RUMI 7

1Hhaee'eé', kuungá' hara'aya a xuá', nee slám a xuá' gídaabá hara'aya i aleesleemuú koón daanduú heewo, qoomár hee bir slaaf. 2/Ameenír taa duúx, inós kaa tseék nee hara'aya, dír hhawaatuú i alé, qoomár hhawaata bir slaaf. Ala hhawaata bira gwaá', inós daqaní kaa gweér baraá hara'ayaadá' inós gaa tsek dír hhawaatuuwo. 3Ala barka óh dír hhawaatuú hatlá', qoomár hhawaatuuwós bir slaaf, inós daqaní ka bay a /ameenír tsaatuso'o. Ala bar hhawaatuuwós aa gwaá', inós daqaní kaa gweér baraá hara'ayaro, nee inós tam ka duuxi nee hhawaatuú hatlá', hara'ayár duuxo gaa meeriiká eeharto. 4Kuungá' sleeme a adoosíng, hhaee'eé'. Asma adoodár Kristo ira gwaá', kuungá' sleeme ana qatlé', nee slám kuungá' a baraá waawuti'iimár hara'ayár i dir'a'aaká. Kuungá' a múk heé hatlá', kudá' naa waaslee/ baraá múk aa qaátl wa ale. Gawaá adoorihe tlehhema'aá hhohho' in tleehhaán awa Mungú ngu qwal/atisá'. 5Qoomár atén tawa warqawaniiká, ilatleerír tlakweema tidá' taa tleemiís nee hara'aya, ina gadiyús baraá slaqoorén wa ale, tam atén tlehhema'aá gwa'arár huwahuwá' kiri tleehhaán. 6Ala hám atén taa gweér baraá hara'ayaaro, asma atén aga qatlaán dír hara'ayaadá' atén taa tsegi. Hám daxta atén Mungú un sagadiyuusaán ar loohír /aben, gídaabá ar Qeeruú hhoohhoó', ala ar loohír aangeeká, tidár hara'ayaadá' taa gooín kawa eeharaharaan. 7Ala atén gár taa ooaan a milá? Hara'aya a tlakweemaáwo? Aasla'áy a tlakweemaawooká. Ala án geeraawo tlakweema tsaahharo i aleeslawaaká hara'aya bir káhh. Án geeraawo ilatleeri a tsaahhaaká bar hara'aya iga beeriká, “Ma ilatleeruusaar.” 8Tlakweema hara'aya ngina ar gadiyuusiyé', ilatleerír dimbadimbé ngiri tleesiyé' baraaeé' wa ale. Asma hara'aya bir káhh, tlakweema naa gwaaiyé'. 9Aníng aáng a slaáf, niwa hara'ayár koomaaká. Nee hara'aya niwa hardát tlakweema niri slafiyé', 10ala aníng niri gwaá'. Gawaá adoorihe hara'ayaadá' slafiingw geera ngu huuw, gár naa húp dir'eene an gwa'ara. 11Asma hara'aya niwa hardát, tlakweema pa/aangw nguri slayé', aníng iri al/ayiyé', iri gaasiyé' ar hara'ayaadá'. 12Gawaá adoorihe hara'ayár Musa ka hhoohhoo', nee hara'aya sleeme ka hhoohhoo', slám i ganá' nee ka hhoo'. 13Ala hara'ayaarí hhoo' gwa'ara ngina húbi dir'eene? Aasla'áy a hara'ayaarooká, a tlakweema gwa'ara ngina huwiyé'. Ala tlakweema hara'ayaadá' hhoo' ngina ar gadiyusiyé', as aníng iwa gaasiya'. Gawaá adoorihe hara'aya tlakweema ngina laqaán gídaabá a gár tlaakw ló'wa ale. 14Atén a xuaán gídaabá hara'aya loohirós a ar baraá qeeru. Ala aníng a heé slaqwa, tina weeriís adór lawaalmoó tlakweema. 15Asma muruuwí án ni tlehhahhiit aníng u tsatsahhaamaaká. Muruudá' ni slaa' tleehhamooro u tleehhaaká, ala muruudá' naa aáhh, an kudá' ni tlehhiit. 16Ala barnaxes aníng muruudá' ni sla'aaká un tlehhiít, aníng an ya/a/aám gídaabá hara'aya ka hhoo'. 17Gawaá adoorihe heé muruuwí tlehhahhiít a aningeeká, ala a tlakweemaadá' baraaeé' wa hootá'. 18Asma aníng aga xuú' gídaabá, gár hhoo' ar baraaeé' wa hoot i káhh, gídaabá baraá slaqwte'eé'. Tidá' hhoo' ngiwa tleehh a slaá', ala tleehhamooro a aleeslawaaká. 19Asma tidá' hhoo' ni tleehhamór wa slaa' a tlehhiitaaká, nee tidá' tlaakw ar ni tleehhamór wa sla'aaká, an tidá' ni tlehhiit. 20Ala tidá' ni tleehhamór wa sla'aaká, bar an tidá' ni tlehhiit, heé ga tlehhiít a aningeeká, ala a tlakweemaadá' baraaeé' wa hootá'. 21Gawaá adoorihe aníng aga tsaáhh gídaabá hara'ayaarí aníng in sa waawuti'iín gídaabá, tidá' hhoo' a slaá' tleehhamooro, ala gár aníng i iihardarah an tidá' tlaakw. 22Asma aníng baraá muunuúeene hara'ayár Mungú an sa qwalalaá/. 23Ala baraá slaqwte'eene gár naa ár a hara'ayár hatlá'. Hara'ayaarí i sláqw nee hara'ayaadá' baraá muunuúeén i dirii'. Asma hara'ayár tlakweema i gadiyús baraá slaqwte'eé' wa ale, aníng iri tsék. 24Gawaá adoorihe aníng a liitlakusmo. Ador'eé' tí ka ló'wa gawit. Heé aníng i ba/amís dír slaqwtír gwa'araaro a heemá? 25Mungú i xirfuuti. Ba/amusmo u koóm, Yesu Kristo Aakoorén. Ala barnaxes a adoorí, ánuú kilá' hara'ayár Mungú an sagadiyuús ar muunuúeé', nee hara'ayár tlakweema an sagadiyuús baraá slaqwte'eene.

will be added

X\