1 Pedro 1

1Yakan y Pedro nga apostol y Jesu Cristo. Matturak nak kan ikayu nga pinili y Afu Dios tase mabbalin kayu kan totolay na nga maddayu nga maddian kan maddumuruma nga lugar ira kan ya probinsia ya Ponto, ya Galacia, ya Capadocia, ya Asia, en ya Bitinia. 2Pinili na kayu ya Dios nga Ama tera segun kan ya ammu na namegafu kattu gafagafu, en pinabbalin ya Espiritu Santo ikayu kan nasantuan tase paraparulotan nu y Jesu Cristo, en tase mapakoma ya liwaliwat nu kannia nekewarsi ya daha na. Pare zinan ta dumakal ya allak en imamak nga iddan y Afu Dios kan ikayu. 3Madayarayaw ya Dios en Ama y Afu tera nga Jesu Cristo. Megafu kan ya dakal nga inaggallallak na, iniddannan na ittera kan bahu nga attolay nga kuenta uli ne-anak tera, en neddan na yan megafu kan ya nepammaginnolay na kan y Jesu Cristo, en hinnian/asan gafen siggamatolay nga agginnanama tera 4nga mangerensia kan mari madaral, awan nga mantia na, en mari manguli nga nereserba na kan langit para kan ittera. 5Megafu kan ya angngurug tera, tanggawan ya pakapangngua y Afu Dios ittera addet zi mabalin na ya ammalliad na kan ittera, en aggaparan nga mepakammu kan ya panguzzanan ira nga algaw. 6Megafu kan ira yan, mayayat kayu zinan, maski mafersa kayu nga mapazapaziyat kan manganannuan kan maddumuruma nga kapurba. 7Ira yan nga kapazapaziyat nu, pamurba kan ya angngurug nu nga mas nangina annek/ngam kan vulawan nga maski napurba kan afi tase mammuan nu puro onu awan, madaral mamba. Mesimmu ira yan kan ikayu tase mammuan pay nga kurug ya angngurug nu en mabbalin kan kegafanan ya kedayaw, kekakua, en ke-atanang nu nattaruk nu manoli y Jesu Cristo. 8Maski mari nu peba nasingan iggina, ayatan nu. Maski mari nu masingan iggina kan sangaw, kurruan nu. En ya payayat nu, mekapakkapalat nga mari me-epakanawag 9gafu ta malawat nu nattaruk ya resulta ya angngurug nu, yan ya kapalliad ya gikkaralluan nu. 10Ya me-annung kan yaw nga kapalliad, giniligilammu en pinalappanonot ya profeta ira nga nangipakammu kattun kan ya allak nga iddan y Afu Dios kan ikayu kan sangaw. 11Pinalappanonot da ya tiempo en ya situasion nga ikayat nga kayan ya Espiritu y Cristo nga hinnian kan ira kattu nepakammu na kan ira ya mappanget nga kapazapaziyat ya Cristo en ya netunud nga nekekapalat na. 12Ngam nepakammu na kan ira nga bakkan kan ira pe laman ya sesserbian da kan ira yan nga nepakammu na kan ira nu azzi ikayu. Ira yan nga ganagannud, nepakammu ya totolay nga nangipalapalappat kan ikayu kan ya napia nga dumug kan ya pakapangngua ya Espiritu Santo nga nabon nga naggafu kan langit. Maski ya anghel ira, ikayat da pay nga mantindian ira yaw nga ganagannud. 13Gaggafen, preparan nu ya ginnonotan nu nga maka-angngua kan napia. Malerto kayu, en mennanama kayu kan kompleto kan ya bendision nga meddan kan ikayu nattaruk nu uli mappasingan y Jesu Cristo. 14Minammarulot kayu zinan nga anak ira y Afu Dios, en mari nu vulunan ngin ya dana nga narakat/napot ira nga ikayat ya gibbaggian nu kattu mari nu peba nammuan ya kurug nga tuldu. 15Ngam mawag kan mabbalin kayu kan nasantuan kan ngammin nga kukukuan nu nga megitta kan ya kinasanto y Afu Dios nga nangakkul kan ikayu. 16Kunna kan ya Sagrado nga Turak, "Mawag kan mabbalin kayu kan nasantuan gafu ta nasantuan nak." 17Y Afu Dios nga kayan tera nga iggina ya Ama tera, mari na mappadumuruma nga mamanunut segun kan ya kinikkingngua ya kada isa. Gaggafen, mattolay kayu nga hinnian attalaw nu kan iggina kannia kasan nu kan ya utun lusak nga kuenta dayu. 18Kuan nu yan gafu ta ammu nu nga mari na kan ganagannud nga madaral, aggangarrian, pirak onu vulawan, ya panavvut na kan ikayu. Kiningngua na yan tase sueltan na kayu kan ya nepattolotolay nu kattun nga awan na nga serbi nga nagilammu nu kan ya ginafu nu ira, 19nu azzi ya panavvut na kan ikayu, yan ya nangina nga daha y Jesu Cristo nga megitta iggina kan uvvun karneru nga awan vulvua/pulus diferensia na onu mantia na. 20Kallie ya nekaparatu ya mundo, zinisidi y Afu Dios nga bonan na ya Cristo, en binon na igginan kan ya utun lusak para kan ittera kan ira yaw nga panguzzanan nga algaw. 21Megafu kan iggina, mangurug tera kan y Afu Dios nga nappaginnolay en nangiddan kan kedayaw kan iggina. Gaggafen, y Afu Dios, iggina ya kurruan en innanaman tera. 22Pinakarennuan nu ya gikkaralluan nu pe laman kannia nepammarulot nu kan ya kurug nga tuldu, en ya efekto na, napasingkal/kakkurug ya ayat nu kan ya wawwahi nu kan pangurug. Makkara-aya-ayat kayu gafen kan napia en napafutu. 23Uli ne-anak kayu, mari megafu kan ya manak nu nga matay mamba, nu azzi megafu kan ya siggamatolay en mannanayun nga ergo y Afu Dios nga mari madaral, 24gafu ta kunna kan ya Sagrado nga Turak, "Ngammin ya totolay, kadakaddat ya kegittan da, en lappaw kaddat ya kegittan ngammin ya kasta ra. Mallelay ya kaddat, en mattattak/makkabok ya lappaw na, 25ngam ya ergo y Afu Dios, mannanayun kan awan na nga panda." Yan nga ergo na, yan ya napia nga dumug nga nepalapalappat kan ikayu.

will be added

X\