1 Tesalonica 4

1Wawwahik ira, nagilammu nu kattun kan ikami nga mawag kan napia ya attolay nu nga makapagustu kan y Afu Dios. Kakurruan na, maddaggun nga mattolay kayu kan kunna tian, en sangaw, kan ya ngahan y Afu Jesus, ikiddaw mi en bensian mi ikayu nga mas kuan nu ya kunna tian. 2On, gafu ta ammu nu mamba ya netuttuldu mi kan ikayu kan ya paka-awayya y Afu Jesus. 3On, gafu ta yaw ya uray y Afu Dios, mattolay kayu kan nasantuan. Ya ikayat ku nga kayan, mari nu mamabay onu makilalaki. 4Mawag kan gilammuan ya kada isa kan ikayu ya annangngal na kan ya baggi na pe laman kan nasantuan en madayaw, 5en mari na tafulan ya akkelug na nga mamabay onu makilalaki kan kagitta ya kustumbre ya pagano ira nga mari makakammu kan y Afu Dios, 6en mari nu malliwat onu mangilloko kan wahi nu kan pangurug kan yaw nga gannud, gafu ta kastigowan y Afu Dios ngammin ya malliwat ira kan kunna tian, en dana kinahi mi yan nga pinemmuhud mi ikayu. 7On, gafu ta inakkulan y Afu Dios ittera tase mattolay tera kan nasantuan, mari na kan narakat/napot. 8Gaggafen, ya innia laman nga mammari kan yaw nga kayan ku kan ikayu, mari na kan tolay ya iyammari na, nu azzi y Afu Dios nga nangiddan kan ya Espiritu Santo na kan ikayu. 9Mari mawag ngin kan iturak ku peba kan ikayu ya me-annung kan ya angngayat nu kan ya wawwahi nu kan pangurug, gafu ta netuldu y Afu Dios kan ikayu mismu nga makkara-aya-ayat kayu. 10Kakurruan na, paddaggunan nu nga ayatan ngammin ya wawwahi nu kan pangurug kan ya interu probinsia ya Macedonia. Wawwahik ira, bensian mi ikayu nga mas ayatan nu ira. 11Kakkapan nu ya mattolay nga sigga-imamak, en mari nu moleran ya ganagannud ya innia laman. Mattrabahu kayu nga mattaful kan pakkatolay nu megafu kan ya sikasikan nu pe laman kan kagitta ya netabarang mi kan ikayu. 12Mattolay kayu kan kunna tian tase mari mawag kan molestian nu ya innia laman, en ya totolay ira nga mari mangurug, ikakua ra ikayu. 13Sangaw, wawwahi mi ira, ikayat mi nga mammuan nu ya me-annung kan ya nakkakatay ira nga nangurug, tase mari megitta ya dandam nu kan ya dandam ya totolay nga awan da nga innanama. 14Mangurug tera nga natay y Jesus en nagginnolay. En kunna tian pay, mangurug tera nga megafu kan y Jesus, ya nakkakatay ira nga nangurug kan iggina, panollian y Afu Dios ira kan ya mundo nga mevulun kan iggina. 15On, gafu ta, yaw nga kayan mi kan ikayu, netuldu y Afu Jesus kan ikami. Ittera nga matolay peba addet kan ya annoli na nattaruk, mari tera vulvua/pulus unnan ya nakkakatay ira. 16On, gafu ta mappagukab y Afu Jesus mismu nattaruk nga maggafu kan langit, en makkullet iggina nga makkul kan ittera. Makkullet pay ya isa nga arkanghel, en magguni ya trumpeta y Afu Dios. Sangaw, kan unna, magginnolay ya nakkakatay ira nga nangurug kan y Cristo. 17Ya metunud, ittera nga matolay peba, mevulun tera kan ira nga umutun kan ya kunukunam nga dumafung kan y Afu Jesus kan langit, en kanakanayun nga makipaddian tera nattaruk kan iggina. 18Gaggafen, makkarabanabannay kayu kan ira yan nga ergo.

will be added

X\