TITO 1

1Ánuú Paulo barwaárí ngina gooiím. Aníng a sagadiyusmoó Mungú nee ya/abusmoó Yesu Kristo. Aníng tina tsawaár nee tina ya/aáw as múk Mungú aa tsawaár nguwa alee/iis iwa haratlintii'i nee iidíguú looeema nguwa xuiya', kudá' hariím as Mungú kuwa ilaiwawa/i, 2nee sleeme as haraxu'utír slafíngw alhhe'eesay wásl kawa slay, kudá' Mungú aa qaroó geerí al'axweés iimír iimu/úngw wa ale. Mungú lama gaa ooiiká. 3Gawaá adoorihe, qoomaadá' iwa bó/, Mungú Ya/abtoorós gari geehhooeés, tidá' tinda aníng i saayín nee Mungú Ba/amusmoorén as ngiwa alki/iit. 4Tito, kuúng a garmaaeé' oo kilá' baraá haratlintaaoorí ta koomaana. Aníng barwaárí ngina amoorók gooiím. Mungú Baabuúrén nee Kristo Yesu, Ba/amusmoorén, kuúng u tsuuqi, nee u waydí haniisi. 5Án kuúng una yaamaá Kretér i geexáw as gadiyeédá' aa met kawa alhhe'es, ak alé bariisee kawa qas baraá umuúqo gixsaro, ar adoodá' aníng kuúng ura hara'ayiím. 6Geeraharusmoó múk Kríshaanáy masók a heé xaslxaansli wásl. Heé hare wák, nee na/'iiwós masók a na/'aá haratlintaaór koomá', awa ta daanda kaahiiká muruú tlakwe. Inooín masók a fuquuseerooká laqaá kudá' ilaiwa/amér kooma'aaká. 7Asma geeraharusmoó múk Kríshaanáy inós gadiyér Mungú kaa dabaawós i qaás. Gawaá adoorihe a gár hariím inós tawa heé xaslxaansli wásl. Inós masók a heé ti kilós sla'atimisaaká, nee a heé buhhta inslaahheeká, masók a xuufutusmoowooká nee a gilusmoowooká. Nee slám masók a heé slaasláwár mure ga sla'aaká. 8Ala inós masók a heé múk dahi'iimís, nee heé hhooeemaá slaá'. Nee masók a heé qoomoó koóm, nee heé gan'amuú koóm. Nee slám masók a heé hhoohhoó' oo ti kilós harmagagaáhh. 9Inós masók a heé axweesantá haratlintaao gaa oh, adoodá' kura intsaahhatimís, as muu nguwa aleeslay gurbu'uungo ar axweesantadár ló', nee múk axweesantadá' ga siaasií' nguwa ar ba/i. 10Asma dirhunge múk yaariír i deer oo ilaiwa/ame wásl, ak alé kudá' taa al/utlín. Inooín axweesanoó lamtá tawo kun axweemaamiis, as múk hatlá' kuwa al/agin. 11Mukwí ku afee tseegi. Asma inooín múk maraá muu ngun sageeqwaareemisiyá' as intsaahhasár lama ngiwa intsaahhatimisiya' ar mure wasl, as inooín slaasláw kawa slay. 12Heé ayaaín, nee slám a aarusmooín oo kilá' ina oó', “Múk Krete a lamuuse umuúqo deelooro, inooín a makaá tlakw, slám a hheehhuusér tli/uuse.” 13Tí aarusmoowí aa oó' ar ló'. Gawaá adoorihe, kuúng inooín iigahhaateek ló'wa ale ar xaraasleema, as inooín masók a múk aa kwaa/ baraá haratlintaaooro, 14nee tiitár múk Yahudi makawa iiár i qamín, laqaá hara'ayár muu makawa eeharahaár, kudá' looeema gaa sii'. 15Mura' sleémeero ku hhohhó' dír mukdá' hhohhoe, ala gár hhoohhoo' i káhh dír mukdá' slasla/arene, kudá' haratlintaaór kooma'aaká. Asma fuqurangw'ín kwaa slasla/aareés, nee muner'ín sleeme. 16Inooín ta kaahi atén Mungú u xuaán, ala inooín Mungú ku siaasii' ar tlehhemi'ii'ín. Inooín a múk aa dee/aanuut ló'wa ale, tam múk hatlá' in xinanii' as inooín. Tam gár hhoo' tleehhamooro ar i aleeslaya' i káhh.

will be added

X\