1 Pedro 3

1Ikayu nga babbay, makimoray kayu kan ya gi-attawan nu tase, nu hinnian/asan kan ira nga mari peba nangurug kan ya ergo y Afu Dios, mabensi ra balalaman megafu kan ya napia nga katakatolay nu. On, gafu ta, maski awan nga makahi nu kan ira, 2masingan da ya katakatolay nu nga natunung en minammakakua kayu. 3Ya appaguapa nu, mari zinan kan ya kasinnan nu laman, aggangarrian, ya ammakappia nu kan ya gi-ahukan nu, ya angngikkua/angngippay nu kan vulawan nga adornu, en ya assinnun nu kan nakakkasta, 4nu azzi ya paguapan nu, yan ya giffutuan nu nga mari masingan kan nasimpat en nemamak nga katakatolay, gafu ta, ya kaguapa nga kunna tiaw ya klase na, mari manguli, en nelot/nafulotan ya ngina na kan ya paningan y Afu Dios. 5Kunna tian ya nepappaguapa ya nasantuan nga babbay nga natolay kattun nga nanginnanama kan y Afu Dios, en nakimoray ra kan ya gi-attawan da. 6Kunna tian pay ya kinikkingngua y Sara, minammarulot kan y Abraham, en "afu" ya aggakkul na kan iggina. Kuenta gakagaka na kayu nu napia ya kukukuan nu, en nu mari nu mattalaw kan hanna laman nga pattalawan. 7Kunna tian pay kan ikayu nga lallaki nga hinnian gi-attawan nu, kannia attolay nu nga metadday kan ya gi-attawan nu, panonotan nu ya pammakapianan da. Ikakua nu ira nga mas nakafi ya gibbaggian da annek/ngam kan ikayu nga parehu kayu nga meddannan kan ya angat nga regalu y Afu Dios. Kuan nu ira yan tase awan nga makagurun kan ya dasadasal nu. 8Kan pangultimuan, ikayu ngammin, mattangesa zinan ya ginnonotan nu; ya kada isa kan ikayu, makipattenap; makkara-aya-ayat kayu nga kuenta maggurwahi; makkara-alla-allak kayu, en mappakalinak kayu. 9Mari nu balattan kan narakat/napot ya narakat nga makua kan ikayu, onu tabbahan kan narakat ya narakat nga kayan da kan ikayu. Imbes kan yan, ikiddaw nu lahud kan y Afu Dios kan bendisionan na ira, gafu ta yan ya nangakkulan y Afu Dios kan ikayu. Kuan nu yan tase mabendisionan kayu pay. 10On, gafu ta kunna kan ya Sagrado nga Turak, "Ya innia laman nga mayat nga mayayat kannia attolay na, en mayat nga napia ya algaw ira nga mapasapasan na, mawag kan tangngallan na ya zila na pe laman tase mari na mergo kan narakat en ya bibig na tase mari ra mergo kan pangilloko. 11Mawag kan likuran na ya narakat, en kanakanayun nga kuan na ya napia. Mawag kan tafulan na ya akkipemamak na kan ya ikattolay na, en kuan na yan kan napafutu, 12gafu ta tanggawan y Afu Dios ya natunung ira, en ginan na ya dasadasal da, ngam kontran na ira nay nga maka-angngua kan narakat." 13Innia kazze/pano ya manattazzi kan ikayu nu nalappat kayu nga maka-angngua kan napia? 14Ngam maski mapazapaziyat kayu megafu kan ya angngua nu kan napia, mabendisionan kayu. Mari nu italaw ya manantalaw ira kan ikayu, en mari nu mavurung. 15Ngam dayarayawan nu y Cristo nga Afu nu kan ya giffutuan nu. En kanakanayun nga siggaparan kayu nga tumabbag kan ya innia laman nga mamovut kan ikayu kan me-annung kan ya agginnanama nu. 16Kuan nu yan kan simpat en ammakakua, en kan narenu nga konsensia, tase mapasiranan ira nay nga manguyaw en mamaraparakat kan ikayu kan me-annung kan ya napia nga pangapangngua nu megafu kan ya neketadday nu kan y Cristo. 17Mas napia nu mapazapaziyat kayu megafu kan ya angnga-angngua nu kan napia annek kan mapazapaziyat kayu megafu kan ya angnga-angngua nu kan narakat nu yan ya uray y Afu Dios. 18On, gafu ta mismu y Cristo, napaziyat nga napatay megafu kan ya liwaliwat tera kan missa laman, en mari mawag kan uli mesimmu yan. Napatay ya natunung para kan ittera nga mari natunung, tase me-angay na ittera kan y Afu Dios. Napatay ya baggi na, ngam natolay ya karallua na. 19Ya karallua na, minang nangipalappat kan ya karallua ira nga hinnian kan akkarselan. 20Ira yan ya gikkaralluan ya totolay kattun nga mari namarulot kan ya ergo y Afu Dios, maski pinasensia na ira kannia nepattaron na kan ya abbabawi ra kan ya algaw ira nga nepammanday y Noe kan ya dakadakal nga barangay. Pilippipia ra, walu laman nga totolay, ya napalliad megafu kan ya danum. 21Kunna tian pay kan ya nekabawtiso nu, pinalliad na kayu, mari megafu kan ya nepangngazza nu kan daping kan ya gibbaggian nu, nu azzi megafu kan ya nepangngikiddaw nu kan y Afu Dios kan pakarennuan na ya gikkonsensian nu megafu kan ya nepagginnolay y Jesu Cristo. 22Minutun iggina kan langit, en hinnian igginan kan ya ziwanan y Afu Dios. Ya anghel ira, ya hinnian paka-awayya ra, en ya hinnian pakapangngua ra, tumuluk da kan iggina.

will be added

X\