2 Tesalonica 1

1Yakan, Pablo, y Silas en y Timoteo, diot mi kan ikayu nga maddian kan Tesalonica, ikayu nga iglesia y Afu Dios nga Ama tera en y Afu Jesu Cristo. 2Pare zinan ta y Dios Ama en y Afu Jesu Cristo, iddannan da ikayu kan allak en imamak. 3Wawwahik ira, mawag kan kanakanayun nga mappabalat kami kan y Afu Dios megafu kan ikayu. Mepangngat nga kuan mi yan gafu ta dumakadakal ya angngurug nu en ya akkara-aya-ayat ya kada isa kan ikayu. 4Gaggafen, ikayu ya pappeddarayaw mi kan ya iglesia ira y Afu Dios gafu ta massigisige kayu kan ya angngurug en appasapasensia nu kan ngammin nga katattazzi en kapazapaziyat nu nga ata-attamman nu. 5Ira yan, pamakurug nga natunung ya ammanunut y Afu Dios, en ya resulta na, mapabbalin kayu kan mepangngat nga mesipat kan ya pappatulan na nga kegafanan ya kapazapaziyat nu. 6Ata-attamman nu yan gafu ta mekuenta kan mepangngat ya ammazapaziyat y Afu Dios kannia angngibalat na kan ya mamazapaziyat ira kan ikayu, 7en mepangngat ya appemmang na kan ya kapazapaziyat nu, en kan ikami pay. Kuan na yan nattaruk nu manoli y Afu Jesus nga maggafu kan langit nga vulunan ya makapangngua nga anghel na ira kan afi nga gumatagatang. 8Kastigowan na nattaruk ya mari mangammu ira kan y Afu Dios en ya mari mamaraparulot ira kan ya napia nga dumug nga me-annung kan y Afu tera nga Jesus. 9Ya mesimmu kan ira, kan awan na nga panda, makastigo ra nga megungay kan ya atubang y Afu Dios en kan ya mekapakkapalat nga pakapangngua na. 10Mesimmu yan nattaruk nu manoli y Jesus nga dayarayawan ya totolay na, en mappabbaw ngammin ya mangurug ira kan iggina, en mesipat kayu gafu ta kinurug nu ya kinahi mi kan ikayu. 11Kanakanayun nga idasal mi nga pabbalinan na ikayu ya Dios tera kan mepangngat kannia nepangngakkul na kan ikayu, en megafu kan ya pakapangngua na, tumpalan na ya kada napia nga gakkad nu en ya kada kuan nu megafu kan ya angngurug nu. 12Gaggafen, medayarayaw ya ngahan y Afu tera nga Jesus megafu kan ikayu, en medayaw kayu pay megafu kan iggina segun kan ya allak ya Dios tera en y Afu Jesu Cristo.

will be added

X\