2 Tesalonica 3

1Wawwahik ira, kan pangultimuan, kazzen ta idasadasal nu ikami tase mari mapemmang ya angngipalappat mi kan ya ergo y Afu Dios, en malawat nga madayaw kan kagitta ya nepangngalawat nu. 2Idasadasal nu pay ya kapalliad mi kan ya loko en narakat/napot nga totolay, gafu ta mari ngammin nga totolay, hinnian/asan angngurug da. 3Mapammakatalakkan y Afu. Iggina ya mamasikan kan ya ginnonotan nu en ya mangisiggalak/mangitakit kan ikayu kan y Satanas. 4Mammakatalak kami kan y Afu megafu kan ikayu gafu ta paddaggunan nu nga kuan ya kayan mi ira kan ikayu en isigisige nu nga kuan nattaruk. 5Pare zinan ta uffunan y Afu Dios ya ginnonotan nu, tase mammuan nu kan napia ya ayat na kan ikayu en tase pappasensian na kayu kan kagitta ya pasensia y Jesu Cristo. 6Sangaw, wawwahik ira, kan ya paka-awayya y Afu tera nga Jesu Cristo, imandu mi kan ikayu nga mari nu metadday kan ya innia laman nga wahi kan pangurug nga talakag en mari na vuluvulunan ya netuttuldu mi ira. 7Ammu nu mismu nga mawag kan parrian nu ikami, gafu ta mari mi talakag kattu hinnian kami kan ikayu. 8Awan nga kinnan mi nga mari mi pinagan nga naggafu kan ya innia laman, nu azzi, algaw en gabi, nabbannabannag kami nga kanakanayun nga nattrabahu, tase mari mi mamakadammat kan ya innia laman kan ikayu. 9Kiningngua mi ya kunna tian tase hinnian parrian nu, mari megafu ta awan nga paka-awayya mi nga makkiddaw nga pagan nu ya gasto mi ira. 10On, gafu ta, maski kattu hinnian kami kan ikayu, yaw ya nemandu mi, nu hinnian mammari nga mattrabahu, mari mapakan. 11Nakahi mi yan gafu ta nagina mi nga hinnian dudduma/karruan kan ikayu nga talakag, en mari ra vulvua/pulus mattrabahu, nu azzi moleran da ya kuan ya ikattolay ra. 12Kan ya paka-awayya y Afu Jesu Cristo, itaddan en imandu mi kan ira yan nga totolay nga mattrabahu ra pe laman nga sigga-alumamak, en tafulan da pe laman ya pakkatolay ra. 13Ngam ikayu, wawwahik ira, mari nu molang nga maka-angngua kan napia. 14Nu hinnian mari mamarulot kan ya bilin mi ira kan yaw nga turak, takkilalan nu iggina, en mari nu metadday kan iggina tase mappasiran. 15Mari nu ibilang iggina kan kontra nu, nu azzi tabarangngan nu iggina nga kuenta wahi nu. 16Pare zinan ta y Afu Dios nga paggafanan ya imamak, iddannan na ikayu kan imamak kan ngammin nga tiempo ira en kan ngammin nga situasion. Pare zinan ta hinnian y Afu kan ikayu ngammin. 17Yakan mismu ya nangiturak kan yaw, diot ku kan ikayu. Yaw ya pakasinnan nu kan kada turak ku nga yakan ya nappeturak. 18Pare zinan ta hinnian ya allak y Afu tera nga Jesu Cristo kan ikayu ngammin.

will be added

X\