2 Corinto 6

1Kannia akkipattrabahu mi kan y Afu Dios, ipakimallak mi kan ikayu nga isigisige nu nga parulotan iggina, tase mari mabbalin kan awan nga kuenta ya nepangngalawat nu kan ya allak na. 2On, gafu ta nepakammu na nga ikayat na kayu nga palliaran kattu nepeturak na yaw kattun, "Kannia mepangngat nga tiempo, ginina ta ka, en kannia mepangngat nga tiempo nga kapalliad ya totolay, inuffunan ta ka." Maggina kayu gafu ta yaw ngin ya kurug nga mepangngat nga tiempo nga angngalawat kan ya allak y Afu Dios; yaw ngin ya algaw nga kapalliad nu. 3Awan nga kuan mi nga kesikadulan ya innia laman, tase awan nga kapaliwatan mi kannia assesserbi mi kan y Afu Dios, 4nu azzi ipasingan mi nga kurug nga serbidor na ikami kan ngammin nga mesissimmu kan ikami en kukukuan mi, ikayat ku nga kayan, kannia aggatattam mi kan kapazapaziyat, kannia kapadapadammat mi, kannia katattazzi mi, 5kannia kalatalatigu mi, kannia kekarsel mi, kannia kagulugulu mi, kannia kanakanayun nga abbannabannag mi, kannia addeddesbelo mi en kannia kabisibisin mi megafu kan ya trabahu mi, 6kan ya renu ya katakatolay mi, kan ya pakakammu mi, kannia appasapasensia mi, kannia assissimpat mi, kannia akkipaddian ya Espiritu Santo kan ikami, kan ya napafutu nga ayat mi, 7kan ya kurug nga kayakayan mi, kan ya pakapangngua y Afu Dios, kan ya armas ya kinatunung nga iyusa mi nga pangatubang ya ziwanan nga gi-iman mi en panangga ya zimigi nga gi-iman mi, 8kannia kekakua mi en kannia kepasapasiran mi, kannia kaparaparakat mi en kannia ke-edayaw mi. Mekuenta kami kan minangngilloko, ngam kurug mamba ya kayakayan mi. 9Mekuenta kan awan nga makakammu kan ikami, ngam madumudumug kami. Kanakanayun nga atubangan mi ya ipappatay mi, ngam matolay kami peba. Makakkastigo kami, ngam mari mi mamba napatay. 10Mapakapakarandam kami, ngam kanakanayun nga mayayat kami. Pobre kami, ngam napakaru ya parrikuan mi kan na-espirituan nga ganagannud. Awan nga kukua mi, ngam kakurruan na, kukua mi ngammin. 11O, ikayu nga wawwahi mi kan pangurug nga maddian kan Corinto, neturak min kan ikayu ngammin ya hinnian kan ya kononaggan ya giffutuan mi. Vukat ya giffutuan mi kan ikayu. 12Mari bissang/bissut ya ayat mi kan ikayu, ngam bissang ya ayat nu kan ikami. 13Natturak nak kan ikayu nga kuenta kurug nga anak ku ira, palawan nu ya giffutuan nu kan ikami kan kagitta ya kalawa ya giffutuan mi kan ikayu. 14Mari nu metadday kan ya totolay nga mari mangurug kan y Afu Jesus nga kuenta megitta kayu kan ira. On, gafu ta, hanna ya paggittan ya kinatunung en ya kinadakkut? Hanna ya pavvulunan ya nawag en ya kokopan/kallap? 15Hanna ya pakka-anahutan y Cristo en y Belial? Hanna ya pakkataddayan ya innia laman nga mangurug en ya innia laman nga mari mangurug? 16Hanna ya pappakesan ya templo y Afu Dios en ya rebultu ira? On, gafu ta ittera ya templo ya siggamatolay nga Dios. On, gafu ta kunna mismu kan ya Sagrado nga Turak, "Makipaddian nak nattaruk kan ya totolek, en hinnian nak nattaruk kan ira. Yakan nattaruk ya Dios da, en ira pay nattaruk ya totolek." 17Kunna pay, " 'Panawan nu iran, en megungay kayun kan ira,' kunna y Afu Dios, 'en mari nu manukkal ngin kan hanna laman nga narakat/napot. Nu kuan nu yan, alawatan ta kayu, 18en mabbalin nak kan Ama nu en ikayu pay ya anak ku ira,' kunna y Afu Dios nga makapangngua."

will be added

X\