1 Juan 4

1Ideddukan ku ira, mari nu mangurug kan ngammin nga totolay nga makkahi nga maggafu ya ituttuldu ra kan ya Espiritu Santo, nu azzi purban nu ya ituttuldu ra nu segun kan ya kurug nga tuldu y Afu Dios, gafu ta aru ya falso nga profeta nga hinnian/asan ngin kan ya mundo. 2Yaw ya pakakammuan nu kan ya innia laman nga maggafu ya ituttuldu na kan ya Espiritu y Afu Dios. Ya innia laman nga mangituldu nga y Jesu Cristo, minang kan ya utun lusak nga nabbalin kan tolay, maggafu ya ituldu na kan y Afu Dios. 3Ngam ya innia laman nga mari mangituldu kan yan nga me-annung kan y Jesus, mari maggafu ya ituldu na kan y Afu Dios. Ya paggafanan na, yan ya espiritu ya anti-Cristo nga nagina nu nga umang, en hinnian ngin kan ya mundo. 4Anak ku ira, kua y Afu Dios ikayu, en inaffut nu ira yan nga falso nga profeta kannia zi nu nekelohot kan ira, gafu ta mas makapangngua ya Espiritu Santo nga hinnian kan ikayu annek/ngam kan ya espiritu nga hinnian kan ya totolay kan yaw nga mundo. 5Nemundowan ira yan nga falso nga profeta. Nemundowan gafen pay ya ituttuldu ra, en ya totolay kan yaw nga mundo, ginan da ira. 6Ngam ittera, totolay y Afu Dios. Ya innia laman nga makakammu kan y Afu Dios, ginan da ittera. Ngam ya innia laman nga mari makakammu kan y Afu Dios, mari ra ginan ittera. Yan gafen ya pakakammuan tera kan ya padduman ya totolay nga mamaraparulot kan ya Espiritu Santo en ya totolay nga mamaraparulot kan ya espiritu nga minangngilohot. 7Ideddukan ku ira, mawag kan makkara-aya-ayat tera gafu ta maggafu ya ayat kan y Afu Dios, en ya kada tolay nga mangayat, ginaka y Afu Dios, en ammu na y Afu Dios. 8Ya innia laman nga mari mangayat, mari na ammu y Afu Dios gafu ta y Afu Dios, ayat. 9Nepasingan y Afu Dios ya ayat na kan ittera kannia nepabbon na kan ya isissa nga Anak na kan ya utun lusak, tase awayya tera nga matolay megafu kan iggina. 10En yaw ya pakakammuan tera kan ayat, mari na kan ya ayat tera kan iggina, nu azzi ya ayat na kan ittera, en binon na ya Anak na nga ne-ofresi/nededika para kan ya kapakoma ya liwaliwat tera. 11Ideddukan ku ira, gafu ta kunna tian ya nepangngayat y Afu Dios kan ittera, mawag kan makkara-aya-ayat tera pay. 12Awan vulvua/pulus nakasingan kan y Afu Dios, ngam nu makkara-aya-ayat tera, makipaddian y Afu Dios kan ittera, en makompleto kan ittera ya ayat na. 13Ya pakakammuan tera nga makipaddian tera kan iggina en makipaddian iggina kan ittera pay, ya nepammaddian na kan ya Espiritu Santo kan ittera. 14Nasingan mi en tettestiguan mi nga binon ya Ama ya Anak na nga mamalliad kan ya totolay kan ya mundo. 15Ya innia laman nga mangikahi nga y Jesus, iggina ya Anak y Afu Dios, makipaddian y Afu Dios kan iggina, en makipaddian iggina kan y Afu Dios pay. 16Gaggafen, nammuan en kinurug tera nga ayatan y Afu Dios ittera. Y Afu Dios, ayat, en ya innia laman nga mannanayun nga mangayat, makipaddian iggina kan y Afu Dios, en makipaddian y Afu Dios kan iggina pay. 17Mabbalin ya ayat tera kan awan na nga pakkurangan gafu ta mattolay tera kan ya utun lusak kan kagitta ya nepattolay y Cristo, en awayya tera nga mammakatalak nattaruk kan ya algaw nga ammanunut y Afu Dios kan ya totolay. 18Nu hinnian ayat, awan nga talaw, gafu ta, ya ayat nga awan na nga pakkurangan, azzan na ya talaw. Ya innia laman nga mattalaw, mattalaw iggina gafu ta abbattan na kan makastigo iggina, en mari na peba napabbalin kan awan na nga pakkurangan kan ya ayat na. 19Mangayat tera gafu ta nonna iggina nga nangayat kan ittera. 20Nu hinnian makkahi nga ayatan na y Afu Dios, ngam ikalussaw na ya wahi na kan pangurug, malladdud/mabbusid iggina. On, gafu ta, ya innia laman nga mari mangayat kan ya wahi na kan pangurug nga masingan na, mas mari na awayya nga ayatan y Afu Dios nga mari na masingan. 21En yaw ya mandu nga neddan na kan ittera, ya innia laman nga mangayat kan y Afu Dios, ayatan na zinan pay ya wahi na kan pangurug.

will be added

X\