mangipalappat y Pedro kan ira yan nga ergo, minang ya Espiritu Santo kan ngammin nga maggiggina kan ya kayakayan na. 45Ya Judio ira nga mangurug kan y Jesus nga nevulun kan y Pedro, nalagat da gafu ta neddan y Afu Dios ya regalu nga Espiritu Santo maski kan ya totolay nga mari Judio. 46Ammu ra Pedro yan gafu ta nagina ra ya mari Judio ira nga maddaggun nga mergo kan maddumuruma nga perergo en maddayarayaw ra kan y Afu Dios. Sangaw, kunna y Pedro nga namovut, 47"Hinnian kazze/pano makegamma kan ya kabawtiso ira yaw nga totolay kan danum nga neddannan ngin kan ya Espiritu Santo nga negitta kan ikami?" 48Nemandu na gafen nga mabawtisowan da kan ya ngahan y Jesu Cristo. Sangaw, nekiddaw ra kan ira Pedro nga makipaddian da kan ira kan pia nga algaw peba.

will be added

X\