1 Timoteo 6

1Ya innia laman nga kohung, mawag kan ikuenta na nga mepangngat kan ikakua na ya paki-afuan na kan kompleto, tase mari maparaparakat ya ngahan y Afu Dios en ya tuldu na. 2Ya kohung ira nga mangurug pay ya paki-afuan da ira, mawag kan mari mabbalin ya awwahi ra kan pangurug kan kegafanan ya angngimenos da kan ya paki-afuan da ira, nu azzi mawag kan mas napia ya assesserbi ra gafu ta, ya totolay nga uffunan da kannia assesserbi ra, wawwahi ra kan pangurug nga ayatan da. Ituttuldum en itabatabarang mu ira yan nga bahu neturak ku. 3Nu hinnian/asan mangituttuldu kan tanakkuan nga tuldu, en mari na vuluvulunan ya kurug nga ergo ira y Jesu Cristo nga Afu tera en ya tuldu nga me-annung kan ya kurug nga relihion, 4mapparayag iggina. Awan na nga mantindian. Ikakayat na ya makitutturiya en makididdiskusion kan me-annung kan ergo ira nga kegafanan appassil, aggurungut, ammaraparakat, narakat/napot nga angngabbat, 5en kanakanayun nga akkaratabbatabbag ya totolay nga narakat ya appanapanonot da, en alale nakokotan da kan ya kurug, en abbattan da kan hinnian ganansia ra megafu kan ya relihion da. 6Hinnian dakal nga pammakapianan ya innia laman kan ya relihion na nu kontento iggina. 7On, gafu ta awan nga nevulun tera kattu ne-anak tera kan ya utun lusak, en awan tera nga ivulun nattaruk nu matay tera. 8Basta hinnian kanan en sinnun tera, kontento tera zinan ngin kan ira yan. 9Ngam ya mayat ira nga marriku, matanag/makabok da kan tentasion, kan silu en kan aru nga narakat nga angngayat kan linaloko nga makadaral kan ira, en mamalammad kan ira kan kadaral en kawawan. 10On, gafu ta, ya angngayat kan kuartu, kegafanan ngammin ya klase narakat ira, en megafu kan ya angngayat ya dudduma/karruan kan kuartu, linikuran da ya angngurug da kan y Cristo, en alale sinubutubak da ya giffutuan da pe laman kan aru nga dandam. 11Ngam ikaw nga tolay y Afu Dios, ibitam ngammin ira yan, en masigura ka nga mattolay kan natunung, makadios, nasimpat, en hinnian angngurug en ayat mu, en matattam ka kan ziyat. 12Kagitta atleta, kuan mu ya panda mawayyam nga massesserbi kan y Afu Dios kan ya kurug nga tuldu nga kurruan tera. Kangkamman mu ya angat nga awan na nga panda nga nakkulan mu, en nepakammum ya angngurug mu nga y Jesus, iggina ya Cristo. en nepakammum yan kan ya paratubangan ya aru nga maggina. 13Kan ya paningan y Afu Dios nga manolay kan ngammin, en kan ya paningan y Jesu Cristo nga nangikahi kan ya atubang y Poncio Pilato nga iggina pe laman ya Cristo, imanduk kan ikaw 14kan paraparulotan mu ya dorob y Afu Dios nga awan mu nga mantia onu kapaliwatan addet kan ya annoli y Jesu Cristo nga Afu tera 15nga ipesimmu na nattaruk kan ya mepangngat nga algaw y Afu Dios nga madayarayaw en isissa laman nga Mammoray, Patul ya papatul ira, en Afu ya afa-afu ira. 16Iggina laman ya mari matay en maddian kan nawag nga mari awayya marannian. Awan vulvua/pulus tolay nga nakasingan kan iggina onu maka-awayya nga maningan kan iggina. Pare zinan ta mannanayun ya kedayarayaw na en ya pakapangngua na kan awan na nga panda. Amen. 17Ya ririku nga nemundowan ya kariku ra, imandum kan ira nga mari ra pappangas onu pattaggat ya kinariku ra nga nalohon nga mapawan mamba, nu azzi y Afu Dios zinan laman ya pammakatalakkan da nga aggavukat ya palad na nga mangiddan kan ngammin nga makapayayat kan ittera. 18Imandum pay kan ira nga maka-angngua ra kan napia, en pakarruan da ya napia nga kukukuan da nga ira yan ya mebilang kan kariku ra, en kan pakarruan da ya iddan da, en mangibillay ra. 19Kannia kanakanayun nga angngua ra kan ira yan, alale arimanan da ya kariku ra kan langit nga mebilang kan napia nga angngiparan da kan ya mappanget, tase kangkamman da ya kurug nga napia nga attolay. 20Timoteo, immuhuran mu ya ergo y Afu Dios nga nekatalak kan ikaw, en ibitam ya ergo nga mari mepangngat kan y Afu Dios en ya akkitturiya ya totolay nga mangabbat kan hinnian ammu ra, ngam awan mamba. 21On, gafu ta hinnian dudduma nga makkahi kan hinnian yan nga pakakammu kan ira, ngam pinanawan da mamba ya kurug nga kurruan tera. Pare zinan ta hinnian kan ikayu ya allak y Afu Dios.

will be added

X\