Kinikkingngua 1

1Mekakua nga Teofilo, kan ya unna nga turak ku, kinahik ya me-annung kan ngammin nga kinikkingngua y Jesus en ya netuttuldu na namegafu kattu gafagafu na 2panda kan ya algaw nga nepaggutun na kan langit. Kallie ya nepaggutun na, megafu kan ya paka-awayya ya Espiritu Santo, hinnian/asan nemandu na kan ya apostol na ira nga pinili na. 3Kabalin ya nekapatay na, kan aru nga pamakurug, nepasingan na kan ira nga nagginnolay iggina. Kan appattafulu kan algaw, naming aru nga nappasingan iggina kan ira, en kinahi na ya me-annung kan ya appatul y Afu Dios. 4Kan missa nga narammung da, kannia akkipangan na kan ira, kunna nga nangimandu kan ira, "Mari nu mapanaw kan ya siudad ya Jerusalem, gafu ta taronan nu ya netabba y Ama nga dana kinahik kan ikayu. 5On, gafu ta kattun, danum ya namawtisowan y Juan, ngam kan pia nga algaw, mabawtisowan kayu kan Espiritu Santo." 6Kannia nepaggarammung manin ya apostol na ira, kunda nga namovut kan iggina, "Afu, itolim kazze/pano sangaw kan ya totolay ya Israel ya pappatulan da pe laman?" 7Kunna nga siminabbag, "Mari mepangngat nga mammuan nu ya tiempo onu ya orat nga sinunnak ya Ama kan ya paka-awayya na pe laman. 8Ngam meddannan kayu kan pakapangngua so nu umang ya Espiritu Santo kan ikayu, en ikayu ya testiguk kan ya totolay kan Jerusalem en kan ya interu probinsia ya Judea en ya Samaria, en addet kan ya pamandanan ya lusak." 9Kattu nakahi na ira yan, minutun iggina kan langit nga aggasinnan da, en sinallabban ya isa nga kunam iggina, en mari ra nasingan ngin. 10Kannia aggasirung da peba kan langit kannia aggutun na, gavvat nga hinnian/asan dua nga lallaki nga nassinnun kan furaw nga nanadag kan ya bikat da. 11Kunda nga namovut, "Lallaki nga taga Galilea, ka-am ta aggatadag kayu peba laman nga inni-innan nu ya langit? Nay nga Jesus nga napanaw kan ikayu nga minutun kan langit, manoli nattaruk kan kagitta ya nepaggutun na kan langit nga nasingan nu." 12Sangaw, pinanawan ya disipulo ira ya Bakulud Olivo, en nattoli ra kan Jerusalem nga maturuk kan tangakilometro ya karayyu na. 13Kattu nakalabbet da kannay, minunek da kan ya kuarto kan ya utun nga paddianan da. Ya hinnian kannay, ira Pedro, Juan, Santiago, Andres, Felipe, Tomas, Bartolome, Mateo, Santiago nga anak y Alfeo, Simon nga patriota, en y Judas nga anak ya tanakkuan nga Santiago. 14Ira ngammin en y Maria nga ina y Jesus en ya dudduma/karruan peba nga babbay en ya lallaki nga wawwahi y Jesus pay, kanakanayun nga nattangesa ra nga naddasal. 15Kan isa kan ira nay nga algaw, narammung ya mangurug ira kan y Jesus nga mammatut se duafulu ya karu ra. Nanadag y Pedro kan ya paratubangan da, en kunna nga nakkahi, 16"Wawwahik ira, fersadu ya nekatumpal ya nepeturak kattun ya Espiritu Santo nga neturak y David kan ya Sagrado nga Turak nga me-annung kan y Judas nga nangigiya kan ya totolay nga nangaresta kan y Jesus. 17Isa iggina kattun kan ikami, en isa iggina nga napili kan yaw nga trabahu para kan y Afu Dios." 18(Ya kuartu nga tandan na kan ya narakat/napot nga kiningngua na, negatang kan koman. Kallie ya nekagatang na, natanag/nakabok iggina, en nabattak ya sinay na, en newartak ngammin ya hinnian kan ya unag ya baggi na. 19Ngammin ya maddian ira kan Jerusalem, nammuan da yan. Gaggafen, nginahanan da yan nga koman kan Akeldama nga, ya kebalinan na kan ya perergo ra, koman daha.) 20Nassige y Pedro nga kunna nga nakkahi, "On, gafu ta neturak y David kan ya Salmo ira nga kunna, 'Pare zinan ta madiha ya balay na, En pare zinan ta awan nga maddian kannay.' Neturak na pay nga kunna, 'Pare zinan ta hinnian manali kan iggina kan ya trabahu na para kan y Afu Dios.' 21Gaggafen, kan ya lallaki nga ne-evulun kan ikami kan ngammin nga tiempo nga nepangngivuluvulun y Afu Jesus kan ikami, 22namegafu kannia nepammawtiso y Juan kan iggina addet kan ya algaw nga nepaggutun na kan langit, mawag kan hinnian isa nga mabbalin kan testigu kan kagitta mi kan ya nepagginnolay na." 23Sangaw, nangisuhiri ra kan dua, y Jose nga ne-ammawan/nengahanan kan Barsabas en kan Justo, en y Matias. 24Kunda nga naddasal, "Afu, ammum ya giffutuan mi ngammin. Ipasingan mu gafen kan ikami nu innia kan ira yaw nga dua ya pinilim, 25tase iggina ya tali y Judas kan yaw nga trabahu en ka-apostol nga linikuran na nga minang kan ya lugar nga kepangngattan na." 26Sangaw, rinifa ra nu innia kan ira nga dua, en y Matias ya napili nga manali kan y Judas nga metadday kan ya mafulu se isa nga apostol ira.

will be added

X\