1 Pedro 5

1Isa nak nga panakallan nga lalakay nga nakasingan en nangipakammu kan ya nekapazapaziyat en nekapatay y Cristo. Mesipat nak pay kan ya kedayaw nga mappanget nga mepasingan. Ipakimallak ku kan ikayu nga kagittak nga panakallan ira nga lalakay, 2nga pastoran nu ya iglesia nga totolay y Afu Dios nga nekatalak na kan ikayu. Tanggawan nu ira nga megitta kan tangamanadan nga karneru na, mari megafu ta mafersa kayu, nu azzi megafu kan ya napia nga uray nu pe laman, gafu ta yan ya ikayat y Afu Dios. Kanakanayun nga kuan nu yan gafu ta ikakayat nu nga massesserbi, mari megafu ta interesan nu ya kapaga nu gafu ta kappasiran nu yan ya kegafanan ya assesserbi nu. 3En massesserbi kayu, mari gafu ta ikayat nu ya mammoray kan ya nekatalak ira kan ikayu, nu azzi gafu ta ikayat nu ya mabbalin kan ehemplo kan ira. 4En nattaruk nu manoli y Jesu Cristo nga panakallan kan ya pastor ira, iddan na kan ikayu ya mekapalat nga korona nga mari manguli. 5En ikayu pay nga mabbing nga lallaki, makimoray kayu kan ya lalakay ira. Mappakalinak kayu ngammin kan ya relasion nu kan ya kada isa, gafu ta kunna kan ya Sagrado nga Turak, "Turiyan y Afu Dios ya mappakatanang ira, ngam bendisionan na ya mappakalinak ira." 6Gaggafen, mappakalinak kayu kan y Afu Dios nga makapangngua, tase awayya na kayu nga iyatanang kan ya fustu nga tiempo. 7Ikatalak nu ngammin ya vuruvurung nu kan iggina gafu ta iggina ya manangngal kan ikayu. 8Siggaparan en malerto kayu gafu ta, y Satanas nga kontra tera, megitta kan leon nga mangananganangngar nga umang mattotoyang nga manaful kan totolay nga kanan na. 9Turiyan nu iggina nga nasikan ya angngurug nu, gafu ta ammu nu nga parehu ya kapazapaziyat nga mapasapasan nu en ya kapazapaziyat nga mapasapasan ya wawwahi nu kan pangurug kan ya interu mundo. 10Kabalin ya kapazapaziyat nu kan mari mabayag, y Afu Dios nga paggafanan ngammin nga allak, iggina ya nangakkul kan ikayu nga mesipat kan ya kedayaw na nga mannanayun megafu kan ya neketadday nu kan y Jesu Cristo, iggina mismu, lannappan na ya hanna laman nga pakkurangan nu, patuyaggan, paladdan en pabbalinan na kayu kan mari maguyag. 11Iggina ya mammoray kan awan na nga panda. Amen. 12Ababba laman ya turak ku kan ikayu nga nepeturak ku nga neturak y Silvano nga ikuentak kan mapammakatalakkan nga wahi tera kan pangurug. Nepeturak ku ira yan tase mapasikan ya angngurug nu en mapakurug ya nepalappat kan ikayu, nga yan ya kurug nga allak y Afu Dios. Pasikannan nu ya ammakatalak nu kan yan nga allak na. 13Ya wawwahi tera kan ya iglesia kan yaw nga siudad ya Babilonia, totolay nga pinili y Afu Dios nga kagitta nu pay nga iglesia, kunna tian pay y Marcos nga ibilang ku kan anak ku, ipedatang da ya diot da kan ikayu. 14Makkarakikkiddiot kayu kan amma nga sennial ya nadiosan nga ayat. Pare zinan ta hinnian/asan imamak kan ikayu ngammin nga netadday kan y Cristo.

will be added

X\