1 Corinto 5

1Kuru madumudumug nga hinnian/asan kan ikayu nga mamabay, ikayat ku nga kayan, hinnian lalaki nga mamabay kan ya atawa ya ama na. Maski ya totolay nga mari makakammu kan y Afu Dios, mari ra mangngua kan kunna tian. 2En mappangapangas kayu peba balattan. Maramarandam kayu zinan, en inazzan nu zinan kan ya iglesia nu ya nangngua kan kunna tian. 3Maski awan nak kannian, ikuentak kan hinnian ya espirituk kan ikayu kannian, en pinanunutan kun ya nangngua kan kunna tian nga alale hinnian nak kannian nga hinnian kan yakan ya paka-awayya y Jesus nga Afu tera. 4Marammung kayu, en ikuenta nu kan hinnian ya espirituk kan ikayu, en hinnian pay ya pakapangngua y Jesus nga Afu tera kan ikayu, 5en iyalawat nu yan nga tolay kan ya paka-awayya y Satanas, tase madaral yan nga narakat/napot nga akkelug ya baggi na, senannu mapalliad ya karallua na nattaruk kan ya algaw y Afu. 6Mari mepangngat ya appeddarayaw nu. Mari nu kazze/pano ammu nga ya bissang/bissut nga lebadura, pappafan na ya interu nga namasa nga arina? 7Azzan nu kan kompleto ya narakat kan ikayu nga ke-angngarrian ya dana nga lebadura, tase mabbalin kan megitta kayu kan bahu nga namasa nga awan na nga lebadura, gafu ta kurug nga megitta kayu kan yan ngin. En yaw pay, y Cristo nga kuenta karneru kan ya Fiesta ya Nepattalebad nga kanan tera, ne-ofresi/nededika nga napatay ngin. 8Selebran tera gafen ya Fiesta ya Nepattalebad nga kanan tera kan karenu en kakurruan nga ke-angngarrian ya pan nga awan nga lebadura na, mari na kan narakat en liwat nga ke-angngarrian ya dana nga lebadura. 9Neturak ku kan ikayu nga mari nu makikavulun kan totolay nga maddallaw. 10Marik ikayat nga kayan ya totolay kan yaw nga mundo nga maddallaw, massamsam/mahagum, makkokot, onu maddayarayaw kan rebultu ira, gafu ta, nu mari nu makikavulun kan ira, fersadu nga panawan nu yaw nga mundo, 11nu azzi ya ikayat ku nga kayan, mari nu makikavulun kan ya innia laman nga makahi kan wahi tera kan pangurug, nu maddallaw, massamsam, maddayarayaw kan rebultu, mamaraparakat, melellaw, onu makkokot, en mari nu makipangan kan ya totolay nga kunna tian. 12Awan nga paka-awayyak nga mamanunut kan ya totolay nga awan kan ittera. Ya hinnian kan ittera kan ya iglesia ya panunutan nu zinan, azze/awan kasi? 13Y Afu Dios ya mamanunut kan ya totolay nga awan kan ittera. Kunna kan ya Sagrado nga Turak, "Papanawan nu ya narakat nga tolay kan ya ammung nu."

will be added

X\