1 Corinto 7

1Nu me-annung kan ya povut ira nga neturak nu, yaw ya metabbag ku. Napia nu mari mangatawa ya innia laman nga lalaki. 2Ngam megafu kan ya panentasion ya addallaw, mepangngat kan hinnian/asan atawa ya kada lalaki en ya kada babay. 3Mepangngat kan kuan ya lalaki ya annungan na kan ya atawa na, en kunna tian pay kan ya babay. 4On, gafu ta bakkan kan ya babay ya mammoray kan ya baggi na pe laman nu azzi ya atawa na. Kunna tian pay kan ya lalaki, bakkan kan iggina ya mammoray kan ya baggi na pe laman nu azzi ya atawa na. 5Mari zinan kayan ya innia laman kan ya atawa na nga mari na ikayat nga maddurug da, fera laman nu makka-anahut da nga mari ra maddurug be laman tase iyusa ra ya tiempo ra kan ya addasal da. Kabalin na, awayya na nga maddurug da manin, senannu mari tentasionan y Satanas ira nga maddallaw gafu ta mari ra mafuwaddan ya ikayat ya gibbaggian da. 6Neturak ku yan kan pangipamavulun, mari na kan mandu. 7Ikayat ku nga mabbalin zinan ngammin ya totolay kan megitta kan yakan. Ngam hinnian/asan pe laman makua ya kada isa nga neddan y Afu Dios kan iggina, en mari parehu ngammin. 8Sangaw, yaw ya iturak ku kan ya totolay nga awan da peba gi-attawan en kan ya babalu. Mas napia nu massige ra nga megitta kan yakan nga awan nga atawak. 9Ngam nu mari ra mafuwaddan ya ikayat ya gibbaggian da, mangatawa en makitawa ra zinan. On, gafu ta mas napia nu mangatawa onu makitawa ra annek/ngam kan masidug da. 10Sangaw, hinnian mandu nga kayan ku kan ikayu nga sigga-atawan, ngam bakkan kan yakan ya mammandu nu azzi y Afu Jesus, kan mari igungay ya babay ya atawa na. 11Ngam nu igungay na, mawag kan mari na uli makitawa ngin, ngam awayya na uli mattoli kan ya atawa na peba. En kunna tian pay, imanduk kan mari papanawan ya lalaki ya atawa na. 12Yaw ya iturak ku sangaw kan ya dudduma/karruan. Yakan pe laman ya makkahi, bakkan kan y Afu. Nu hinnian lalaki nga mari mangurug ya atawa na kan y Jesus, nu umanahut ya babay nga massige ya aggatawa ra, mari na zinan papanawan iggina. 13En nu hinnian babay nga mari mangurug ya atawa na kan y Jesus, nu umanahut ya lalaki nga massige ya aggatawa ra, mari na zinan igungay iggina. 14Awayya na yaw gafu ta, ya lalaki onu babay nga mari mangurug kan y Jesus, mebilang kan narenu kan ya paningan y Afu Dios ya aggatawa ra megafu kan ya atawa na nga mangurug kan iggina. Nu mari zinan kurug yaw, mebilang zinan ya gi-anakan nu pay kan mari narenu kan ya atubang na. Ngam gafu ta kurug yaw, mebilang da kan narenu. 15Ngam ya mari mangurug kan y Jesus, nu igungay na ya mangurug kan iggina, pavulunan ya mangurug. Nu kunna tian, mari na mafersa nga massige nga mangibilang kan atawa na. On, gafu ta ikayat y Afu Dios kan memamak ya attolay tera. 16Ikaw nga babay nga mangurug, ammum kazze/pano nu ikaw ya kegafanan ya kapalliad ya atawam? Ikaw pay nga lalaki nga mangurug, ammum kazze nu ikaw ya kegafanan ya kapalliad ya atawam? 17Mawag kan isigisige ya kada isa ya mattolay kan ya situasion na nga nanunnakkan y Afu Dios kan iggina, yan ya attolay na kattu inakkulan y Afu Dios iggina. Yaw ya ituttulduk kan ya totolay kan ngammin nga iglesia. 18Nu nakugit ngin ya isa nga lalaki kattu nakkulan iggina, mari na zinan kakkapan ngin nga ipapolit ya gaddang na tase mabbalin kan mari nakugit. En nu mari na peba nakugit kattu nakkulan iggina, mari na mawag kan mappakugit. 19Nu nakugit ya tolay onu mari nakugit, awan nga importa na, ngam ya importante, ya ammaraparulot na kan ya bilin ira y Afu Dios. 20Mawag kan isigisige ya kada isa ya mattolay kan ya situasion na kattu nakkulan iggina. 21Kohung ka kazze kattu nakkulan ka? Awan nga importa na, ngam nu awayya na kan mapalussaran ka, mas napia. 22On, gafu ta, ya kohung nga nakkulan nga netadday kan y Afu, napalussaran nga tolay y Afu ngin. Kunna tian pay, ya tolay nga mari kohung nga nakkulan, kohung y Cristo ngin. 23Nagatang kayu kan nangina nga presio; mari nu gafen makikohung kan totolay. 24Wawwahik ira, maski hanna ya situasion ya kada isa kan ikayu kattu nakkulan kayu, massige kayu nga mattolay kan kunna tian kan ya neketadday nu kan y Afu Dios. 25Nu me-annung kan ya maginganay ira, awan nga bilin y Afu, ngam hinnian sangaw itabarang ku kan ikayu, en mapammakatalakkan nak megafu kan ya allak y Afu Dios. 26Megafu kan ya ziyat ya attolay kan sangaw, mas napia nu isige ya innia laman ya negagangay nga situasion na. 27Nu hinnian atawa mun, marim panonotan nga igungay. Nu awan peba atawam, marim panonotan ya mangatawa. 28Ngam nu mangatawa ka, mari mabbalin kan liwat mu. En nu makitawa ya innia laman nga maginganay, mari mabbalin kan liwat na. Ya sigga-atawan ira, mazziyariyat da kan yaw nga mundo, en ikayat ku nga mari mesimmu yan kan ikayu. 29Wawwahik ira, yaw ya ikayat ku nga kayan, ababba ngin ya tiempo nga matalan/mabattang. Gaggafen, mamegafu kan sangaw, ya lallaki nga hinnian gi-attawan dan, mattolay ra zinan nga alale awan nga gi-attawan da. 30Ya marandam ira, mattolay ra zinan nga alale mari ra marandam. Ya mayayat ira, mattolay ra zinan nga alale mari ra mayayat. Ya maggatang ira, mattolay ra zinan nga alale mari ra kua ya ginatang da. 31Ya mangiyusa ira kan ya ganagannud kan yaw nga mundo, mari ra zinan panonotan ira yan laman, gafu ta mapawan ngin ya kasinnan na yaw nga mundo. 32Neturak ku yan gafu ta ikayat ku nga awan nu nga pavvuruvurungan. Ya tolay nga awan na nga atawa, agganonot na ya ganagannud y Afu, nu annianna/kunnasi/manna ya ammayayat na kan y Afu. 33Ya sigga-atawan, agganonot na ya ganagannud ya mundo, nu annianna ya ammayayat na kan ya atawa na, 34en megafu kan yan, mabillay ya panonot na. Ya babay nga awan na nga atawa onu ya maginganay, agganonot da ya ganagannud y Afu tase mapabbalin ya gibbaggian da en ya gikkaralluan da kan nasantuan. Ngam ya nakitawa, agganonot na ya ganagannud ya mundo, nu annianna ya ammayayat na kan ya atawa na. 35Neturak ku yan kan pammakapianan nu, mari na kan pangigammak kan ya ikayat nu nga kukukuan, nu azzi tase kanakanayun kuan nu ya mepangngat en makapayayat ira kan y Afu nga awan nga mangifuwad. 36Nu hinnian lalaki nga mangabbat kan mari mepangngat ya kuan na nga me-annung kan ya maginganay na, en nu nasikan ya ginustuan na, en nu mawag kan mesimmu, awayya na nga kuan ya ikayat na nga akkasal da, mari liwat. 37Ngam ya lalaki nga nasikan ya nonot na, en nu awan nga annungan na, nu azzi hinnian paka-awayya na nga mangngua kan ya uray na, en nu zinisidi na yaw kan ya nonot na pe laman nga passigeyan na ya babay kan maginganay, napia ya kuan na. 38Gaggafen, ya innia laman nga iyatawa na ya maginganay nga anak na, napia ya kuan na. Ngam ya mari mangiyatawa, mas napia ya kuan na. 39Ya babay nga hinnian atawa na, atawa na iggina panda katolay ya atawa na. Nu natay ngin ya atawa na, awayya na nga makitawa uli kan maski innia nga ikayat na basta isa nga mangurug kan y Jesus ya paki-atawan na. 40Ngam yaw ya itabarang ku, mas mayayat iggina nu massige iggina nga balu, en kan ya attabarang ku, abbattan ku kan hinnian ya Espiritu Santo kan yakan.

will be added

X\