2 Timoteo 2

1Ikaw nga ibilang ku kan anak ku, mawag kan nasikan ya angngurug mu megafu kan ya allak nga hinnian/asan kan y Jesu Cristo. 2En ya naginam nga netuttulduk kan ya paratubangan ya aru nga totolay, ituttuldum pay kan ya mapammakatalakkan ira nga totolay nga makapattuldu pay kan ya dudduma/karruan. 3Makipazziyariyat ka kan yakan kan kagitta isa nga napia nga suddalu y Jesu Cristo. 4Aggangarrian, awan nga maddaggun nga massuddalu nga moleran na ya situasion ya totolay nga mari suddalu, tase mapagustuan na ya mammoray kan iggina. 5Ya atleta nga makikkontes, mari mapremiowan nu mari na vuluvulunan ya reglamento ira. 6Ya kusettieru nga nabbannabannag ya mepangngat nga unna nga makalawat kan billay kan ya apit na. 7Patalattappan mu ira yaw nga kayan ku, gafu ta iddan y Afu Dios kan ikaw ya pakantindim kan ngammin ira yaw. 8Dandamman mu y Jesu Cristo nga nagginnolay en gaka y David. Yan ya napia nga dumug nga ipalapalappat ku. 9Yan ya gafu na kan napazapaziyat nak addet kan ya nekakawad ku kan kagitta isa nga kriminal, ngam mari nakawaran ya bilin y Afu Dios. 10Megafu kan yan, ata-attamman ku ngammin ira yan megafu laman kan ya totolay nga pinili y Afu Dios, tase malak da ya kapalliad nga maggafu kan y Jesu Cristo en ya mannanayun nga kekapalat. 11Makurug yaw nga akkayanan, "Nu netangesipat tera kan ya nepappatay na, makipattolay tera pay nattaruk kan iggina. 12Nu matattam tera kan ziyariyat, makipammoray tera pay nattaruk kan iggina. Nu kayan tera nga mari tera ammu iggina, kayan na nattaruk nga mari na ammu ittera pay. 13Nu mari tera mapammakatalakkan, mannanayun iggina nga mapammakatalakkan, gafu ta mari na awayya kan zi na nga kuan ya kinahi na." 14Iparandam mu ira yan kan ira, en taddanan mu ira kan ya atubang y Afu Dios nga mari ra makididdiskusion kan me-annung kan ergo ira, gafu ta awan nga serbi na yan, nu azzi darallan na ya angngurug ya maggiggina ira. 15Kuan mu ya panda mawayyam nga mabbalin kan makapayayat kan y Afu Dios, minattrabahu nga awan mu nga kepasiranan nga fustu ya angngituttuldum kan ya kurug nga ergo. 16Arayyuan mu ya diddiskusion nga mari mepangngat kan y Afu Dios en awan da nga serbi, gafu ta ira yan ya kegafanan ya mas kanakanayun nga angngua ya totolay kan ya mari ikayat y Afu Dios. 17En mawwarak ya ergo ra kan ya dudduma nga megitta kan mallabbag nga pattag. Y Himeneo en y Fileto, dua ra kan ya nangngua ira kan yan. 18Linikuran da ya kurug, en kayakayan da nga nabalin ngin ya agginnolay, en megafu kan yan, darallan da ya angngurug ya dudduma. 19Ngam mari vulvua/pulus maguyu ya naladda nga fundasion nga pinadak y Afu Dios. Yaw ya neturak kan yan nga fundasion, en kuenta timbre na, "Ammu y Afu Dios nu di-innia ya totolay na," en, "Ya innia laman nga makkahi kan Afu na y Jesu Cristo, mawag kan panawan na ya narakat/napot." 20Kan ya unag ya dakal nga balay, hinnian vulawan en pirak nga pinggan en malukung ira, en hinnian pay kayu en pila nga pinggan en malukung ira. Hinnian me-usa ira kan espesial nga ukasion, en hinnian pay me-usa ira kan kagalgaw. 21Nu hinnian tolay nga mappakarenu kan iggina pe laman kan ngammin nga narakat, megitta iggina kan pinggan nga espesial ya ke-usan na. Nededika en me-usa iggina kan ya paki-afuan na en siggaparan nga mangngua kan hanna laman nga napia. 22Panawan mu ya narakat nga bisiu ira ya babbagitolay ira. Padakallan mu ira yaw nga kalidad kan ya attolem: kinatunung, angngurug, angngayat, en imamak kan ya akkikavulun mu kan ya maddasal ira kan y Afu nga narenu ya giffutuan da. 23Arayyuan mu ya linaloko nga dibate nga awan da nga serbi, gafu ta ammum mamba nga ira ya kegafanan ya aggurungut. 24Ya innia laman nga minasserbi kan y Afu Jesus, mawag kan mari na makiggungut, nu azzi nasimpat iggina kan ngammin nga totolay, napia nga mattuldu, mappasensia nu mapazapaziyat, 25en nasimpat nga mangorrihi kan ya manuriya ira kan iggina, aber laman nu ipamavulun y Afu Dios nga mabbabawi ra en mammuan da ya kurug, 26en mammapia ya appanapanonot da, en makatammang da kan ya silu ya diablo nga nanggafut kan ira, tase ipakapakua na kan ira ya uray na.

will be added

X\