2 Pedro 1

1Yakan y Simon Pedro nga serbidor en apostol y Jesu Cristo. Natturak nak kan ikayu nga neddannan kan angngurug nga awan nga neruman ya balor na kan ya angngurug mi kan ya kinatunung y Jesu Cristo nga Dios en Mannavvut tera. 2Pare zinan ta dumakal ya allak en imamak nga meddan kan ikayu megafu kan ya pakakammu nu kan y Afu Dios en y Jesus nga Afu tera. 3Megafu kan ya nadiosan nga pakapangngua y Afu Dios, ngammin ya mawag tera, neddan na kan ittera tase mattolay tera kan nadiosan megafu kan ya pakakammu tera kan iggina nga nangakkul kan ittera megafu kan ya kedayaw na en ya pia na. 4Megafu kan ya kedayaw na en ya pia na, neddan na kan ittera ya nanginingina en mekapakkapalat nga tabba na ira, tase megafu kan ira yan, makatammang tera kan ya kadaral nga hinnian/asan kan ya mundo megafu kan ya narakat/napot nga akkelug ya baggi, en mesipat tera kan ya nadiosan nga kinatolay na. 5Gaggafen, kuan nu ya panda mawayya nu tase makua nu ngammin ira yaw. Iyamung nu kan ya angngurug nu ya napia nga katakatolay nu. Iyamung nu peba kan ya napia nga katakatolay nu ya pakakammu nu. 6Iyamung nu peba kan ya pakakammu nu ya angngifuwad nu kan ya narakat nga akkelug ya gibbaggian nu. Iyamung nu peba ya appasapasensia nu kan ya kapazapaziyat nu kan ya angngifuwad nu kan ya narakat nga akkelug ya gibbaggian nu. Iyamung nu peba ya attolay nu nga nadiosan kan ya appasapasensia nu kan ya kapazapaziyat nu. 7Iyamung nu peba ya angngayat nu kan ya wawwahi nu kan pangurug kan ya attolay nu nga nadiosan. Iyamung nu peba ya angngayat nu kan ngammin nga ikattolay nu ira kan ya angngayat nu kan ya wawwahi nu kan pangurug. 8Nu hinnian ira yaw nga kalidad kan ikayu, en nu dumakal da, pabbalinan da kan hinnian serbi en resulta ya kukukuan nu para kan y Afu tera nga Jesu Cristo kan ya pakakammu nu kan iggina. 9On, gafu ta, ya innia laman nga awan kan iggina ira yan nga kalidad, kuenta vulaw en daram iggina nga nalippanan na nga napakarennuan igginan kan ya liwaliwat na nga kinikkingngua na kattun. 10Gaggafen, wawwahik ira, mas kuan nu peba zinan ya panda mawayya nu nga mangisiguradu kan ya kapalliad nu nga yan ya napillian en nakkulan nu. On, gafu ta, nu kuan nu yan, mari nu vulvua/pulus mawawan kan ya angngurug nu. 11En yaw pay, bustante ya ammalawan y Afu Dios kan ya attallung nu nattaruk kan ya mannanayun nga pappatulan y Jesu Cristo nga Afu en Mannavvut tera. 12Gafu ta mawag kan kuan nu yan, kanakanayun nga siggaparan nak nga mangiparandam kan ikayu kan ngammin ira yan nga ganagannud, maski ammu nun en maski napasikan ya angngurug nun kan ya kurug nga inalawat nu. 13Kan ya nonot ku, basta matolay nak peba, mepangngat kan kuenta lukahan ta kayu kannia angngiparandam ku kan ikayu kan ira yan. 14Ammuk nga marik mabbayag ngin kan ya utun lusak, gafu ta nepakammu y Afu tera nga Jesu Cristo yan kan yakan. 15Gaggafen, kuan ku ya panda mawayyak tase kerandamman nu ira yan kan hanna laman nga tiempo kabalin ya ipappatek. 16Ya kinahi mi kan ikayu kattu nepakammu mi kan ikayu ya pakapangngua y Afu tera nga Jesu Cristo en ya annoli na nattaruk, mari naggafu kan paraparatu nga istoria, nu azzi nasingan mi mismu kan ya dua nga mata mi ya mekapakkapalat nga Kinadios na. 17Iniddannan y Dios Ama iggina kan kekakua en kedayaw na kattu kunna nga nakkahi ya ngaral nga naggafu kan ya nawag nga awan nga kegittan na, "Yaw ya ideddukan ku nga Anak ku nga kuru makapayayat kan yakan." 18En nagina mi mismu yan nga ngaral nga naggafu kan langit kattu hinnian kami kan iggina kan nay nga nasantuan nga bakulud. 19Nabbalin kan mas peba siguradu gafen ya hinnian kan ittera nga neturak ya profeta ira kattun. Pammakapianan nu nu ipintak nu kan ya ginnonotan nu yan nga neturak da nga megitta kan allamparan nga mangnawag kan kokopan/kallap nga lugar addet kan ya ammataruk en ya allattuad ya bittuan nga angngarannian kan albasu nga mangnawag kan ya ginnonotan nu. 20Unna kan ngammin, mawag kan mantindian nu nga awan nga neturak ya profeta ira kattun kan ya Sagrado nga Turak segun kan ya nantindian da pe laman kan ya nepakammu y Afu Dios kan ira. 21On, gafu ta awan nga neturak da nga naggafu kan ya uray tolay, nu azzi naggafu kan y Afu Dios ya kinahi ra nga negiya ya Espiritu Santo ira kan ya kinahi ra.

will be added

X\