1 Wawwahik ira, mari mawag ngin kan hinnian/asan meturak kan ikayu nga me-annung kan ya tiempo en algaw nga kesimmu ira yan nga bahu neturak ku. 2 On, gafu ta ammu nu mismu kan siguradu nga lumabbet nattaruk ya algaw nga annoli y Afu Jesus kan kagitta ya aggangay ya isa nga akkokot kan gabi. 3 Nu kunda ya totolay nga makkahi, "Hinnian imamak tera, en awan nga metalaw," kan nay nga tiempo, gavvat nga lumabbet ya narakat/napot nga mesimmu kan ira kan kagitta ya gavvat nga attuliwan/appasikal ya isa nga babay nga manak, en mari ra awayya nga malissian yan. 4 Ngam ikayu, wawwahik ira, awan kayun kan ya kokopan/kallap. Nattaruk nu lumabbet yan nga algaw, mari nu malannatan kan kagitta ya kalannat ya tolay kan ya akkokot. 5 On, gafu ta ikayu ngammin, hinnian kayun kan ya nawag en ya algaw. Awan teran kan ya gabi onu kan ya kokopan. 6 Gaggafen, mawag kan mari tera makkalakkaturug kan kagitta ya kukukuan ya dudduma/karruan, nu azzi aggalukag en malerto tera zinan. 7 On, gafu ta gabi ya gagangay nga akkaturug ya makkaturug ira, en gabi ya gagangay nga aggillaw ya aggillellaw ira. 8 Ngam gafu ta hinnian teran kan ya algaw, malerto tera. Sangaw, ya angngurug en ayat tera, tangngallan da ya giffutuan tera kan kagitta kalatag ya tagang, en ya agginnanama tera kan ya kapalliad tera, tangngallan na ya ginnonotan tera kan kagitta helmet. 9 On, gafu ta pinili y Afu Dios ittera, mari tase pasan tera ya gazzit na, nu azzi tase mapalliad tera megafu kan y Afu tera nga Jesu Cristo. 10 Natay iggina para kan ittera, tase makipattolay tera kan iggina nattaruk nu manoli iggina, maski siggamatolay tera peba onu natay teran. 11 Gaggafen, makkarapasapasikan kayu kan ya ginnonotan nu, en massige kayu nga makkara-uffu-uffun kan kagitta ya paddaggunan nu nga kuan. 12 Sangaw, wawwahik ira, ipakimallak mi kan ikayu nga mammakakua kayu kan ya totolay nga napafutu ya attrabahu ra nga mangipangulu en mattabarang kan ikayu kan ya attolay nu kannia neketadday nu kan y Afu Jesus. 13 En ikakua nu ira nga hinnian ayat nu kan ira megafu kan ya trabahu ra. Napia zinan ya akkaravulun nu. 14 Wawwahik ira, ipakimallak mi kan ikayu nga tabarangngan nu ya talakag ira, pasikannan nu ya totolay nga nakafi ya ginnonotan da, uffunan nu ya totolay nga nakafi ya gi-angnguruhan da, en mappasapasensia kayu kan ngammin. 15 Memmuhud kayu nga mari nu mabbalat kan narakat kan ya innia laman nga mangngua kan narakat kan ikayu, nu azzi kanakanayun nga massissimpat kayu kan ya kada isa kan ikayu en kan ngammin nga tanakkuan. 16 Kanakanayun nga siggapayayat kayu. 17 Kanakanayun nga maddasal kayu. 18 Kan hanna laman nga situasion nu, mappabalat kayu, gafu ta yan ya uray y Afu Dios kan ikayu kannia neketadday nu kan y Jesu Cristo. 19 Mari nu fuwaddan ya attrabahu ya Espiritu Santo. 20 Mari nu kayan kan awan nga kuenta ya appakahi ya Espiritu Santo, 21 nu azzi purban nu ngammin ya kayan da nu napia. Kanakanayun nga vulunan nu ya napia, 22 ngam arayyuan nu ya hanna laman nga narakat. 23 Y Afu Dios mismu nga mangiddan kan ya imamak tera, pare zinan ta pabbalinan na ikayu kan kompleto nga nasantuan. Pare zinan ta tangngallan na ya gi-espirituan nu, ya gikkaralluan nu, en ya gibbaggian nu, tase awan nga pakkurangan onu kapaliwatan nu nattaruk kannia annoli y Afu tera nga Jesu Cristo. 24 Y Afu Dios nga nangakkul kan ikayu, mapammakatalakkan nga kuan na ira yan. 25 Wawwahik ira, kazzen ta isigisige nu nga idasal ikami. 26 Diotan nu ngammin ya wawwahi nu ira kan pangurug kan nasantuan nga amma. 27 Ipakimallak ku kan ikayu kan ya ngahan y Afu nga ibibbid nu yaw nga turak kan ngammin nga wawwahi tera ira kan pangurug. 28 Pare zinan ta hinnian kan ikayu ya allak y Afu tera nga Jesu Cristo.
