2 Corinto 5

1Ammu tera nga, nu matay ya gibbaggian tera nga alale tolda nga paddianan ya gikkaralluan tera kan ya utun lusak, hinnian/asan paddianan tera ira kan langit nga iddan y Afu Dios nga awan da nga panda nga kuenta balay nga mari pinanday ima tolay. 2En kurug nga kannia attolay tera peba kan yaw nga mundo, maddahadahin tera gafu ta iggalayan tera nga malawat ya nelangitan nga paddianan tera nga megitta kan bahu nga sinnun nga iguhu tera. 3En kannia kasinnun ya gikkaralluan tera kan bahu nga gibbaggian tera, mari tera masimmuan nga lawan. 4On, gafu ta, kannia kasan tera peba kan ira yaw nga gibbaggian nga alale tolda, maddahin tera gafu ta madaddammattan tera kan ziyariyat. Mari megafu ta ikayat tera nga mari masinnunan ya gikkaralluan tera, nu azzi gafu ta ikayat tera nga matallian ya nemundowan nga gibbaggian tera kan nelangitan nga gibbaggian tera nga kuenta gissinnunan tera, tase ya gibbaggian tera nga matay mamba, alale sillunan/tallannan ya angat. 5En y Afu Dios mismu ya nangiparan kan ittera kan yan, en neddan na kan ittera ya Espiritu Santo nga pamakurug na nga iddan na kan ittera ya netabba na. 6Gaggafen, kanakanayun nga nasikan ya ginnonotan tera, en ammu tera nga basta hinnian ya gikkaralluan tera kan ya gibbaggian tera kan ya utun lusak, awan tera kan ya dian y Afu Jesus. 7On, gafu ta mattolay tera kan angngurug, mari kan anningan. 8Nasikan ya ginnonotan tera, en mas ikayat tera peba nga panawan ya gikkaralluan tera ya gibbaggian tera, tase makipaddian tera kan y Afu Jesus kan langit. 9Gaggafen, yaw ya gakkad tera nga payayatan tera iggina maski hinnian ya gikkaralluan tera kan ya gibbaggian tera kan ya utun lusak onu kan langit. 10On, gafu ta mawag kan manadag tera ngammin kan ya atubang y Cristo tase panunutan na ittera, senannu alawatan ya kada tolay ya mepangngat nga balat na kan ya napia onu ya narakat/napot nga kinikkingngua na kannia kasan peba ya karallua na kan ya baggi na kan ya utun lusak. 11Gafu ta ammu mi ya mattalaw kan y Afu Dios, malak mi ya ginnonotan ya totolay. En ama-ammu na ya kurug nga katakatolay mi, en innanaman ku nga kunna tian pay ya pakakammu nu kan ikami. 12Mari mi mappeddarayaw manin kan ikayu, nu azzi neturak ku ira yan tase hinnian kegafanan ya angngidayaw nu kan ikami, senannu hinnian itabbag nu kan ya totolay nga mangilagalagaw kan ya kasinnan en sinadag da, imbes kan ya hinnian kan ya giffutuan da. 13Nu abbattan ya totolay kan mari napia ya appanapanonot mi, mesimmu yan para laman kan y Afu Dios. Nu abbattan da kan napia ya appanapanonot mi, mesimmu yan para laman kan ikayu. 14On, gafu ta ya ayat y Cristo ya manaddaddag kan ikami nga massesserbi kan iggina gafu ta nammuan mi nga natay iggina para kan ngammin nga totolay, en nebilang gafen y Afu Dios nga nesipat tera ngammin kan ya nepappatay na. 15En natay iggina para kan ngammin nga totolay tase ittera nga matolay, mari tera mattolay nga mappayayat kan ittera pe laman ngin, nu azzi mattolay tera zinan nga mappayayat kan iggina nga natay en nagginnolay para kan ittera. 16Gaggafen, namegafu kattu nammuan mi yan, awan ngin nga innan mi segun kan ya kasinnan en kekuentan na. Maski kunna tian ya nepanningan mi kan y Cristo kattun, mari mi kuan yan ngin kan sangaw. 17Gaggafen, ya innia laman nga metadday kan y Cristo, bahu igginan nga pinaratu. Ya dana nga katakatolay na, awan ngin kan iggina, gafu ta natalibahu ngin. 18Y Afu Dios ya nangngua kan ngammin ira yan, en pinabbalin na ittera kan kakkofun na megafu kan y Cristo, en sinunnak na kami nga massesserbi kan iggina kannia ammabbalin mi kan ya dudduma/karruan kan kakkofun na pay. 19Ikayat ku nga kayan, hinnian y Afu Dios kan y Cristo kattu katolay na peba nga mamabbalin kan ya totolay kan ya mundo kan kakkofun na. En mari na ibilang ngin kan mawag kan makastigo tera megafu kan ya liwaliwat tera, en ne-alawat na kan ikami ya ergo na nga mangipakammu nu annianna/kunnasi/manna ya akkikkofun tera kan iggina. 20Gaggafen, ikami ya mangibaggi/mangitadag kan y Cristo, en iyusa y Afu Dios ikami nga mamensi kan ya totolay. Ikami nga mangibaggi kan y Cristo, ipakimallak mi nga makikkofun kayu kan y Afu Dios. 21Y Cristo nga awan vulvua/pulus liwat na, ne-alit y Afu Dios kan iggina ya liwaliwat tera, tase me-alit ya kinatunung y Afu Dios kan ittera.

will be added

X\