1 Corinto 10

1Wawwahik ira, ikayat ku nga mammuan nu ya kinikkingngua ya ginafu mi ira nga Israelita nga ne-evulun kan y Moises en ya nesissimmu kan ira kattun. Naliruman da ngammin kan ya kunam, en nanalan da ngammin kan ya naddatanan/nallatanan ya naggaddua nga bebay nga minang kan ya tangapingit. 2Nabawtisowan da ngammin nga netadday kan y Moises. Ya nekalehut da kan ya kunam en ya bebay, yan ya nekabawtiso ra. 3Parehu ya kinikkinnan da ngammin nga naggafu kan langit, 4en parehu ya ini-ininum da ngammin nga neddan y Afu Dios, gafu ta naggafu ya ini-ininum da kan ya na-espirituan nga batu nga ne-evulun kan ira, en nay nga batu, y Cristo. 5Ngam maski kunna tiaw peba ya napasan da, aru kan ira ya mari namayayat kan y Afu Dios. Nanawag yan gafu ta nepesimmu na kan nakkakatay ra kan ya disierto. 6Sangaw, ira yan nga nesissimmu, mappapalan/mappemuhud kan ittera, tase mari tera zinan parrian ya nepakkelug da kan narakat/napot. 7Mari nu maddayarayaw kan rebultu ira kan kagitta ya kiningngua ya dudduma/karruan kan ira. Kunna kan ya Sagrado nga Turak, "Nanuttud ya totolay tase mangan en minum kan ne-ofresi/nededika kan rebultu, en luminakkat da tase mabbarayle ra." 8Mari tera zinan maddallaw kan kagitta ya kiningngua ya dudduma kan ira, gafu ta duafulu se tallu nga rivu (23,000) ya nakkakatay kan isa nga algaw laman gafu ta kiningngua ra yan. 9Mari tera zinan purban ya pasensia y Afu kan kagitta ya kiningngua ya dudduma kan ira, gafu ta napatay ra kan zita ziriyan ira gafu ta kiningngua ra yan. 10Mari nu makarerreklamo kan kagitta ya kiningngua ya dudduma kan ira, gafu ta, megafu kan yan, ya minammatapatay nga anghel, pinatapatay na ira. 11Nesissimmu ira yan kan ira nga peskramentan, en neturak pay kan pappapalan kan ittera nga matolay kan sangaw nga tiempo, nga mappanget nga mangultimu ngin. 12Gaggafen, nu hinnian/asan tolay nga mangabbat kan nasikan ya angngurug na, memmuhud iggina zinan tase mari na matanag/makabok kan liwat. 13Ya katentasion nu, negagangay laman nga katentasion ya totolay. Mapammakatalakkan y Afu Dios nga mari na ipamavulun kan mas nasikan ya katentasion nu annek/ngam kan ya mawayya nu nga mattamman, nu azzi nu matentasion kayu, mangiddan iggina pay kan pangibita nu kan ya katanag nu. 14Gaggafen, wawwahik ira, mari nu maddayarayaw kan rebultu ira. 15Kannia nepangngiturak ku kan ira yaw, nekuentak kan makakkammu kayu. Ikayu mismu ya maddisidi nu kurug ya neturak ku. 16Mari tera kazze/pano mesipat kan ya daha y Cristo kannia agginum tera kan ya maddian kan ya kopa nga pappabalattan tera? Kunna tian pay, mari tera kazze mesipat kan ya baggi y Cristo kannia angngan tera kan ya pan nga gaddagadduan tera? 17Gafu ta isissa ya pan nga kanan tera, maski napakaru tera, kuenta isissa tera nga baggi, gafu ta passiripattan tera ya isa nga pan. 18Panonotan nu yaw nga me-annung kan ya Israelita ira. Ya totolay nga mangan kan ya ne-ofresi kan y Afu Dios, mari ra kazze mesipat kan ya angngiyofresian? 19Hanna gafen ya ikayat ku nga kayan? Kayan ku kazze nga hinnian kekuentan ya isa nga rebultu onu ya makan nga ne-ofresi kan rebultu? 20Awan, nu azzi ikayat ku nga kayan, ya iyofresi ya pagano ira, iyofresi ra kan narakat nga espiritu ira, bakkan kan y Afu Dios, en marik ikayat kan mesipat kayu kan narakat nga espiritu ira. 21Mari na awayya nga minum kayu kan ya maddian kan ya kopa y Afu Jesus en minum kayu pay kan ya maddian kan ya kopa ya narakat nga espiritu ira. Kunna tian pay, mari na awayya nga makipangan kayu kan y Afu Jesus en makipangan kayu pay kan ya narakat nga espiritu ira. 22Pangavavuan tera kazze y Afu Jesus? Mas nasikan tera kazze annek kan iggina? 23Hinnian dudduma nga kunda nga makkahi, "Ngammin, mepamavulun." Kurug yan, ngam mari ngammin, pammakapianan. Kunda nga makkahi, "Ngammin, mepamavulun." Kurug yan, ngam mari ngammin, pasikannan na ya pangurug ya wawwahi tera. 24Ya kada tolay, innan na zinan ya pammakapianan ya ikattolay na imbes kan ya pammakapianan na pe laman. 25Awayya nu nga mangan kan ya hanna laman nga karne nga malaku kan plasa, en mari mawag kan povutan nu ya naggafanan na, en povutan nu yan megafu kan ya gikkonsensian nu. 26On, gafu ta kunna kan ya Sagrado nga Turak, "Ya lusak en ngammin ya maddian ira kanniaw, kukua y Afu Dios." 27Nu hinnian mari mangurug nga mangimbita kan ikayu nga angkayu makipangan kan ya balay na, en ikayat nu ya umang, awayya nu mangan kan hanna laman nga metunnad, en mari mawag kan povutan nu ya naggafanan na megafu kan ya gikkonsensian nu. 28Ngam nu hinnian mangikahi kan ikayu nga ne-ofresi kan rebultu ya metunnad kan ikayu, mari nu panganan megafu laman kan yan nga tolay, en megafu laman kan konsensia, 29ikayat ku nga kayan, ya konsensia ya tanakkuan, bakkan kan ya konsensiam pe laman. Maffugab povutan mu, "Ka-am ta magamman nak nga mangan megafu kan ya konsensia ya tanakkuan? 30Nu mappabalat nak mamba kan y Afu kan ya angngan ku, ka-am ta maparakat nak megafu kan ya pappabalattan ku?" 31Gaggafen, nu mangan onu minum kayu onu hanna laman nga kuan nu, kanakanayun nga kuan nu ngammin kan ya kedayarayaw y Afu Dios. 32Mari nu mangngua kan kegafanan ya alliwat ya Judio ira, ya mari Judio ira, onu ya totolay kan ya iglesia y Afu Dios. 33Kunna tian ya kanakanayun nga kuan ku, en kuan ku ya panda mawayyak nga manguffun kan ngammin nga totolay kan ngammin nga napia nga marik tafulan ya pammakapianan ku pe laman nu azzi ya pammakapianan ya maru tase mapalliad da.

will be added

X\