1 Corinto 9

1Awan kazze/pano paka-awayyak? Marik kazze apostol? Marik kazze nasingan y Jesus nga Afu tera? Mari kazze kan ikayu ya resulta ya trabahuk para kan iggina? 2Maski hinnian/asan dudduma/karruan nga mari mangikuenta kan yakan kan apostol, kurug nga ikuenta rak kan apostol, gafu ta, ya neketadday nu kan y Afu ya pamakurug nga apostol nak. 3Yaw ya panefensak kan yakan pe laman kan ya mamanunut ira kan yakan. 4Awan kazze nga paka-awayya mi nga meddannan kan makan en menum? 5Awan kazze paka-awayya mi nga mangivulun kan atawa nga wahi kan pangurug kan kagitta ya kuan ya dudduma nga apostol ira en y Cefas pay nga ne-ammawan/nengahanan kan Pedro en ya wawwahi y Afu Jesus? 6Yakan en y Bernabe kazze laman ya mawag kan mattrabahu kan pakkatolayan? 7Hinnian kazze suddalu nga maggasto pe laman kannia asserbi na kannia assuddalu na? Innia ya mammula nga mari mangan kan ya vunga ya nemula na? Innia ya minappastor kan aya-ayam nga mari minum kan ya gattak da? 8Ira yan nga negagangay nga kukukuan ya totolay, ira yan kazze laman ya pamakurug kan ya kayan ku? Awan. Neturak yan pay kan ya dorob y Afu Dios. 9On, gafu ta nepeturak na kan y Moises kan ya dorob na nga kunna, "Marim fututan ya ayam nga mangaggik." Ayam kazze laman ya ikayat y Afu Dios nga matanggaw? Awan. 10Kurug nga kinahi na yaw megafu kan ittera. Nepeturak na yan para kan ittera, gafu ta, ya maradu en ya mangapit, mattrabahu ra zinan nga sigga-innanama ra nga mebillayan da kan ya apit. 11Nu nammula kami kan na-espirituan nga ganagannud kan ikayu, maturuk kazze kan ya mepangngat nu mangapit kami kan namateriyalan nga ganagannud kan ikayu? 12Nu hinnian paka-awayya ya dudduma nga mennanama kan meddannan da kan ya pakkatolay ra, azzi mas peba gafen kan ikami. Ngam mari mi ne-usa yan nga paka-awayya mi, nu azzi ata-attamman mi ngammin ya mesissimmu kan ikami, tase mari mi makakua kan kegafanan ya zi angngalawat ya totolay kan ya napia nga dumug y Cristo. 13Mari nu kazze ammu nga, ya totolay nga minasserbi kan ya templo y Afu Dios, maggafu ya pakkatolay ra kan ya templo; en ya totolay nga minasserbi kan ya angngiyofresian/angngidedikan ya totolay kan ya iddan da kan y Afu Dios, mebillayan da kan ya me-ofresi? 14Kunna tian pay ya nemandu y Afu Dios, maggafu ya pakkatolay ya minangngipalappat ira kan ya napia nga dumug kan ya angngipalappat da kan yan. 15Ngam marik ne-usa ya hanna laman kan ira yan nga paka-awayyak, en mari na kan yaw ya gafu na kan neturak ku ira yan, gafu ta hinnian innanamak nga makua yan para kan yakan. On, gafu ta mas ikayat ku ya matay annek/ngam kan mazza ya kegafanan ya appeddarayok. 16On, gafu ta, ya angngipalapalappat ku kan ya napia nga dumug, nu yan laman ya kukukuan ku, awan nga kegafanan ya appeddarayok gafu ta mawag kan kukukuan ku yan, gafu ta anakkue/kallallak nak pay nu marik ipalapalappat ya napia nga dumug. 17Nu kukukuan ku yaw segun kan ya urek pe laman, hinnian balat ya angnguak kan yaw nga meddan kan yakan. Ngam nu marik uru-uray pe laman, mapammakatalakkan nak gafen nga mangngua kan ya natunnakkan ku. 18Hanna gafen ya balat na kan yakan? Yaw laman: Kannia angngipalappat ku kan ya napia nga dumug, marik iyusa ya paka-awayyak kan ya napia nga dumug, ikayat ku nga kayan, marik makitandan. 19Awan nga annungan ku, nu azzi kuenta nakikohung nak kan ngammin, tase mas aru peba ya mapabbalin ku kan mangurug kan y Jesu Cristo. 20Kannia kasan ku kan ya Judio ira, vuluvulunan ku ya kustumbre ra ira, tase mapabbalin ku kan mangurug da kan y Jesu Cristo. Kannia kasan ku kan ya totolay nga hinnian kan ya paka-awayya ya dorob y Moises, vuluvulunan ku pay ya kustumbre ra ira segun kan ya dorob, maski awan nak kan ya paka-awayya na, tase mapabbalin ku kan mangurug da kan y Jesu Cristo. 21Kannia kasan ku kan ya totolay nga awan kan ya paka-awayya ya dorob, vuluvulunan ku pay ya kustumbre ra ira, tase mapabbalin ku kan mangurug da kan y Jesu Cristo. Marik kayan nga awan nga kuenta ya dorob y Afu Dios kan yakan, nu azzi hinnian nak kan ya paka-awayya ya dorob y Cristo. 22Kannia kasan ku kan ya totolay nga mari peba kuru makantindi, vuluvulunan ku pay ya kustumbre ra ira, tase mapabbalin ku kan mangurug da. Kannia kasan ku kan ngammin nga totolay, vuluvulunan ku pay ya kustumbre ra ira, tase hinnian dudduma kan ira nga mapalliad. 23Kuan ku ngammin ira yaw para laman kan ya napia nga dumug, tase mesipat nak kan ya bendision na ira. 24Mari nu kazze ammu nga, kan ya pareha, mappaladdiaw ngammin ya makippareha ira, ngam isissa laman ya makalawat kan premio? Kunna tian pay, kukukuan nu ya panda mawayya nu kannia assesserbi nu kan y Afu nga megitta kan makippareha, tase makalawat kayu kan premio. 25Kada atleta, istrikto nga vuluvulunan na ya disiplina kan ngammin nga kukukuan na. Kuan da yan tase makalawat da kan korona, korona nga madaral mamba laman. Ngam kukukuan tera yan tase makalawat tera kan premio nga mari madaral. 26Kannia assesserbik kan y Afu, megitta nak kan makippareha nga madderederettio kan ya pantay. Megitta nak kan boksingeru nga mari manintut/mangaddug laman kan angin, 27nu azzi bitibituhan ku en patapatulukan ku ya baggik pe laman, tase kabalin ya angngipalappat ku kan ya napia nga dumug kan ya ikattolek, marik mapamammari nga mangalawat nattaruk kan premio.

will be added

X\