1 Pare zinan ta pasensian dak kan ya mediu kurang nga appanonot ku. Kazzen ta pasensian dak. 2 Ayatan ta kayu kan kagitta ya angngayat y Afu Dios, gafu ta arig isa kayu nga kurug nga birhen nga netaratuk nga makikasal kan ya isa nga lalaki, iggina y Cristo. 3 Mavurung nak gafu ta maffugab maparayyu ya ginnonotan nu kan ya puro en kurug nga ayat nu kan y Cristo nga megitta kan ya nepangngilohot ya ziriyan kan y Eva megafu kan ya sirib na pe laman. 4 Neturak ku yan gafu ta, nu hinnian/asan umang mangipalapalappat kan ikayu kan tanakkuan nga me-annung kan y Jesus annek/ngam kan ya nepalapalappat mi, onu nu makalawat kayu kan espiritu nga tanakkuan kan ya Espiritu Santo nga nalawat nun, onu nu mangalawat kayu kan napia nga dumug nga tanakkuan kan ya inalawat nun, nalohon kayu balattan nga mabensi kan yan. 5 Kan ya pangabbattan ku, mari alinak ya sinadag ku annek kan ira yan nga makkahi kan malallaki ra nga apostol maski bissang/bissut laman. 6 Maski marik malalaki nga mergo, marik makkurang kan pakakammu, en nepakanawag mi yan kan ikayu kan kada kiningngua mi kan ngammin nga ganagannud. 7 Marik vulvua/pulus nakitandan kannia nepangngipalapalappat ku kan ikayu kan ya napia nga dumug y Afu Dios. Nappakalinak nak tase me-atanang kayu. Abbattan nu kazze/pano kan nakaliwat nak kattu kiningnguak yan? 8 Ya dudduma/karruan nga iglesia ira y Cristo, iniddannan dak kan pakkatolek nga kuenta kinokotan ku ira, en kiningngua ra yan tase sesserbian ta kayu nga awan nga tandan ku. 9 Kattu hinnian nak kan ya dian nu, nu hinnian mawag ku, marik vulvua nakkiddaw kan ikayu kan uffun, gafu ta, ya wawwahi tera kan pangurug nga naggafu kan ya iglesia ira kan ya probinsia ya Macedonia, hinnian neddan da para kan ya pakkatolek. Kan ngammin nga kinikkingnguak, marik vulvua nakkiddaw kan ikayu kan uffun, en isigisigek nga kuan yan. 10 Kurug ya kayan y Cristo nga hinnian kan yakan, en kurug gafen pay yaw nga kayan ku nga me-annung kan ya kuan ku nga awan nga makegamma kan ya angngidayok kan ya interu probinsia nu nga Acaya kan yan nga kukukuan ku. 11 Ka-am ta kuan ku ya kunna tian? Abbattan nu kazze kan kuan ku yan gafu ta mari ta kayu ayatan? Awan! Ammu y Afu Dios nga kuru ayatan ta kayu. 12 En yan nga kukukuan ku, isigisigek nga kuan, tase mapemmang ku ya oportunidad ira nay nga totolay nga manaful kan oportunidad da nga makkahi kan megitta ya attrabahu ra kan ya attrabahu mi kan ya ganagannud nga idayaw ra. 13 Ira yan nga totolay, mari ra mamba kurug nga apostol; mangiloholohot da nga me-annung kan ya trabahu ra; ipasapasingan da nga apostol y Cristo ira, ngam mari ra mamba kurug nga apostol na. 14 Mari mekapabbaw yan, gafu ta maski y Satanas mismu, pabbalinan na ya kasinnan na kan kagitta ya kasinnan ya isa nga anghel nawag. 15 Mari gafen mekapabbaw nu pabbalinan pay ya serbidor na ira ya kasinnan da kan kagitta ya kasinnan ya serbidor kinatunung. Kan ya panguzzanan, mesimmu kan ira nattaruk ya mepangngat kan ya kinikkingngua ra. 16 Itolik nga kayan nga awan zinan mangabbat kan kurang ya appanapanonot ku. Ngam nu yan ya pangabbattan nu, kazzen ta pasensian dak gafen nga kuenta kurang ya appanapanonot ku, tase awayyak pay nga mappeddarayaw kan bissang. 17 Ya kayan ku sangaw, mari segun kan ya uray y Afu Jesus, nu azzi kuenta kurang ya appanonot ku kan yaw nga gutuk/turid/taggad ku nga mappeddarayaw. 18 Gafu ta aru mamba ya mappeddarayaw kan ya nemundowan nga ganagannud, mappeddarayaw nak pay. 19 Megafu kan ya sirib nu mismu, hinnian payayat nu nga mappasensia kan ya innia laman nga kurang ya appanapanonot na. 20 On, gafu ta pasensian nu mamba nu hinnian mangohung kan ikayu, onu mangalak kan ya pakkatolay nu, onu mangaprobettia kan ikayu, onu mappakatanang, onu mallappag kan ya gimmuyungan/gimmukatan nu. 21 Ngam pappasiranan nak ya akkahik kan yaw nga mari mi makua ya megitta kan kunna tian megafu kan ya kafi mi. Ngam ya hanna laman nga itaggat ya innia laman nga ipadayaw na, yakan pay, itaggat ku nga ipadayaw yan, nga mergo nak nga arig kurang ya appanapanonot ku. 22 Ipadayaw ra nga Hebreo ra. Hebreo nak mamba pay. Ipadayaw ra nga Israelita ra. Israelita nak mamba pay. Ipadayaw ra nga gakagaka y Abraham ira. Isa nak mamba pay kan ya gakagaka na. 23 Ipadayaw ra nga serbidor y Cristo ira. Kuenta kurang ya appanapanonot ku nga mappeddarayaw kan kunna tiaw, ngam mas napia nak nga serbidor na annek kan ira. Mas naming aru ya nepabbannabannag ku annek kan ira; mas naming aru ya nekekakkarsel ku; mas naming aru ya nekalatalatiguk; mas naming aru ya nepappeligro ya angat ku. 24 Ya Judio ira, namil lima nga linatiguan dak kan taggitallufulu se siam; 25 namilu nga napalapaluk nak; missa nga nabatabatuan nak; namilu nga nadaral ya dakadakal nga barangay nga nattakayan ku, en missa kan patangalgaw en paddamblag nga ne-ana-anud nak kan ya bebay. 26 Minang nak kan aru nga lugar. Naming aru nga nappeligro nak kannia kasan ku kan ya kayan/wangag ira, kan ya tulisan ira, kannia kasan ku kan ya kagittak nga Judio ira, kannia kasan ku kan ya mari Judio ira, kannia kasan ku kan ya siudad ira, kannia kasan ku kan ya katayawan tolay, kannia kasan ku kan ya bebay, en kannia kasan ku kan ya appen/agin wawwahi tera kan pangurug. 27 Nattalattrabahu en nabbannabannag nak. Naming aru nga marik nakkaturug; naming aru nga nabisibisin en na-awwaw nak; naming aru nga awan nga kanan ku, en naming aru nga nalammalamminan nak en kurang ya sinnun ku. 28 Mari na kan ira yan laman; kagalgaw agganonot ku ngammin ya iglesia ira y Cristo nga makapadammat kan ya nonot ku. 29 Nu hinnian makkafi ya angngurug na, makipattenap nak pay kan ya kafi na; nu hinnian nalliwat, nelot/nafulotan ya dandam ku. 30 Nu mafersa nak nga mappeddarayaw, ipadayok ya ganagannud nga mangipasingan kan ya pakkafiyan ku. 31 Ya Dios nga Ama y Afu Jesus, iggina ya madayarayaw kan awan na nga panda, ammu na nga marik malladdaladdud/mabbusubusid. 32 Kattu hinnian nak kan ya siudad ya Damasco, ya gubernador nga hinnian kan ya paka-awayya y Patul Aretas, nepaguardia na ya trangka ira ya siudad ya Damasco tase gafutan dak. 33 Ngam nelawan dak kan ya isa nga benta kan ya pader, nekkua/neppay rak kan natalapid nga lubid nga kuribut, en zinittag dak en nakatammang nak kan ya paka-awayya ya gubernador.
