1 Corinto 14

1Kuan nu ya panda mawayya nu tase dumakal ya ayat nu. Keluhan nu zinan ya ne-eruma nga pakapangngua ira nga iddan ya Espiritu Santo, nepatalluaring ya pakapangngua nga mangikahi kan ya ipakahi ya Espiritu Santo. 2On, gafu ta, ya innia laman nga mergo kan perergo nga mari na mamba ginilammu, makiergo iggina kan y Afu Dios, mari na kan totolay, gafu ta awan nga makantindi kan ya kayan na, nu azzi megafu kan ya pakapangngua ya Espiritu Santo, mergo iggina kan mari nammuan onu mantindian. 3Ngam ya innia laman nga mangikahi kan ya ipakahi ya Espiritu Santo, makiergo iggina kan totolay, tase mapasikan ya angngurug da, mapagutuk/mapaturid/mapataggad da, en mabannayan da. 4Ya innia laman nga mergo kan perergo nga mari na mamba ginilammu, pasikannan na ya angngurug na pe laman, ngam ya mangikahi kan ya ipakahi ya Espiritu Santo, pasikannan na ya angngurug ya totolay kan ya iglesia. 5Ikayat ku nga meddannan kayu ngammin kan pakapangngua nu nga mergo kan perergo ira nga mari nu mamba ginilammu, ngam mas ikayat ku peba nga meddannan kayu kan pakapangngua nga mangikahi kan ya ipakahi ya Espiritu Santo. Mas napia ya angngikahi ya tolay kan ya ipakahi ya Espiritu Santo annek/ngam kan ya aggergo na kan perergo ira nga mari na mamba ginilammu fera laman nu hinnian/asan mangibalittag kan ya kayan na tase mapasikan ya angngurug ya totolay kan ya iglesia. 6Ngam sangaw, wawwahik ira, nu annak kan ikayu nga mergo kan perergo ira nga marik mamba ginilammu, hinnian kazze/pano pammakapianan nu nga malawat nu kan yakan? Awan vulvua/pulus, fera laman nu hinnian kayan ku kan ikayu nga ipakammu y Afu Dios, onu ya ganagannud na, onu ya ipakahi na, onu ya tuldu nga maggafu kan iggina. 7Maski ya instrumentu ira nga awan da nga angat, aggangarrian, flauta onu arpa, nu mari napia ya katuka ya kada nota, annianna/kunnasi/manna ya pakakammu ya maggina ira nu hanna ya sunata nga matuka? 8En yaw peba. Nu mari nanawag ya kapaguni ya trumpeta ya suddalu ira, awan kan ira nga mapparan nga umang makiggerra. 9Kunna tian pay kan ikayu, nu mergo kayu kan perergo nga mari nu ammu, annianna ya pakantindi ya maggina ira kan ya kayan nu? Alale makiergo kayu laman kan angin. 10Kurug nga napakaru ya maddumuruma nga perergo kan ya utun lusak, en hinnian kebalinan ya kada isa. 11Ngam nu marik ammu ya kebalinan ya ergo ira ya innia laman nga makiergo kan yakan, dayu nak kan iggina, en dayu iggina kan yakan pay. 12Kunna tian pay kan ikayu, gafu ta keluhan nu ya ne-eruma nga pakapangngua ira nga iddan ya Espiritu Santo, keluhan nu zinan gafen ya ne-eruma nga pakapangngua ira nga mas mamasikan kan ya angngurug ya totolay kan ya iglesia. 13Gaggafen, ya innia laman nga mergo kan perergo nga mari na mamba ginilammu, idasal na zinan nga meddan kan iggina ya ne-eruma nga pakapangngua na nga mangibalittag kan ya kayan na. 14Nu maddasal nak kan perergo nga marik mamba ginilammu, maddasal ya espirituk, ngam mari moffunan ya nonot ku. 15Hanna gafen ya kuan ku? Kannia addasal ku, maggafu ya dasal ku kan ya espirituk en kan ya nonot ku pay. Kannia akkansion ku nga maddayarayaw kan y Afu Dios, maggafu ya kansion ku kan ya espirituk en kan ya nonot ku pay. 16Nu marim vuluvulunan yan nga prinsipio, nu azzi maggafu ya addasal mu kan ya espiritum laman, ya totolay nga mari neddannan kan pakapangngua nga makantindi, annianna ya annabbag da kan "Amen" kan ya appabalat mu, nu mari ra mantindian ya kayan mu? 17On, gafu ta, maski nu napia ya addasal mu nga mappabalat, mari mapasikan ya angngurug ya kakavulun mu. 18Mappabalat nak kan y Afu Dios gafu ta mas makapergo nak kan perergo ira nga marik mamba ginilammu annek kan ikayu ngammin. 19Ngam kan ya iglesia, mas ikayat ku ya mergo kan lima nga ergo nga maggafu kan ya nonot ku tase matulduan ku ya maggina ira annek kan mergo nak kan mafulu rivu nga ergo kan perergo nga mari ra mantindian. 20Wawwahik ira, mari nu umaba-abbingan zinan kan ya appanonot nu. Parrian nu ya abbing ira nga mari ra ammu ya narakat/napot, ngam mammanakam kayu zinan ngin kan ya appanapanonot nu. 21Kunna kan ya Sagrado nga Turak, "Ya totolay nga mergo kan tanakkuan nga perergo, en ya gibbibihan ya dayu ira, ira ya pakiergok kan ya totolek. Maski kunna tian ya kuan ku, mari rak gigginan," kunna y Afu Dios. 22Gaggafen, ya serbi ya aggergo kan perergo ira nga mari nagilammu, pattestigu kan ya mari mangurug ira, bakkan kan ya mangurug ira. Ngam ya pakapangngua nga mangikahi kan ya ipakahi ya Espiritu Santo, ya serbi na, pattestigu kan ya mangurug ira, bakkan kan ya mari mangurug ira. 23Sangaw, nu marammung ya interu nga iglesia kan isa nga lugar, en nu mergo kayu ngammin kan perergo nga mari nu mamba ginilammu, en nu hinnian tumallung nga totolay nga tanakkuan onu mari mangurug, mari ra kazze kayan nga ulapa kayu? 24Ngam nu ikayu ngammin, kayan nu ya ipakahi ya Espiritu Santo, en nu hinnian tumallung nga tolay nga mari mangurug onu tanakkuan, mammuan na nga minalliwat iggina megafu kan ngammin nga kayan nu; mapanunutan iggina pe laman megafu kan ngammin nga kayan nu, 25en ya sekreto na nga hinnian kan ya kononaggan ya futu na, mammuan. Megafu kan yan, mallakab iggina, dayarayawan na y Afu Dios, en kunna nga makkahi, "Kurug nga hinnian y Afu Dios kan ikayu." 26Wawwahik ira, hanna sangaw ya pattumpalan na? Kannia aggarammung nu nga maddayarayaw kan y Afu Dios, hinnian kuan ya kada tolay. Hinnian makkansion; hinnian mattuldu; hinnian mangikahi kan ya ipakahi ya Espiritu Santo; hinnian mergo kan perergo nga mari na mamba ginilammu, en hinnian mangibalittag kan ya kayan ya mergo kan perergo nga mari na mamba ginilammu. Makua zinan ngammin ira yaw kan pamasikan kan ya angngurug ya totolay kan ya iglesia. 27Nu hinnian mergo kan perergo nga mari na mamba ginilammu, dua onu tallu laman zinan ya mangngua kan yan, en matturubbat da zinan, en mawag kan hinnian mangibalittag kan ya kayan da. 28Ngam nu awan nga makebalittag kan ya kayan ya isa, memamak iggina zinan laman ngin kan ya iglesia, en makiergo iggina zinan kan ya nonot na pe laman en kan y Afu Dios. 29En ya profeta ira, dua onu tallu laman ya mergo, en ya dudduma/karruan nga mari mergo, usisan da zinan ya kayan da. 30Ngam nu hinnian maddaggun nga mergo, en hinnian sangaw ipakammu ya Espiritu Santo kan ya isa kan ya aggatuttud ira, memmang zinan ya unna nga mergo. 31Awayya nu ngammin nga matturubbat nga mangikahi kan ya ipakahi ya Espiritu Santo tase matulduan en mapagutuk ngammin ya totolay. 32En awayya ya profeta ira nga gaggaddan ya ne-eruma nga pakapangngua nga neddan ya Espiritu Santo kan ira. 33Y Afu Dios, mari Dios gulu nu azzi Dios imamak. Ya kustumbre ya totolay y Afu Dios kan ngammin nga iglesia ira, 34kunna tian zinan, memamak ya babbay kan ya iglesia ira. Mari mepamavulun kan mergo ra kan ya iglesia, nu azzi makimoray ra zinan segun kan ya neturak kan ya dorob. 35Nu hinnian ikayat da nga mammuan, povutan da zinan kan ya gi-attawan da kan ya gibbalayan da, gafu ta kappasiran nu hinnian babay nga mergo kan ya unag ya iglesia. 36Ikayu kazze ya naggafanan ya ergo y Afu Dios? Onu ikayu kazze laman ya nekayanan na? 37Nu hinnian tolay nga mangabbat kan profeta iggina, onu abbattan na nga hinnian kan iggina ya pakapangngua nga neddan ya Espiritu Santo, mammuan na zinan nga mandu y Afu ya neturak ku kan ikayu. 38Nu hinnian mari umanahut kan ya neturak ku, mari nu anahutan ya kayan na. 39Sangaw, wawwahik ira, keluhan nu zinan ya ne-eruma nga pakapangngua nga mangikahi kan ya ipakahi ya Espiritu Santo, en mari nu gamman ya innia laman nga mergo kan perergo ira nga mari na mamba ginilammu. 40Mawag kan kanakanayun nga kuan nu ngammin nga ganagannud kan mepangngat en nenggud.

will be added

X\