1 Corinto 1

1Yakan y Pablo nga pinabbalin y Afu Dios kan apostol y Jesu Cristo segun kan ya uray na. Yakan en y Sostenes nga wahi tera kan pangurug, 2diot mi kan ikayu nga iglesia y Afu Dios kan ya siudad ya Corinto. Napabbalin kayu kan nasantuan kannia neketadday nu kan y Jesu Cristo en nakkulan kayu tase mabbalin kan nasantuan. Diot mi pay kan ngammin nga totolay kan ngammin nga lugar nga maddayarayaw kan y Afu tera nga Jesu Cristo, iggina ya Afu ra en ya Afu tera pay. 3Pare zinan ta hinnian/asan kan ikayu ya allak en imamak nga maggafu kan ya Dios nga Ama tera en kan y Afu Jesu Cristo. 4Kanakanayun nga mappabalat nak kan y Afu Dios megafu kan ikayu megafu kan ya nepangngikallak na kan ikayu megafu kan y Jesu Cristo, 5gafu ta pinabbalin na kayu kan riku kan ngammin nga na-espirituan nga ganagannud, nepatalluaring kan ya pakakammu nu en kan ya angngikahakahi nu kan ya bilin na megafu kan iggina. 6Nesimmu yan gafu ta nesiguradu ngin kan ikayu ya pattestigu mi kan y Cristo. 7Megafu kan yan, mari nu makkurang kan hanna laman nga ne-eruma nga pakapangngua nga iddan ya Espiritu Santo kannia attalattaron nu kan ya annoli y Afu tera nga Jesu Cristo 8nga mangisiguradu pay kan ya angngurug nu addet kan pangultimuan nga awan nga kapaliwatan nu nattaruk kan ya algaw y Afu tera nga Jesu Cristo. 9Mapammakatalakkan y Afu Dios nga nangakkul kan ikayu tase metadday kayu kan y Afu tera nga Jesu Cristo nga Anak na. 10Wawwahik ira, megafu kan ya paka-awayya y Jesu Cristo nga Afu tera, ipakimallak ku kan ikayu nga parehu zinan ya kayakayan nu ngammin, mari nu massirinna, en pakesan nu ya ginnonotan en gi-urayan nu. 11Wawwahik ira, neturak ku yan gafu ta hinnian dudduma/karruan kan ya kabbalay ira y Cloe nga nangidanug kan yakan nga hinnian paggurungutan nu. 12Ya ikayat ku nga kayan, hinnian dudduma kan ikayu nga makkahi, "Tolay nak y Pablo." Hinnian pay makkahi, "Tolay nak y Apolos." Hinnian pay makkahi, "Tolay nak y Pedro." Hinnian pay makkahi, "Tolay nak y Cristo." 13Nadibidi kazze/pano y Cristo? Yakan kazze ya nepatak kan kurut para kan ikayu? Nabawtisowan kayu kazze kan ya ngahan ku? 14Mappabalat nak kan y Afu Dios gafu ta awan nga binawtisowan ku kan ikayu nu azzi y Crispo en y Gayo laman. 15Awan gafen nga makapakkahi nga nabawtisowan kayu kan ya ngahan ku. 16En yaw peba ya binawtisowan ku, y Estefanas en ya kabbalay na ira. Marik kerandamman ngin nu hinnian peba tanakkuan nga binawtisowan ku. 17Binon nak y Cristo, mari tase mamawtiso nak, nu azzi tase ipalapalappat ku ya napia nga dumug. En marik mangiyusa kan ergo ira nga kinasirib tolay tase mari mabbalin kan awan nga serbi ya kurut y Cristo. 18Ya totolay nga mari mapalliad, abbattan da kan kolapa/talping ya ergo nga me-annung kan ya nepappatay y Jesus kan kurut. Ngam ittera nga mapalliad, ammu tera nga yan nga ergo ya pakapangngua y Afu Dios. 19Kunna kan ya Sagrado nga Turak, "Darallan ku ya sirib ya masirib ira, en pabbalinan ku kan awan nga serbi ya ka-utak ya ma-utak ira." 20Nu kunna tian gafen, hanna ya serbi ya masirib ira? Hanna ya serbi ya mestru ira kan ya dorob? Hanna ya serbi ya totolay kan yaw nga mundo nga malallaki nga makiddibate? Nepakammu y Afu Dios nga, ya nemundowan nga kinasirib, kolapa. 21Segun kan ya sirib y Afu Dios, bakkan kan ya kinasirib tolay ya pakakammuan da kan iggina, nu azzi uru-uray y Afu Dios pe laman nga palliaran na ya mangurug ira megafu kan ya napia nga dumug nga ipalapalappat mi nga ibilang ya dudduma kan kolapa. 22Ya Judio ira, ikayat da nga hinnian milagro ira nga mepasingan kan ira nga pamakurug, en ya Griego ira, manafataful da kan kinasirib. 23Ngam kan ikami, yaw laman ya ipalapalappat mi, y Cristo nga nepatak kan kurut. Yan nga ipalapalappat mi ya kegafanan ya kesikadul ya Judio ira en ya ibilang ya mari Judio ira kan kolapa. 24Ngam kan ittera nga nakkulan, Judio onu Griego, y Cristo ya pakapangngua y Afu Dios en ya sirib na. 25On, gafu ta, ya ibilang ya totolay kan kolapa y Afu Dios, mas masirib annek/ngam kan ya kinasirib tolay. En ya ibilang da kan pakkafiyan y Afu Dios, mas nasikan annek kan ya sikan tolay. 26Wawwahik ira, panonotan nu ya addia-addian nu kattun, kattu inakkulan na kayu y Afu Dios. Segun kan ya anningan ya totolay, mari kuru aru kan ikayu ya masirib, mari kuru aru kan ikayu ya hinnian paka-awayya ra, mari kuru aru kan ikayu ya atanang ya kekuentan da. 27Ngam pinili y Afu Dios ya ganagannud nga ikuenta ya totolay kan kolapa tase pasapasiranan na ya totolay nga mangabbat kan masirib da, en pinili na ya ganagannud nga ikuenta ya totolay kan nakafi tase pasapasiranan na ya totolay nga mangabbat kan nasikan da. 28En pinili na ya ganagannud kan yaw nga mundo nga alinak ya kekuentan da en ya ganagannud nga memenos, en ya ganagannud nga awan da nga kekuentan, tase pabbalinan na kan awan nga kuenta ira nay nga hinnian kekuentan da. 29Kiningngua na yan tase awan nga makapappalagopog kan ya atubang na. 30Ngam megafu kan iggina, netadday kayu kan y Jesu Cristo. Megafu kan y Jesu Cristo, iniddannan y Afu Dios ittera kan sirib, pinatunung na ittera, pinabbalin na ittera kan nasantuan, en sinavvut na ittera, 31tase matumpal ya neturak kan ya Sagrado nga Turak nga kunna, "Ya innia laman nga mallagaw, y Afu Dios zinan ya ilagaw na."

will be added

X\