2 Pedro 3

1Ideddukan ku ira, yaw sangaw ya mekaddua ngin nga turak ku kan ikayu. Kan ira yaw nga dua nga turak ku, kuenta linukag ku ya narenu nga appanapanonot nu kannia angngiparandam ku kan ikayu kan ya dana ammu nun. 2Dandamman nu ya kinahi ya nasantuan nga profeta ira kattun nga dana nangipakammu kan ya mappanget nga mesimmu nga nesimmu ngin, en ya mandu ira pay y Jesus nga Afu en Mannavvut tera nga netuldu mi nga apostol ira kan ikayu. 3Unna kan ngammin, mawag kan mammuan nu nga, kan ya panguzzanan ira nga algaw, hinnian/asan nattaruk totolay nga, ya tafulan da, ya narakat/napot nga keluhan ya gibbaggian da. Manguyu-uyaw ra 4nga kunda, "Netabba y Jesus nga manoli iggina. Be tiaw ya dian na gafen? Nakkakatay ya ginafu tera iran, ngam aggalumismu bitu ngammin ya ganagannud nga awan da nga nangullian namegafu kattu nekaparatu ra." 5Ngam uru-uray ra nga kalippanan nga, megafu kan ya ergo y Afu Dios, naparatu ya langit en ya lusak nga naggafu kan danum en megafu kan danum. 6Danum balalaman ya nepanaral na kan ya lusak kan nay nga tiempo kattu zinivak/inaluman na. 7Ngam megafu mismu kan yan nga ergo y Afu Dios balalaman, ya langit en ya lusak nga hinnian kan sangaw, nereserba nga madaral kan afi, en mapannayun addet kan ya algaw nga ammanunut na en angngastigo na kan ya totolay nga awan nga attalaw ra kan iggina. 8Ideddukan ku ira, dandamman nu nga, kan y Afu Dios, megitta ya patangalgaw kan marivu kan dahun, en megitta ya marivu kan dahun kan patangalgaw. 9Mari bayahan y Afu Jesus ya annumpal na kan ya netabba na nga annoli na nga megitta kan ya pangabbattan ya dudduma/karruan nga totolay, nu azzi pasensian na kayu, gafu ta mari na ikayat nga hinnian mawawan, nu azzi ikayat na nga mabbabawi ngammin ya totolay kan ya liwaliwat da. 10Ya algaw nga annoli y Afu Jesus, gavvat nga lumabbet kan kagitta ya aggangay ya akkokot. Kan yan nattaruk nga algaw, mapawan ya langit nga konsu nagallu nga guni. Ya elemento ira, madaral kan ya nelot/nafulotan nga patu ya afi, en ya lusak en ya nakanakua kan ya utun na pay, masidug. 11Gafu ta madaral nattaruk ngammin ira yan nga ganagannud kan kunna tian, hanna gafen zinan ya katakatolay nu? Nasantuan en makadios zinan 12kannia attalattaron nu kan ya allabbet ya algaw y Afu Dios, en kanakanayun nga kuan nu ya panda mawayya nu tase mallian yan nga algaw nga lumabbet. Kan yan nga algaw, masidug ya langit en malunag, en ya elemento ira, madaral kan ya nelot nga patu ya afi. 13Ngam kabalin na ira yan nga mesissimmu, segun kan ya netabba na, innanaman tera nga hinnian bahu nga langit en bahu nga lusak, en maddian ya natunung ira kannay. 14Gaggafen, ideddukan ku ira, gafu ta talattaronan nu ya kesimmu na ira yan nga ganagannud, kanakanayun nga kuan nu ya panda mawayya nu tase madatangngan kayu nga awan nu nga mantia onu kapaliwatan, en sigga-imamak kayu. 15En ikuenta nu ya pasensia y Afu Dios nga yan ya tiansa ya totolay nga iddan na kan ira tase mapalliad da. Megitta kan yan pay ya neturak y Pablo nga medduk nga wahi tera kan pangurug kan ikayu segun kan ya sirib nga neddan y Afu Dios kan iggina. 16Kan ngammin nga neturak na, kinahi na ya me-annung kan ira yan nga ganagannud. Hinnian dudduma kan ira nay nga neturak na nga nararriat nga mantindian. Ira nay nga mari makakammu en mari naladda ya angngurug da, falso ya angngipakanawag da kan ira nay nga neturak na kan kagitta ya kukukuan da kan ya dudduma peba nga Sagrado nga Turak, en ira pe laman mismu ya kegafanan ya kadaral da nattaruk kan infiernu kan awan na nga panda. 17Ngam ikayu nga ideddukan ku, nammuan nun ira yan nga ganagannud kallie ya kesimmu ra. Mappalan/Memuhud kayu gafen, gafu ta narakat nu mapallikud kayu kan ya kurug megafu kan ya pakaliwatan ira nay nga totolay nga manuriya kan ya dorob, en mawawan nu ya tuyag ya angngurug nu. 18Mas peba pasikannan nu ya angngurug nu kan ya allak y Jesu Cristo nga Afu en Mannavvut tera, en ya pakakammu nu kan iggina. Pare zinan ta madayarayaw iggina kan sangaw en kan awan na nga panda. Amen!

will be added

X\