1 Corinto 6

1Nu hinnian/asan isa kan ikayu nga hinnian kaso na kontra kan ya isa nga wahi na kan pangurug, mari kazze/pano kappasiran nu umang na idemanda iggina kan hues nga mari makakammu kan y Afu Dios, imbes kan ipareglo na kan ikayu pe laman nga totolay y Afu Dios? 2Mari nu kazze ammu nga ya totolay y Afu Dios ya mamanunut nattaruk kan ya totolay kan ya mundo? Gafu ta ikayu ya mamanunut kan ya totolay kan ya mundo, mari kazze mepangngat nga areglowan nu pe laman ira yan nga bissang/bissut laman nga kaso? 3Mari nu kazze ammu nga maski anghel ira, panunutan tera nattaruk? Yammanno ngin kan ya ganagannud kan ya kagalgaw nga attolay tera. 4Nu hinnian kunna tian ira nga kaso kan ikayu, ka-am ta angkayu idemanda ira yan kan ya totolay nga awan kan ya iglesia y Afu Dios? 5Neturak ku yan kan ikayu tase pasiranan ta kayu. Awan kazze laman ngin kan ikayu nga masirib nga awayya na disidian ya kaso nu nga maggurwahi kan pangurug? 6Ngam ya isa nga wahi, idemanda na bitu ya isa nga wahi na kan pangurug, en kuan na yan kan ya atubang ya mari mangurug ira. 7Ya akkarademademanda nu, yan ya naffutan nu kan ya angngurug nu. Mari kazze mas napia laman ngin nu attamman nu ya kelloko en kadarogat nu? 8Ngam mismu ikayu bitu ngin ya mangili-illoko en maddaradarogat, en maski ya wawwahi nu kan pangurug pe laman ya pangnguanan nu balattan! 9Mari nu kazze ammu nga, ya mangilloko ira, mari ra makatallung kan ya pappatulan y Afu Dios? Mari nu ilohot ya baggi nu pe laman. Ya totolay nga maddallaw, maddayarayaw kan rebultu, mamabay onu makilalaki, lallaki nga taddayan da ya kagitta ra pe laman nga lallaki onu babbay nga taddayan da ya kagitta ra pe laman nga babbay, 10makkokot, massamsam/mahagum, melellaw, mamaraparakat, onu tulisan, mari ra makatallung kan ya pappatulan y Afu Dios. 11Hinnian dudduma/karruan kan ikayu nga naka-angngua kan kunna tian kattun. Ngam napakarennuan kayun, napabbalin kayun kan nasantuan en napatunung kayun megafu kan ya pakapangngua y Afu Jesu Cristo en ya Espiritu ya Dios nga Ama tera. 12Hinnian dudduma nga makkahi nga kunda, "Ngammin, mepamavulun kan yakan." Kurug yan, ngam mari kurug nga ngammin, pammakapianan. Kunda nga makkahi, "Ngammin, mepamavulun kan yakan." Kurug yan, ngam marik mapatuluk kan hanna laman. 13Hinnian peba makkahi nga kunna, "Ya makan, para kan ya sinay, en ya sinay, para kan ya makan." Kurug yan, ngam ira yaw nga dua, pabbalinan y Afu Dios nattaruk kan awan da nga serbi. Ngam ya baggi, mari para kan paddallaw, nu azzi para kan passerbi kan y Afu Jesus, en y Afu Jesus ya mammoray kan ya baggi. 14Pinagginnolay y Afu Dios iggina, en pagginnolayan na ittera pay nattaruk megafu kan ya pakapangngua na. 15Mari nu kazze ammu nga, ya gibbaggian nu, parte ira ya baggi y Cristo? Awayya na kazze nga malak ya isa nga parte ya baggi y Cristo, en metadday kan ya baggi ya isa nga minakkipaga? Awan! 16Mari nu kazze ammu nga, nu taddayan ya isa nga lalaki ya isa nga minakkipaga, mabbalin da nga dua kan isa nga baggi? On, gafu ta kunna kan ya Sagrado nga Turak, "Ya dua nga baggi, mabbalin kan kuenta isa nga baggi laman." 17Ngam ya tolay nga metadday kan y Afu Jesus, mabbalin da nga dua kan isa nga espiritu. 18Ibita nu ya addallaw gafu ta, ya dudduma nga liwat nga kukukuan ya innia laman, mari na afektan ya interu baggi na. Ngam ya maddallaw, ya baggi na mismu ya palliwatan na. 19Mari nu kazze ammu nga, ya gibbaggian nu, ira ya templo ya Espiritu Santo nga neddan y Afu Dios nga maddian kan ikayu? Bakkan kan ikayun ya makakkua kan ya gibbaggian nu, 20gafu ta ginatang na kayu y Afu Dios kan nangina nga presio. Gaggafen, iyusu-usa nu ya gibbaggian nu kan paddayarayaw nu kan y Afu Dios.

will be added

X\