2 Corinto 3

1Abbattan nu kazze/pano kan mamegafu kami nga mappekakua kan ikayu? Awan. Onu abbattan nu kazze kan mawag mi ya turak ira nga mangiyam-ammu kan ikami kan ikayu, onu ya turak ira nga alakan mi zinan kan ikayu kan kagitta ya mawag ira nay nga totolay? Awan. 2Ikayu mismu ya turak nga neturak kan ya giffutuan mi, nga mammuan ngammin ya totolay, en mabibbid da. 3Nanawag nga kuenta turak y Cristo ikayu, en ikami ya natturak. Neturak yan, mari kan tinta nu azzi kan ya Espiritu y Afu Dios nga siggamatolay, en mari na kan dampet nga batu ya nangiturakan na nu azzi ya giffutuan ya totolay. 4Nakahik yan gafu ta hinnian/asan ammakatalak mi kan y Afu Dios megafu kan ya neketadday mi kan y Cristo. 5Bakkan kan ya gibbaggian mi mismu ya paggafanan ya abilidad mi nga mangngua kan ya trabahu mi nu azzi y Afu Dios laman, en awan nga makahi mi nga maggafu kan ikami pe laman. 6Iggina ya nangiddan kan ya abilidad mi nga massesserbi kan ya bahu nga taratu na. Mari neturak ya bahu nga taratu kan lettra nu azzi kan espiritu, gafu ta patay ya resulta ya dorob nga dana nga taratu na nga neturak kan lettra, ngam angat ya iddan ya espiritu. 7Ya dana nga taratu nga neturak kan lettra nga nekarrit y Afu Dios kan ya piesa nga batu, maski patay ya resulta na, kattu neddan na yan, nappasingan ya makatulang nga nawag na kannay, en nalit yan nga nawag kan ya muyung/mukat y Moises, en mari nadulangngan ya ginafu mi ira nga Israelita ya muyung na megafu kan yan nga nawag nga hinnian kannay. Mari nannayun yan nga nawag kannay. Ya nepassesserbi ya totolay kan y Afu Dios, segun kan nay nga taratu. 8Siguradu nga mas napia ya assesserbi tera kan y Afu Dios segun kan ya bahu nga taratu na nga trabahu ya Espiritu Santo. 9Nu mekapakkapalat ya dana nga taratu na nga kegafanan ya kakondena ya totolay, yammanno ya kekapakkapalat ya bahu nga taratu na nga kegafanan ya kekuenta ya totolay kan natunung. 10Yan nga dana nga taratu na, maski mekapakkapalat, kuenta nabbalin kan awan nga kekapakkapalat na megafu kan ya kekapakkapalat ya bahu nga taratu na nga mas annek/ngam kan ya kekapakkapalat ya dana nga taratu. 11On, gafu ta, nu mekapakkapalat ya dana nga taratu na nga mari nannayun, yammanno ya kekapakkapalat ya bahu nga taratu na nga mannanayun. 12Gafu ta kunna tian ya innanama mi, nagutuk/naturid/nataggad kami. 13Mari mi megitta kan y Moises nga nangikkua/nangippay kan tallab kan ya muyung na tase mari madulangngan ya Israelita ira ya nepagguribat ya nawag na nga mari nannayun. 14Ngam nataggat peba ya ginnonotan da. On, gafu ta, addet kan sangaw, hinnian peba nay nga tallab kan ya ginnonotan da kannia kebibbibbid ya dana nga taratu na kan ira. Mari peba nazza yan nga tallab kan ira gafu ta mazza yan laman kannia ketadday ra kan y Cristo. 15Maski addet kan sangaw nga algaw, kada mebibbid ya dorob y Moises kan ira, kuenta natallabban peba ya ginnonotan da. 16Ngam nu mabbira ya innia laman nga umang kan y Afu, mazza yan nga tallab. 17Ya Afu nga nakahi kan yaw nga lugar, iggina ya Espiritu Santo, en maski kanna be tiaw ya dian ya Espiritu Santo, mari nakohung ya totolay. 18En ittera ngammin, awan ngin nga tallab kan ya gimmuyungan tera kannia anningan tera kan ya kekapakkapalat y Afu Jesus, en matalibahu tera nga massesenut nga mabbalin kan megitta kan iggina nga mangalawat kan ya kekapakkapalat na, gafu ta maggafu yan kan y Afu Jesus, ikayat ku nga kayan, ya Espiritu Santo.

will be added

X\