1 Kurug nga napazapaziyat ya baggi y Cristo kattun. Ikayu gafen pay, pasikannan nu ya ginnonotan nu nga megitta kan iggina, gafu ta, ya innia laman nga napazapaziyat ya baggi na, linikuran nan ya alliwat. 2 Gaggafen, pasikannan nu ya ginnonotan nun, tase kannia kasan nu peba nga matolay kan ya utun lusak, mari nu mattolay ngin segun kan ya narakat/napot ira nga ikayat ya totolay kan yaw nga mundo nu azzi segun kan ya uray y Afu Dios. 3 Makalannat ngin ya tiempo nga nepappagustu nu nga naka-angngua kan ya ganagannud nga ikayat nga kuan ya totolay nga mari makakammu kan y Afu Dios. Kattun, nattolay kayu kan kinadaping, kan narakarakat nga akkelug nu, aggillellaw, narakat nga addibidibersion nga mattumpal kan kappasiran nga makamakua, attaradday nga aggini-inum kan binarayang en kan addayarayaw kan rebultu ira nga mekontra kan ya dorob. 4 Mappabbaw ra gafu ta mari nu metadday kan iran nga maka-angngua kan kuru narakarakat nga megitta kan ira yan nga kukukuan da, en megafu kan yan, aggillokowan da kayu. 5 Ira yan nga kukukuan da, tabbahan da nattaruk kan y Afu Dios nga siggaparan nga mamanunut kan ya matolay ira en ya nakkakatay ira. 6 Yaw ya gafu na kan nepalappat ya napia nga dumug maski kan ya nakkakatay ira, tase maski mapanunutan da kan kagitta ya totolay nga matolay peba, matolay ya gikkaralluan da nga megitta kan y Afu Dios. 7 Aranni ngin ya pangultimuan ngammin ya ganagannud. Mawag kan kanakanayun nga napia ya ginnonotan nu en malerto kayu, tase makapaddasal kayu. 8 Ya ka-importanteyan, makkara-aya-ayat kayu kan napafutu, gafu ta ya ayat, tallabban na ya napakaru nga liwaliwat ira. 9 Alaban nu kan ya gibbalayan nu ya wawwahi nu kan pangurug nga umang mabbisita kan ikayu, maski mari nu inamammu ira, nga mari nu marreklamo. 10 Ya kada isa kan ikayu, iniddannan y Afu Dios kan ne-eruma nga pakapangngua. Iyusu-usa nu ira yan para kan ya pammakapianan ya kada isa kan ikayu, en kukukuan nu yan nga napia kayu zinan nga ingkargadu kan ya maddumuruma nga nalawat nu kan iggina. 11 Ya innia laman nga mangipalappat, ya ergo y Afu Dios ya ipalappat na; en ya innia laman nga massesserbi, massesserbi iggina kan ya sikan nga neddan y Afu Dios kan iggina, tase, kan ngammin nga makamakua, madayarayaw y Afu Dios megafu kan y Jesu Cristo. Madayarayaw iggina, en mammoray iggina kan awan na nga panda. Amen. 12 Medduk nga wawwahik ira kan pangurug, mari nu pakkapalat ya maddaggun nga nelot/nafulotan nga kapazapaziyat nu nga pamurba kan ya angngurug nu, nga alale tanakkuan ya mesissimmu kan ikayu kan ya gagangay nga mesissimmu. 13 Ngam mayayat kayu zinan, gafu ta mapazapaziyat kayu kan kagitta ya nekapazapaziyat y Cristo, tase awayya na pay nga nelot ya payayat nu nattaruk nu mepasingan ya kedayaw na. 14 Nu mo-oyaw kayu gafu ta kua na kayu y Cristo, mabendisionan kayu gafu ta makipaddian kan ikayu ya madayaw nga Espiritu Santo y Afu Dios. 15 Awan zinan kan ikayu nga mapazapaziyat gafu ta namatay iggina, nakkokot, nangngua iggina kan hanna laman nga narakat, onu nammitimiti. 16 Ngam nu hinnian isa kan ikayu nga mapazapaziyat gafu ta Cristiano iggina, mari na zinan mappasiran, nu azzi dayarayawan na zinan y Afu Dios gafu ta nengahan kan iggina ya ngahan y Cristo. 17 Luminabbet ngin ya tiempo nga ammegafu y Afu Dios nga mamanunut, en ittera mismu nga totolay na ya unna nga panunutan na. Nu ittera ya unna nga mapanunutan, hanna ya pattumpalan ira nay nga totolay nga mari mamarulot kan ya napia nga dumug y Afu Dios? 18 On, gafu ta kunna kan ya Sagrado nga Turak, "Nu nararriat ya kapalliad ya natunung nga totolay, hanna ya pattumpalan ya minalliwat ira nga mammari kan y Afu Dios?" 19 Gaggafen, ittera nga mapazapaziyat segun kan ya uray y Afu Dios, ikatalak tera ya gikkaralluan tera pe laman kan iggina nga mapammakatalakkan en namaratu kan ittera, en massige tera zinan nga maka-angngua kan napia.
