1 Pedro 2

1Gaggafen, immangan nun ya maka-angngua kan hanna laman nga narakat/napot. Azzan nun ngammin ya takit ya ginnonotan nu, ya aggappa-appen/agga-agin, ya mari napafutu, ya appassapassil en ya ammaraparakat nu. 2Ya bahu ne-anak nga abbing, ikakayat na ya massusu kan puro nga gattak. Kunna tian pay zinan kan ikayu, ikakayat nu zinan pay ya puro nga na-espirituan nga gattak, tase, megafu kan yan, mammanakam kayu, en matumpal gafen ya kapalliad nu, 3gafu ta kunna kan ya Sagrado nga Turak, "Napasan nun ya inaggallallak y Afu Dios." 4Umaranni kayu kan y Afu Jesus nga kuenta siggamatolay nga batu. Ne-ammari ya totolay iggina, ngam pinili y Afu Dios iggina, en nebilang na iggina kan nangina. 5En ikayu pay, kuenta siggamatolay nga batu ira nga me-usa kan ya kapatadag ya na-espirituan nga balay, en mabbalin kayu kan nasantuan nga papari pay nga mangiyofresi/mangidedika kan na-espirituan nga ofresi ira nga makapagustu kan y Afu Dios megafu kan y Jesu Cristo. 6On, gafu ta kunna kan ya Sagrado nga Turak, "Ginan dak, hinnian/asan batu nga ikkuak/ippek kan Sion nga patunak nga napili en nangina, en ya innia laman nga mangurug kan iggina, mari vulvua/pulus mapasiranan." 7Kan ittera nga mangurug, kuru nangina iggina. Ngam kan ira nay nga mari mangurug, kunna kan ya Sagrado nga Turak, "Ya batu nga ne-ammari ya totolay nga mamatadag kan ya balay, nabbalin kan patunak." 8Kunna peba kan ya tanakkuan nga lugar kan ya Sagrado nga Turak, "Batu iggina nga kesikadulan ya totolay, en batu nga katomban da." Mesikadul da gafu ta iyammari ra ya ergo y Afu Dios, en natunnak da nga mangngua kan yan. 9Ngam ittera ya napili nga ginaka, papari ya Patul, nasantuan nga nasion, en totolay nga kua y Afu Dios, tase ipakapakammu tera ya mekapakkapalat nga kukukuan y Afu Dios. Inakkulan na ittera nga mapanaw kan ya kokopan/kallap, en antera maddian kan ya mekapakkapalat nga nawag na. 10Kattun, mari na kayu totolay y Afu Dios, ngam kan sangaw, totolay na kayun. Kattun, mari na kayu nekallak, ngam kan sangaw, nekallak na kayun. 11Ideddukan ku ira nga kuenta dayu en istrangheru kan yaw nga mundo, ikiddok kan ikayu nga tangngallan nu ya narakat ira nga ikayat ya gibbaggian nu nga ira yan ya kuenta manggerra kan ya gikkaralluan nu. 12Mawag kan napia ya kukukuan nu kan ya paratubangan ya mari mangurug ira tase, maski paraparakattan da kayu kan sangaw, dayarayawan da y Afu Dios megafu kan ya napia nga kukukuan nu nga masingisingan da, en kuan da yan nattaruk kan ya algaw nga allabbet na kan ya totolay na. 13Megafu kan y Afu, tumuluk kayu kan ngammin nga hinnian paka-awayya ra kan ya totolay; kan ya emperador nga katanangan ya paka-awayya na, 14en kan ya gubernador ira nga sinunnak na, tase kastigowan da ya innia laman nga maka-angngua kan narakat, en ipekakua ra ya innia laman nga maka-angngua kan napia. 15On, gafu ta, ya ikayat y Afu Dios, megafu kan ya napia nga kukukuan nu, mapemmang nu ya awan nga kebalinan nga ergo ya totolay nga awan da nga ginnonotan. 16Totolay kayu nga mari kohung, ngam mari nu iyusa ya zi nu kakohung nga panallab nu kannia angngua nu kan narakat, nu azzi mattolay kayu nga minasserbi kan y Afu Dios. 17Ikakua nu ngammin ya totolay; ayatan nu ya wawwahi nu ira kan pangurug; mattalaw kayu kan y Afu Dios, en ikakua nu ya emperador. 18Ikayu nga minasserbi, makimoray kayu kan ya gi-amowan nu en mammakakua kayu kan ira, mari laman kan ya minangngikallak en nasimpat ira, nu azzi maski kan ya naporay ira pay. 19On, gafu ta mapagustuan y Afu Dios kan ya innia laman nu attamman na ya katattazzi na maski awan na nga liwat, en kuan na yan gafu ta ammu na nga yan ya ikayat y Afu Dios nga kuan na. 20Hinnian kazze/pano kedayawan nu, nu attamman nu ya kakastigo nu megafu kan ya narakat nga kiningngua nu? Awan! Ngam nu attamman nu ya katattazzi nu kannia angngua nu kan napia, mapayayat y Afu Dios kan ikayu. 21Yan ya nangakkulan y Afu Dios kan ittera, gafu ta natattazzian y Cristo para kan ya pammakapianan tera. Kiningngua na yan tase parrian tera iggina nga ehemplo. 22Kunna kan ya Sagrado nga Turak nga me-annung kan iggina, "Mari na vulvua/pulus nalliwat, en awan vulvua laddud/busid nga nallawan kan ya simuk na." 23Kattu inuyu-uyaw ra iggina, mari na nabbalat nga nanguyaw. Kattu pinazapaziyat da iggina, mari na nanantalaw, nu azzi nammakatalak iggina kan y Afu Dios nga natunung ya ammanunut na kan ya totolay. 24Y Cristo, kinattu na mismu ya liwaliwat tera kannia nekepatak na kan kurut, tase kuenta matay tera nga masueltan kan ya liwaliwat tera, en mattolay tera nga maka-angngua kan natunung. Megafu kan ya biad na ira, napammapia tera. 25On, gafu ta kattun, negitta tera kan karneru nga nappa-awawan, ngam kan sangaw, nabbira teran nga minang kan y Jesus nga pastor tera en minannangngal kan ya gikkaralluan tera.

will be added

X\