1 Timoteo 1

1Yakan y Pablo nga apostol y Jesu Cristo megafu kan ya mandu y Afu Dios nga Minammalliad kan ittera en y Jesu Cristo nga innanama tera. 2Natturak nak kan ikaw, Timoteo, nga ibilang ku kan kurug nga anak ku kan pangurug. Y Afu Dios nga Ama tera en y Jesu Cristo nga Afu tera, pare zinan ta iddannan da ka kan allak, idduk en imamak kan ya nonot mu. 3Kattu hinnian/asan nak kan ya siudad ya Efeso en mappanget nak nga umang kan ya probinsia ya Macedonia, kinahik kan ikaw nga mattalan/mabbattang ka kannian, en kayan ku kan ikaw kan sangaw nga isigem ya addian mu kannian, gafu ta hinnian dudduma/karruan kannian nga mangituldu kan tanakkuan kan ya kurug nga ituttuldu ta, en mawag kan imandum kan ira nga immangan da yan, 4en mari ra panapanonotan ya paraparatu nga istoria ira en ya ananaddu nga lista ira ya natturunud nga ginafu ira. Ira yan ya kegafanan ya addiriskusion imbes kan panguffun kan ya totolay kannia ammaraparulot da kan ya uray y Afu Dios megafu kan ya angngurug da. 5Ya serbi ya kinahik kan ikaw, padakallan na ya akkara-aya-ayat ya mangurug ira nga maggafu kan narenu nga futu, kan napia nga nonot, en kan angngurug nga napafutu. 6Hinnian dudduma kannian nga nallikud kan ira yan nga napia, en ne-awawan da kan ya addiriskusion nga awan na nga serbi. 7Ikayat da ya mabbalin kan mestru ira kan ya dorob y Afu Dios, ngam mari ra mamba mantindian ya kayakayan da onu ya kakkapan da nga itadag. 8Ammu tera nga napia ya dorob nu fustu ya ke-usa na. 9Ngam ammu tera pay nga neddan ya dorob, mari para kan ya natunung nga totolay nu azzi para kan ya mari mamaraparulot ira kan ya dorob en turiyadu ira, para kan ya mari mangikakua kan y Afu Dios en minalliwat ira, para kan ya manispresio en mammari ira kan ya sagrado nga ganagannud, para kan ya mamatay ira kan ya gi-aman onu gi-inan da onu kan ya innia laman, 10para kan ya maddallaw ira, para kan ya lallaki nga makirelasion kan ya kagitta ra nga lallaki en ya babbay nga makirelasion kan ya kagitta ra nga babbay, para kan ya massibrung ira kan tolay, para kan ya minalladdaladdud/minabbusubusid ira, para kan ya mangihuramento ira kan laddud, en para kan ya maka-angngua ira kan maski hanna peba nga kontra kan ya kurug nga tuldu. 11Nammuan nga narakat/napot ira yan segun kan ya mekapakkapalat nga napia nga dumug nga nekatalak kan yakan ya Dios nga madayarayaw. 12Mappabalat nak kan y Jesu Cristo nga Afu tera nga nangiddan kan yakan kan pakapangngua gafu ta nebilang nak kan mapammakatalakkan kannia nepannunnak na kan yakan nga masserbi kan iggina, 13maski peba nergo nak kattun kan mekontra kan iggina, en sinattazzian ku en pinazapaziyat ku ya mangurug ira kan iggina. Ngam maski kunna tian peba ya kinikkingnguak kattun, nekallak nak gafu ta marik peba ammu nga narakat ira yan, gafu ta marik peba nangurug kan iggina. 14Massosobra ya allak y Afu tera kan yakan en ya angngurug en ya ayat nga hinnian kan y Jesu Cristo pay. 15Makurug yaw nga akkayanan en mepangngat ya kalawat na kan awan na nga babang, iggina yaw: "Minang y Jesu Cristo kan ya utun lusak tase palliaran na ya minalliwat ira." Yakan ya karakattan kan ngammin nga minalliwat ira kattun. 16Ngam yaw ya gafu na kan nekallak nak nga karakattan, tase awayya y Jesu Cristo nga ipakammu ya interu nga appasensia na nga awan na nga panda nga yakan ya ehemplo kan ya mappanget ira nga mangurug kan iggina senannu meddannan da kan angat nga awan na nga panda. 17Mekakua en madayarayaw kan awan na nga panda ya Patul nga mannanayun nga mari matay, mari masingan, en isissa nga Afu Dios. Amen. 18Timoteo nga ibilang ku kan anak ku, ikargok kan ikaw yaw nga bilin nga sesserbian mu y Afu Dios kan napia segun kan ya dana nepakapakahi ya Espiritu Santo kattun kan me-annung kan ikaw nga mapasikan ya nonot mu megafu kan ira yan. 19Tadaggan mu ya angngurug mu en ya narenu nga konsensiam. Hinnian dudduma nga mari namulun kan ya gikkonsensian da pe laman, en nadaral lahud ya angngurug dan. 20Kunna tian ya nesimmu kan y Himeneo en y Alejandro, en yan ya gafu na kan ne-alawat ku ira kan ya pakapangngua y Satanas, tase mammuan da nga mari ran mergo kan mekontra kan y Afu Dios.

will be added

X\