1 Nu me-annung kan ya akkolekta nu kan ikayu kan uffun para kan ya totolay y Afu Dios kan Judea, kuan nu ya megitta kan kunna tiaw nga kinahik kan ya iglesia ira kan ya probinsia ya Galacia. 2 Kada Liggu, ya kada isa kan ikayu, mangisinna zinan kan kuartu nga kepangngattan ya natafulan na, en arimanan na, tase dana naparan ya iyuffun nu so nu lumabbet nak kannian. 3 So nu makalabbet nak kannian, bonan ku ya totolay nga pinili nu nga mangiyangay kan ya iyuffun nu kan Jerusalem, en ipevulun ku pay kan ira ya turak ku nga mangiyam-ammu kan ira kan ya totolay kannay. 4 En nu mapanonot ku nga napia ya aggangek pay, mevulun da kan yakan. 5 Kannia abbiahek, massibal/maddahat nak bitan kan ya lugar ira kan ya probinsia ya Macedonia, en kabalin na, annak kan ikayu, gafu ta zinisidik nga annak bitan kan Macedonia. 6 Ikayat ku nga mabbayag nak nga makipaddian kan ikayu, maffugab addet kan ya pangultimuan ya tiempo lammin. Awayya rak gafen nga uffunan nga maggannukat kan ya metunud nga abbiahek, maski kanna be tiaw nga angayan ku. 7 On, gafu ta marik ikayat nga massibal nga makissingisingan kan ikayu kan sangaw kan manganannuan laman, gafu ta innanaman ku nga makipaddian nak kan ikayu kan mabayag nu uray y Afu Dios. 8 Ngam massige nak nga maddian be laman kan yaw nga siudad ya Efeso addet kan ya Fiesta Pentecostes. 9 On, gafu ta aru ya oportunidad ku kanniaw nga masserbi kan y Afu, ngam aru pay ya manuriya kan yakan. 10 Nu makalabbet y Timoteo kan ikayu, alaban nu iggina kan napia, gafu ta isa iggina nga massesserbi kan y Afu Dios kan kagittak. 11 Mari nu zinan imenos iggina, nu azzi uffunan nu iggina lahud nga maggannukat, tase napia en memamak ya abbiahe na en makatoli iggina kan yakan, gafu ta talattaronan ku iggina en ya wawwahi tera kan pangurug. 12 Nu me-annung kan y Apolos nga wahi tera, netotolik kan iggina nga mevulun iggina kan ya wawwahi tera nga umang mabbisita kan ikayu. Ngam mari na peba ikayat ya umang, nu azzi umang so nu hinnian/asan lugar na. 13 Malerto kayu; patuyaggan nu ya angngurug nu; maggutuk/matturid/mattaggad kayu; massikan kayu. 14 Ngammin ya kukukuan nu, kuan nu nga sigga-ayat. 15 Sangaw, wawwahik ira, ammu nu nga y Estefanas en ya kabbalay na ira ya unu-unna nga nangurug kan y Afu Jesus kan ya probinsia ya Acaya, en napafutu ya assesserbi ra kan ya totolay y Afu Dios. 16 Wawwahik ira, ipakimallak ku kan ikayu kan makimoray kayu kan ira en kan ya kagitta ra en kan ya innia laman nga makipattrabahu kan ira en mabbannabannag. 17 Mayayat nak kannia nepallabbet ira Estefanas, Fortunato en y Acaico, gafu ta ira ya mangibaggi/mangitadag kan ikayu kannia kawan nu kanniaw. 18 Binanabannayan da ya nonot ku kan kagitta ya kiningngua ra kan ikayu. Mepangngat kan ikakua nu ya kunna tiaw ira nga totolay. 19 Ya miembro ira kan ya iglesia ira kan ya probinsia ya Asia, ipe-addet da ya diot da kan ikayu. Y Aquila en y Priscila en ya wawwahi tera nga kanakanayun nga marammung kan ya balay ra, diot da pay kan ikayu kan napafutu megafu kan ya neketattadday tera kan y Afu Jesus. 20 Ngammin ya wawwahi tera kanniaw, diot da pay kan ikayu. Makkarakikkiddiot kayu kan nasantuan nga amma. 21 Yakan, y Pablo, ya nangiturak kan yaw, diot ku kan ikayu ngammin. 22 Nu hinnian tolay nga mari mangayat kan y Afu, meged/mebanu/melunud. O Afu mi, pare zinan ta manoli kan! 23 Pare zinan ta hinnian ya allak y Afu Jesus kan ikayu. 24 Ayatan ta kayu ngammin megafu kan y Jesu Cristo. Amen!
