1 Tesalonica 3

1Kattu mari min nga nattamman ya vurung mi kan ya situasion nu, zinisidi mi ya mattalan/mabbattang kan ya siudad ya Atenas, 2en zinisidi mi pay nga bonan mi kan ikayu y Timoteo nga wahi tera nga megitta kan ikami nga minasserbi kan y Afu Dios kannia angngipalapalappat mi kan ya napia nga dumug nga me-annung kan y Cristo. Binon mi iggina kan ikayu tase umang na pasikannan ya ginnonotan nu en paggutukan/patturidan/pattaggaddan na ikayu kan ya angngurug nu, 3tase awan kan ikayu nga mallikud megafu kan ira yan nga kapaziyariyat nu. On, gafu ta ammu nu mismu nga yan ya natunnakkan tera. 4Kattu kasan mi peba kan ikayu, kinahi mi kan ikayu nga mappanget tera nga mapazapaziyat, en ammu nu nga nesimmu yan ngin. 5Megafu kan yan, kattu mari kun nga nattamman ya vurung ku kan ikayu, binon ku y Timoteo kan ikayu, tase mammuan ku ya situasion nu kan ya angngurug nu. On, gafu ta narakat/napot nu pinallikud na ikayu zinan ya minannentasion, en nabbalin kan awan nga kebalinan ya nepabbannabannag mi kan ikayu. 6Ngam kan sangaw, kattu luminabbet ngin y Timoteo kan ikami nga naggafu kan ikayu, napia ya nepadumug na nga me-annung kan ya angngurug nu en ya ayat nu, kan ya kanakanayun nga attenap nu kan napia kannia pakerandam nu kan ikami, en kuru ikayat nu kanu nga masingan ikami manin, en kunna tian pay, ikayat mi nga masingan ikayu manin. 7Wawwahik ira, megafu kan yan, kan ngammin nga katattazzi en kapazapaziyat mi, nabannayan kami kan me-annung kan ikayu megafu kan ya angngurug nu. 8On, gafu ta mayayat kami kannia attolay mi nu mannanayun ya angngurug nu kan y Afu. 9On, gafu ta mari mi makabalat kan y Afu Dios megafu kan ikayu megafu kan ngammin nga payayat mi kan ya atubang na megafu kan ikayu. 10Algaw en gabi, napafutu ya angngidasadasal mi nga mabbisita kami kan ikayu manin, en lannappan mi ya pakkurangan ya angngurug nu. 11Y Afu Dios mismu nga Ama tera en y Afu tera nga Jesus, pare zinan ta pakkawatan da ikami nga umang kan ikayu. 12Pare zinan ta mas padakallan en passosobran y Afu ya akkara-aya-ayat nu en ya ayat nu kan ngammin nga totolay nga megitta kan ya ayat mi kan ikayu, 13tase pabbalinan na kan napasingkal/kakkurug ya giffutuan nu nga awan nga kapaliwatan nu nga nasantuan kan ya atubang y Afu Dios nga Ama tera kannia annoli nattaruk y Jesus nga Afu tera en ngammin ya totolay na. Amen.

will be added

X\