2 Timoteo 4

1Gafu ta hinnian/asan tera kan ya atubang y Afu Dios en y Jesu Cristo nga mamanunut nattaruk kan ngammin nga matolay en nakkakatay ira, en megafu pay ta lumabbet iggina nattaruk nga mappatul kan ittera, imanduk kan ikaw 2nga ipalapalappat mu ya ergo y Afu Dios kannay. Siggaparan ka zinan nga mangipalappat kan yan kan napia onu kan mari napia nga tiempo. Bensian mu ya totolay, ivuyam ira, pasikannan mu ya ginnonotan da, en pakanadduan mu ya pasensiam nga mattuldu. 3On, gafu ta lumabbet nattaruk ya tiempo nga mari ikayat ya totolay nga ginan ngin ya kurug nga metuldu kan ira, nu azzi manafataful da kan aru nga mestru para kan ira pe laman nga mangituldu kan ya ganagannud nga ikayat da nga ginan. 4Likuran da nattaruk ya kurug, en yan laman ya ikayat da nga ginan, ya istoria ira. 5Ngam ikaw, isigem nga tangngallan ya nonot mu kan ngammin nga situasion mu, attamman mu ya azziyariyat mu, kuan mu ya annungan ya isa nga minangngipalappat kan ya napia nga dumug, en kuan mu ngammin ya annungan mu nga masserbi kan y Afu Dios. 6Nu me-annung kan yakan, mappanget nak nga mapatay nga me-ofresi/mededika kan y Afu Dios. Luminabbet ngin ya tiempo ya appanok. 7Kiningngua kun ya panda nawayyak nga nanuruturiya kan ya narakat/napot. Nabalin kun ya nabbonan y Afu Dios kan yakan, en natumpal kun ya kurug nga tuldu nga nekatalak kan yakan. 8Megafu kan ira yan, hinnian narimanan nga premio nga megitta kan korona ya kinatunung nga iddan kan yakan y Afu Jesu Cristo nga natunung nga mamanunut, en iddan na yan nattaruk kan ya algaw nga ammanunut na, en mari na kan yakan laman ya meddannan, nu azzi ngammin ya mattalattaron ira kan ya annoli na. 9Kuan mu ya panda mawayyam nga umang kan yakan insigida, 10gafu ta pinanawan nak y Demas gafu ta ayatan na yaw nga nemundowan nga attolay, en minang iggina kan Tesalonica. Minang y Cresente kan ya probinsia ya Galacia en y Tito kan ya probinsia ya Dalmacia. 11Y Lucas laman ngin ya natalan/nabattang kan yakan. So nu angka kanniaw, sibalan/dahatan mu y Marcos en ivulun mu, gafu ta dakal ya me-uffun na kan yakan kan ya trabahuk. 12Binon ku y Tikico kan ya siudad ya Efeso. 13So nu angka kanniaw, ivulun mu tu lutud ya sinnun ku nga netalan ku kan y Carpo kan ya siudad ya Troas, en ya turak ira pay, nepatalluaring ira nay nga importante nga dokumentu. 14Y Alejandro nga minappanday kan rumienta nga balayang, aru ya narakat nga kiningngua na kan yakan. Y Afu Dios ya makammu nga mangibalat laman ngin kan ya kinikkingngua na. 15Mappalan/Memuhud ka kan iggina, gafu ta nelot/nafulotan ya nepannuriya na kan ya ituttuldu tera. 16Kattu unna nga nekahusgak, awan nga nangitadag kan yakan, ngam nakkapanawan dak ngammin. Pare zinan ta mari paliwatan y Afu Dios ira megafu kan yan. 17Ngam hinnian y Afu Jesus kan yakan, en pinasikan na ya nonot ku, tase awan nga kurang ya nepakammuk, en awayya na nga, ngammin ya mari Judio ira, magina ra ira yan. En marik nasentensian nga mapatay. 18Italak nak y Afu Jesus kan ngammin nga narakat, en alakan nak nattaruk kan ya pappatulan na kan langit. Pare zinan ta madayarayaw iggina kan awan na nga panda. Amen. 19Diot ku kan y Priscila en y Akila, en kan y Onesiforo en kan ya kabbalay na ira. 20Nattalan y Erasto kan ya siudad ya Corinto. Pinattalan ku y Trofimo kan ya siudad ya Mileto gafu ta matakit. 21Kuan mu ya panda mawayyam nga umang kanniaw kallie ya tiempo lammin. Ira Eubulo, Pudente, Lino, Claudia, en ngammin ya wawwahi tera kan pangurug nga hinnian kanniaw, ipedatang da ya diot da pay kan ikaw. 22Pare zinan ta kanakanayun nga hinnian y Afu Jesus kan ya karalluam, en hinnian ya allak na kan ikayu ngammin.

will be added

X\