1 Juan 5

1Ya innia laman nga mangurug nga y Jesus, iggina ya Cristo, anak y Afu Dios iggina. En ya innia laman nga mangayat kan ya ama, ayatan na pay zinan ya anak na. 2Yaw ya pakakammuan tera nga ayatan tera ya anak ira y Afu Dios, gafu ta ayatan tera y Afu Dios en paraparulotan tera ya mandu na ira. 3On, gafu ta yaw ya angngipasingannan tera kan ya angngayat tera kan y Afu Dios, paraparulotan tera ya mandu na ira, en mari ra mamba nararriat nga maparulot. 4On, gafu ta, ya innia laman nga ginaka y Afu Dios, affutan na ya narakat/napot nga hinnian/asan kan ya mundo, en yaw ya pangaffut tera kan ya narakat nga hinnian kan ya mundo, ya angngurug tera. 5Innia gafen ya mangaffut kan ya narakat nga hinnian kan ya mundo? Ya innia laman nga mangurug nga y Jesus, iggina ya Anak y Afu Dios. 6Y Jesu Cristo, minang kan ya utun lusak megafu kan danum en daha, Mari laman kan danum, nu azzi kan danum en daha. En mismu ya Espiritu Santo ya mamakurug, gafu ta ya Espiritu Santo, iggina ya kakurruan. 7Tallu ya mamakurug, 8ya Espiritu Santo, ya danum en ya daha, en ira yaw nga tallu, makkara-anahut da. 9Kurruan tera ya pamakurug ya totolay, ngam mas nasikan ya pamakurug y Afu Dios, gafu ta yaw ya pamakurug y Afu Dios nga pinakurug na nga me-annung kan ya Anak na. 10Ya innia laman nga mangurug kan ya Anak y Afu Dios, hinnian ya pamakurug y Afu Dios kan iggina. Ngam ya innia laman nga mari mangurug kan y Afu Dios, kuenta kayan na nga laddud/busid y Afu Dios gafu ta mari na kurruan ya pamakurug na nga me-annung kan ya Anak na. 11En yaw ya pamakurug, iniddannan y Afu Dios ittera kan angat nga awan na nga panda, en yan nga angat, hinnian kan ya Anak na. 12Ya innia laman nga hinnian ya Anak y Afu Dios kan iggina, hinnian pay kan iggina yan nga angat. Ya innia laman nga awan ya Anak y Afu Dios kan iggina, awan pay yan nga angat kan iggina. 13Neturak ku ngammin ira yaw kan ikayu nga mangurug kan ya Anak y Afu Dios tase masiguradu nu nga hinnian angat nu nga awan na nga panda. 14En yaw ya ammakatalak tera kan y Afu Dios, nu makkiddaw tera kan iggina kan hanna laman nga me-annung kan ya uray na, ginan na ittera. 15Gafu ta ammu tera nga ginan na ya akkiddaw tera kan iggina, ammu tera pay nga iddan na kan ittera ya kiddawan tera kan iggina. 16Nu hinnian tolay kan ikayu nga makasingan kan ya isa nga wahi na kan pangurug nga malliwat nga mari marresulta ya liwat na kan patay, idasal na zinan iggina, en pakoman y Afu Dios iggina, en iddannan na iggina kan angat. Kayan ku yan kan me-annung kan ya malliwat ira nga mari marresulta ya liwat da kan patay. Hinnian liwat nga marresulta kan patay. Marik kayan nga idasal nu zinan ya kapakoma na yan nga liwat. 17Ngammin ya makamakua nga mari natunung, liwat, ngam hinnian liwat nga mari marresulta kan patay. 18Ammu tera nga, ya innia laman nga ginaka y Afu Dios, mari massige nga malliwat, ngam isiggalak/itakit ya Anak y Afu Dios iggina, en awan nga makua ya diablo kan iggina. 19Ammu tera nga totolay y Afu Dios ittera, en ngammin ya totolay kan ya mundo, hinnian kan ya pammorayan ya diablo. 20Ammu tera nga minang ya Anak y Afu Dios kan ya mundo, en iniddannan na ittera kan pakantindi, tase mammuan tera iggina nga kurug. Metadday tera kan iggina nga kurug, ikayat ku nga kayan, kan y Jesu Cristo nga Anak y Afu Dios. Iggina ya kurug nga Dios en ya angat nga awan na nga panda. 21Anak ku ira, umarayyu kayu kan ya rebultu ira.

will be added

X\