2 Corinto 12

1Fersadu nga mappeddarayaw nak peba maski awan nga iddan na nga napia. Kayan ku sangaw ya nepasingan en ya nepakammu y Afu Jesus kan yakan. 2Hinnian/Asan tolay nga ammuk nga kua y Cristo, nga nadukkam nga ne-angay kan ya mekatallu nga langit nga paddianan y Afu Dios kattu mekamafulu se appat nga rahun ngin nga nappasa. Marik ammu nu siggabaggi iggina nga ne-angay onu awan; y Afu Dios ya makakammu. 3Itolik nga kayan nga hinnian tolay nga ammuk, marik ammu nu siggabaggi iggina nga ne-angay onu awan; y Afu Dios ya makakammu, 4nadukkam iggina nga ne-angay kan Paraiso, en nakagina iggina kan ergo ira nga mari makahi kan ergo tolay en mari mepamavulun nga vuyatan tolay. 5Idayok iggina gafen, ngam marik idayaw yakan pe laman, fera laman ya ganagannud nga mangipasingan kan ya pakkafiyan ku. 6Maski ikayat ku ya mappeddarayaw, marik mekuenta kan kurang ya appanapanonot ku gafu ta kurug ya kayan ku. Ngam marik mappeddarayaw tase awan nga tolay nga mas mangiyatanang kan yakan annek/ngam kan ya masingan na en magina na kan yakan. 7Ngam mari napia nu mattapaw ya ke-atanang ya nonot ku megafu kan ya mekapakkapalat nga ganagannud nga nepakammu y Afu Dios kan yakan. Nepamavulun na gafen nga hinnian mamazapaziyat kan yakan nga arig asit kan ya baggik nga anghel y Satanas, tase patapatakitan nak, senannu mari mattapaw ya ke-atanang ya nonot ku. 8Namilu nga nepakimallak ku kan y Afu Jesus nga azzan na yaw kan yakan, 9ngam kunna nga nakkahi kan yakan, "Makalannat ngin ya allak ku kan ikaw, gafu ta awan nga pakkurangan ya pakapangnguak kan ya pakkafiyan ya tolay." Mas gafen ya payayat ku nga mappeddarayaw kan ya pakkafiyan ku, tase maddian ya pakapangngua y Cristo kan yakan. 10Megafu kan yan, kontento nak kan ya pakkafiyan ku ira, ya ka-uyu-uyok, ya azziyariyat ku, ya katattazzik, en ya makatantalaw ira nga mesissimmu kan yakan megafu laman kan y Cristo, gafu ta, nu nakafi nak, mapasikan nak megafu kan ya pakapangngua na. 11Kurang ya appanapanonot ku, ngam finersa rak nga nabbalin kan kunna tiaw, gafu ta ikayu zinan ya mepangngat nga nangidayaw kan yakan, gafu ta maski awan nga serbik nga tolay, marik nagukugukab annek/ngam kan ira yan nga makkahi kan malallaki ra nga apostol. 12Kattu hinnian nak kan ya dian nu, nappasapasensia nak nga naka-angngua kan pamakurug ku nga apostol nak, ira yan, milagro ira, mekapakkapalat ira en sennial ira nga nangipasingan kan ya pakapangngua y Afu Dios. 13Hanna ya negukaban nu kan ya dudduma/karruan nga iglesia ira y Cristo? Awan, fera laman yaw, marik nabbalin kan mamakadammat kan ikayu. Kazzen ta pakoman dak kan yan nga liwat ku kan ikayu. 14Yaw ya mekatallu ngin nga aggannukat ku nga umang mabbisita kan ikayu, en marik makkiddaw kan ikayu kan ya pakkatolek, gafu ta, ya pammakapianan nu, yan ya iggalayan ku kan ikayu, bakkan kan ya kukua nu. Ya mepangngat, ya manak ira ya manebi kan ya gi-anakan da; mari mepangngat nga ya anak ira ya manebi kan ya gimmanakan da. 15Nelot/Nafulotan ya payayat ku nga mangiddan kan ya hanna laman nga kukuak para kan ikayu, en awayya na kan yakan nu iddan ku peba ya angat ku para kan ya gikkaralluan nu. Nu dumakal ya ayat ku kan ikayu, gumissang/gumissut kazze/pano ya ayat nu kan yakan? 16Nanawag gafen ngin nga awan nga pakkatolek nga nalawat ku derettio kan ikayu. Ngam hinnian totolay nga makkahi kan minangngilloko nak, en inaprobettia ta kayu kannia nepangngilohot ku kanu kan ikayu. 17Nepa-aprobettia ta kayu kazze kan ya innia laman nga binon ku kan ikayu? 18Nepakimallak ku kan y Tito nga umang iggina kan ikayu, en hinnian wahi tera kan pangurug nga pinevulun ku kan iggina. Inaprobettia na kayu kazze y Tito? Mari kazze naggitta ya nonot en ya katakatolay mi nga dua? 19Maffugab, abbattan nu nga, kan ira yan nga bahu neturak mi, defensan mi ikami pe laman kan ya paratubangan nu. Awan. Ngam kan ya paningan y Afu Dios, ikami nga netadday kan y Cristo, kinahi mi ngammin ira yan para kan ya pammakapianan nu, medduk nga wawwahik ira. 20Mavurung nak gafu ta maffugab, so nu lumabbet nak kannian, madatangngan ku nga tanakkuan kayu kan ya ikayat ku, en masingan nu nga tanakkuan nak kan ya ikayat nu. Ya ikayat ku nga kayan, maffugab, madatangngan ta kayu nga maggurungut, mapparassil, makkaralullussaw, makkarasassamsam/makkarahagum, makkaraparaparakat, makkaratyittyismis, makkarapangapangas en maggulugulu. 21Mavurung nak gafu ta maffugab, so nu uli makakaddet nak kan ikayu, iyalinak nak ya Dios ku kan ya atubang nu, gafu ta mafersa nak nga mattangit megafu kan ya aru nga nalliwat kattun nga mari nabbabawi kan ya kinadakkut da, kan ya nepammabay en nepakkilalaki ra, en kan ya nepannaful da kan ya ikayat ya gibbaggian da pe laman.

will be added

X\