1 Corinto 4

1Ya pangikuentan zinan ya totolay kan ikami, serbidor y Cristo en ingkargadu kan ya sekreto nga bilin y Afu Dios. 2Ya isa nga ingkargadu, mawag kan mapammakatalakkan. 3Kan yakan, mari importante nu ikayu onu ya innia laman ya mamanunut kan yakan. Maski peba kan yakan, marik awayya nga panunutan yakan pe laman. 4Maski awan nga ammuk nga narakat/napot kan yakan, marik mebilang kan natunung megafu kan yan, gafu ta y Afu Dios ya mamanunut kan yakan. 5Gaggafen, mari nu mamanunut kallie ya allabbet ya fustu nga algaw nga annoli y Afu Jesus. Ipakammu na ya mari nammuan nga arig nesussuk kan kokopan/kallap, en palattuaran na ya gakkad ira ya totolay. Kan yan nga algaw, alawatan nattaruk ya kada isa ya mepangngat nga kedayaw na nga maggafu kan y Afu Dios. 6Wawwahik ira, kan ira yaw nga neturak ku, ne-usak yakan en y Apolos kan pa-ehemplo para kan ya pammakapianan nu, tase kan ikami, magilammu nu ya kebalinan na yaw nga akkayanan, "Ya neturak laman ya mepangngat nga vuluvulunan nu." Ya ke-aplika na yan kan yaw, awan zinan kan ikayu nga mangidayaw kan ya isa annek/ngam kan ya isa. 7Innia ya namabbalin kan ikayu kan maddumuruma? Hanna ya hinnian/asan kan ikayu nga mari nu nalawat kan y Afu Dios? Nu nalawat nu ngammin, ka-am gafen ta mappalagopog kayu nga alale mari neddan kan ikayu? 8Ibilang nu mamba nga hinnian ngin kan ikayu ngammin ya mawag nu, en kan riku kayun kan na-espirituan nga ganagannud, en kan mammoray kayun, maski ikami nga apostol, mari mi peba mammoray. Kuru ikayat ku nga mammoray kayu zinan ngin, tase mesipat kami pay nga mammoray. 9On, gafu ta, kan ya nonot ku, pinabbalin y Afu Dios ikami nga apostol ira kan kalinakkan kan kekuentan. Mekuenta kami kan masentensian kan patay kan ya pararruan ya totolay, en nabbalin kan girawan da kami ya mundo, ya anghel ira en ya totolay. 10Abbattan da kan ulapa kami megafu laman kan ya asserbi mi kan y Cristo, ngam ikayu, abbattan nu mamba kan masirib kayu megafu kan y Cristo. Abbattan da kan nakafi ya ginnonotan mi, ngam ikayu, abbattan nu kan nasikan ya ginnonotan en ya gi-angnguruhan nu. Abbattan nu kan me-ekakua kayu, ngam awan mi nga kekakua. 11Addet kan sangaw, naming aru kami nga nabisin en nawwaw, mari napia ya gissinnunan mi, nabubbubbug kami, awan nga gibbalayan mi, 12en nasigura kami nga nattrabahu kan ya sikan mi pe laman. Mo-oyaw kami, ngam ikikkiddaw mi kan y Afu nga bendisionan na ira. Mapazapaziyat kami, ngam ata-attamman mi. 13Maparaparakat kami, ngam nalumamak kami nga manabbag. Addet kan sangaw, mekuenta kami kan guwak en gamak laman kan ya mundo. 14Neturak ku ira yan, mari na kan pasapasiranan ta kayu nu azzi tabarangngan ta kayu nga ibilang ku kan medduk nga anak ku ira. 15On, gafu ta, maski nu mafulurivu ya mangigiya kan ikayu kan ya attolay nu kan y Cristo, isissa laman ya ama nu. On, gafu ta kuenta ginakak ya bahu nga attolay nu kan y Cristo kattu nepalappat ku ya napia nga dumug kan ikayu. 16Ipakimallak ku kan ikayu gafen kan parrian dak. 17Yan ya gafu na kan binon ku kan ikayu y Timoteo nga ibilang ku kan anak ku kan y Afu nga ideddukan ku en pammakatalakkan ku. Iparandam na kan ikayu ya katakatolek kannia neketaddek kan y Jesu Cristo. Ya prinsipio ira nga vuluvulunan ku kan ya katakatolek, ira yan ya ituttulduk kan ya mangurug ira kan kada iglesia kan kada lugar. 18Hinnian dudduma/karruan kan ikayu nga mappangapangas gafu ta abbattan da maffugab kan marik umang kan ikayu kannian. 19Ngam mari mabbayag, mattoli nak kan ikayu nu uray y Afu, en mammuan ku ya pakapangngua ira yan nga mappangapangas, en mari na kan ya ergo ra laman. 20On, gafu ta, ya appatul y Afu Dios, mari na kan ergo laman, nu azzi kan pakapangngua. 21Hanna gafen ya ikayat nu? Annak kazze/pano kannian nga konsu pisi, onu konsu ayat en simpat?

will be added

X\