1 Juan 2

1Ikayu nga ikuentak kan anak ku ira, neturak ku yaw kan ikayu, tase mari nu malliwat, en nu hinnian/asan kan ikayu nga malliwat, hinnian mangibaggi/mangitadag kan ittera kan y Afu Dios, iggina y Jesu Cristo nga natunung. 2Iggina ya ne-ofresi/nededika para kan ya kapakoma ya liwaliwat tera, en mari na kan ya liwaliwat tera laman, nu azzi kan ya liwaliwat pay ngammin ya totolay kan ya interu mundo. 3Nu paraparulotan tera ya mandu ira y Afu Dios, masiguradu tera nga ammu tera iggina. 4Ya innia laman nga makkahi nga ammu na y Afu Dios, ngam mari na paraparulotan ya mandu na ira, malladdud/mabbusid iggina, en awan ya kurug kan iggina. 5Ngam ya innia laman nga mamaraparulot kan ya mandu na ira, awan nga pakkurangan ya ayat na kan y Afu Dios. Ya ammaraparulot tera kan ira yan, yan ya pakakammuan tera nga netadday tera kan iggina; 6ya innia laman nga makkahi nga makipattolay iggina kan y Afu Dios, mawag nga mattolay iggina kan kagitta ya nepattolay y Jesus. 7Ideddukan ku ira, yaw nga neturak ku kan ikayu, mari bahu nga dorob nu azzi dana nga dorob nga ammu nu namegafu kattu gafagafu. Yaw nga dana nga dorob, yan ya ergo nga nagina nun. 8Ngam sangaw, awayya na nga makahi kan bahu nga dorob ya neturak ku kan ikayu, en masingan ya kakurruan na kan y Jesus en kan ikayu pay, gafu ta maddaggun nga mapawan ya kokopan/kallap, en mappatubbat ngin ya kurug nga nawag. 9Ya innia laman nga makkahi nga hinnian iggina kan ya nawag, ngam ikalussaw na ya innia laman nga wahi na kan pangurug, hinnian peba iggina kan ya kokopan. 10Ya innia laman nga mangayat kan ya wahi na kan pangurug, mattolay igginan kan ya nawag, en kan iggina, awan nga kegafanan ya alliwat na. 11Ngam ya innia laman nga mangikalussaw kan ya wahi na kan pangurug, hinnian peba iggina kan ya kokopan, en mattolay iggina kan ya kokopan, en mari na ammu ya pappangetan na, gafu ta pinavvulaw ya kokopan iggina. 12Natturak nak kan ikayu nga ikuentak kan anak ku ira, gafu ta napakoma ngin ya liwaliwat nu megafu kan y Jesus. 13Natturak nak kan ikayu nga ama ira, gafu ta ammu nu iggina nga dana aggahinnian namegafu kattu gafagafu. Natturak nak kan ikayu nga mabbing nga lallaki, gafu ta inaffut nun y Satanas. 14Natturak nak kan ikayu nga ikuentak kan anak ku ira, gafu ta ammu nu y Dios Ama. Natturak nak kan ikayu nga ama ira, gafu ta ammu nu iggina nga dana aggahinnian namegafu kattu gafagafu. Natturak nak kan ikayu nga mabbing nga lallaki, gafu ta nasikan ya angngurug nu, en hinnian ngin ya ergo y Afu Dios kan ikayu, en inaffut nun y Satanas. 15Mari nu ayatan ya mundo onu ya ganagannud nga hinnian kan ya mundo. Ya innia laman nga mangayat kan ya mundo, awan nga ayat na kan y Dios Ama. 16On, gafu ta, ngammin ya hinnian kan ya mundo, ikayat ku nga kayan, ya akkelug ya baggi, ya akkelug ya mata, en ya apparaparayag ya totolay, mari ra maggafu kan y Dios Ama, nu azzi maggafu ra kan ya mundo. 17Mapawan ya mundo en ya akkelug ya totolay kan ya hinnian kan ya mundo, ngam ya innia laman nga maka-angngua kan ya uray y Afu Dios, matolay kan awan na nga panda. 18Ikayu nga ikuentak kan anak ku ira, aranni ngin ya pangultimuan. Nagina nu nga hinnian anti-Cristo nga mappasingan, en kan sangaw, aru ngin ya nappasingan nga anti-Cristo. Yan ya pakakammuan tera nga aranni ngin ya pangultimuan. 19Ya kunna tian ira nga totolay, netadday ra bitan kan ittera, ngam pinanawan da ittera, gafu ta mari ra megitta kan ittera. On, gafu ta, nu megitta ra kan ittera zinan, mannanayun da zinan kan ittera. Ngam gafu ta pinanawan da ittera, yan ya pakakammuan nga ira ngammin, mari ra megitta kan ittera. 20Ngam neddan y Cristo kan ikayu ya Espiritu Santo, en ikayu ngammin gafen, ammu nun ya kurug. 21Natturak nak kan ikayu, mari megafu ta mari nu ammu ya kurug, nu azzi gafu ta ammu nun, en ammu nu pay nga awan nga laddud nga maggafu kan ya kurug. 22Innia gafen ya malladdud? Ya innia laman nga makkahi nga bakkan kan y Jesus ya Cristo. Iggina ya anti-Cristo, ya mammari kan ya Anak, en iyammari na pay ya Ama. 23Ya innia laman nga mammari kan ya Anak, awan ya Ama kan iggina. Ngam ya innia laman nga makkahi nga mangurug iggina kan ya Anak, hinnian ya Ama kan iggina. 24Ngam pannayunan nu kan ikayu pe laman ya nagina nu namegafu kattu gafagafu. Nu mannayun kan ikayu ya nagina nu namegafu kattu gafagafu, mannayun kayu kan ya Anak en kan ya Ama pay. 25En yaw ya netabba ya Anak kan ittera, angat nga awan na nga panda. 26Neturak ku ira yaw kan ikayu tase pemmuhuran ta kayu kan ya mangilohot ira kan ikayu. 27Mannanayun nga makipaddian kan ikayu ya Espiritu Santo nga nalawat nu kan ya Anak, en mari mawag gafen kan hinnian tanakkuan nga mattuldu kan ikayu, gafu ta iggina ya mattuldu kan ikayu kan me-annung kan ngammin nga ganagannud. Kurug ya ituttuldu na, en mari laddud. Mannanayun kayu kan y Jesu Cristo kan kagitta ya netuldu ya Espiritu Santo kan ikayu. 28Sangaw, anak ku ira, mannanayun kayu kan y Jesu Cristo, tase so nu mappasingan iggina, mammallad tera en mari tera mappasiran nga umaranni kan iggina nattaruk nu manoli iggina. 29Nu ammu nu nga natunung iggina, ammu nu pay kan siguradu nga, ngammin ya maka-angngua kan natunung, ira ya anak y Afu Dios.

will be added

X\