2 Corinto 4

1Gafu ta neddan y Afu Dios kan ikami yaw nga assesserbi mi megafu kan ya allak na, mari makkafi ya ginnonotan mi. 2Ngam linikuran mi ngammin ngin ya mesussussuk en kappasiran ira nga kustumbre. En awan nga iloholohot mi, en mari mi ullian ya ergo y Afu Dios. Ngam ya angngipakapakammu mi kan ya kurug nga ergo na, yan ya kuenta angngikahi mi kan napia kami segun kan ya konsensia ya kada tolay kan ya paningan y Afu Dios. 3Maski natallabban ya napia nga dumug nga ipalapalappat mi, natallabban laman kan ya ginnonotan ya totolay nga mapatuvvu/mapatabbraw kan infiernu. 4Y Satanas nga dios kan yaw nga mundo, kuenta pinavvulaw na ya ginnonotan ya mari mangurug ira tase mari ra masingan ya nawag ya napia nga dumug nga me-annung kan ya kekapakkapalat y Cristo nga kasinnan y Afu Dios. 5Bakkan kan ikami pe laman ya ipalapalappat mi nu azzi y Jesu Cristo nga iggina ya Afu, en ikami ya massesserbi kan ikayu megafu kan iggina. 6Ya Dios nga kunna nga nakkahi, "Lumattuad ya nawag nga maggafu kan ya kokopan/kallap," iggina ya nanilag kan ya giffutuan tera, tase iddan na ya nawag nga pakakammu tera kan ya kekapakkapalat na nga masingan kan ya muyung/mukat y Cristo. 7Ngam yaw nga napia nga dumug nga kuenta na-espirituan nga kariku, nekatalak y Afu Dios kan ikami nga megitta ya gibbaggian mi kan pila nga napanday kan banga, tase mepasingan na nga iggina ya paggafanan ya mari magukugukud nga pakapangngua nga hinnian/asan kan ikami, bakkan kan ikami ya paggafanan na. 8Kanakanayun nga matattazzian kami, ngam mari sobra ya dandam mi; magulugulu ya ginnonotan mi, ngam mari mi mawawanan kan innanama; 9mapazapaziyat kami, ngam mari porrian y Afu Dios ikami; makanna kami nga mapatomba, ngam mari mi matay. 10Kanakanayun nga atubangan mi ya kapatay mi kan kagitta y Jesus, en attamman mi yan tase masingan nga mattolay iggina kan ya gibbaggian mi. 11Kannia attolay mi, kanakanayun nga kuenta me-alawat kami nga mapatay para kan iggina, tase masingan nga mattolay iggina kan ya gibbaggian mi nga matay mamba. 12Kanakanayun nga matantalaw kami nga mapatay, ngam ya resulta na, angat kan ikayu. 13Y David nga patul kattun, kunna kan ya Sagrado nga Turak, "Nangurug nak, gaggafen, nergo nak." Gafu ta megitta ya angngurug mi kan ya angngurug na, mangurug kami, gaggafen, mergo kami pay. 14Ammu mi nga, ya nappaginnolay kan y Afu Jesus, pagginnolayan na ittera pay kan kagitta na, en alakan na ikami en ikayu pay kan ya atubang na. 15En attamman mi ngammin ira yan nga ziyariyat mi para kan ikayu, tase, kannia aggaru ya totolay nga mapalliad megafu kan ya allak na, umara-aru ya appabalat tera kan iggina tase madayarayaw iggina. 16Gaggafen, mari vulvua/pulus makkafi ya ginnonotan mi. Maski massesenut nga makkafi ya nemundowan nga gibbaggian tera, kagalgaw nga mapatalibahu ya na-espirituan nga attolay tera. 17On, gafu ta, ira yaw nga azziyariyat mi nga ata-attamman mi nga nalampaw en manganannuan laman, kuenta makakeddan kan ikami kan mannanayun nga kedayaw nga mas dakal annek/ngam kan ira yan nga azziyariyat mi. 18On, gafu ta bakkan kan ya ganagannud nga masingan, nu azzi ya ganagannud nga na-espirituan nga mari masingan, ira ya agganonot mi, gafu ta manganannuan laman ya annayun ya ganagannud nga masingan, ngam ya ganagannud nga mari masingan, mannanayun da kan awan na nga panda.

will be added

X\