RUMI 3

1Ala gawaá adoorihe heé Yahudi gár i ak kon a milá? Nee al/utlo gár i bu' a milá? 2Gár i bu' i ló'wa deer umuúqo barto. Gár har geera a Mungú axweesantós gana dír múk Yahudír i saayín. 3Ala baraaine bar bahh'alé i inkihhimuúb kona'aaká, adoorí daqaní a adoomá? A gídaabáhe inkihhimuú Mungú in kahhuúti daxta as inkihhimuuín wasle? 4Aasla'áy, adoosingeeká. Ala gár ta warqeesiiká a tí gídaabá, Mungú inós a inkihhimusmo, umuúqo hee baraá yaamuuwo tam lamusmoowo. Asma kaa gooín gídaabá, “Kuúng bar axwés, axweesanaywók masók ku tsaahhi gídaabá, a axweesanoó ganaa', nee kuúng tawa baaliin baraá kwasleemaro.” 5Ala bar tlakweemaarén gan'amuú Mungú ngun geehhooeemisiyá', atén gár ta ooaan a milá? A gídaabáhe Mungú gár ganaa'aaká gaa tleéhh, as sakwasleemarós ngiwa huúw daandeemoorén i alé? (Gaarí ana axweés ar adoodá' muu ir axweemaamisi.) 6Aasla'áy. Asma Mungú geera bar gan'amusmoowooká, geera muu sakwasleemaro adór ngur aleeslay a adoomá? 7Ala lamte'eé' barnaxes gár i laqaqaan a looeemaá Mungú, inós kuri xirfayeés as lamte'eé', aníng daqaní gár tis sakwasleemuuti tlakusmoó wa ale. 8Ala bar adoosíng, an ooána gídaabá, “Tlakweema i tleehhaán as hhooeema iwa hardahiya'.” Múk atén ti kaantiím bahh'alé gaa káh sleeme gídaabá, atén gár ta intsaahhatimisaan a tí. Inooín ki sakwasleemuut ar sakwasleemár hariim. 9Ala ateéká' múk Yahudi gár tsiní ar ta koomaan i deéro ta múk xoordaá hatlae? Ala i káhh. Asma aga qaroó ooaán gídaabá muu sleémeero, bar múk Yahudi laqaá múk xoordaá hatlá', sleémeero ta baraá waawuti'iimár tlakweemaá i dirii'. 10Adór kara gooín gídaabá, “Heé ganaá' i kaahh tumu wák. 11Heé sagalooár koóm i kaahh, slám heé Mungú leelehhiít i kaahh. 12Muu sleémeero aa paásl baraá loohír Munguhe, sleémeero naa qwaariyé'. Heé hhooeema gi tlehhiít i kaahh tumu wák. 13Hhehhuuín a adór /aantár piintsiyaá/. Al/ayma kan axwees ar tsifreeri'ín. Gawaá afer'ine gár ti'imiit a qarkwá dayshe. 14Baraá afer'ine gár aa hats a lu'umis nee qarqaraay. 15Ya'aaín i gaansliná' as tseerdaá muu kiwa ku'uusi. 16Hhitiru'uuma nee slahha'amaaye i deer baraá lohuuine, didá' inooín nira waarahhii'i. 17Slám loohír wayda inooín ka xuiiká. 18Slám ilaiwa/amér Mungú kuwa ilaiwawa/i i káhh dir'ine.” 19Ala a xuaán gídaabá axweesanaydá' sleémeero hara'aya i kat, kwaa oó' dír mukdá' sleémeero oo baraá waawuti'iimár hara'ayár wa hoót. Gár axweesanaywí oo hara'aya kusa oó', a gídaabá umuúqo heewo kuwa xasltisi, nee muu sleémeero kuwa sakwasleemuuti nee Mungú. 20Asma heé ta gan'amkuú i harafaari dír geerá Munguhe i kaahh, ar loohír tlehhema'aá hara'aya, asma hara'aya gár i bu' dír heewo, a tlakweemaawós gin laqaaqaán as ngiwa tsaahhi. 21Ala daxta loohír hatlá' kaa geehhooeés, ar Mungú hee nguwa gan'amkú i harafaari. Gan'amuuwí ku slayká ar hara'aya. Gan'amuuwí an kudá' Musa nee aaruuse aáng naa lamabu'uné'. 22Mungú gan'amuuwí gun hanmiis dír umuúqo heewo oo Yesu Kristo gwa haratlintii'. Ku hanmiis dír umuúqo heewo as haratlintaao. Asma barqaanti i káhh. 23Asma muu sleémeero tlakweema gaa tleéhh, nee xirfuú ta kon i kaahh dír geerá Munguhe. 24Mungú gina tawó gan'amuú i harafaár ar gurtleemuuwós. Gár adoorí ngira tleéhh a gadiyér gwedit, tidá' Yesu Kristo aa tleéhh ar muu kuwa gweeri. 25Mungú Yesuwí nguna haniís, as gurtleemuú tlakweema inós nguwa múk i slay ar gwa'araarós. Hee gurtleemuuwí gun sláy bar Yesu ngwa haratlintií'. Mungú adoorí gana tleéhh as loohirós ngiwa laqan ar hee nguwa gan'amkú i harafaari. Asma aáng Mungú tlakweemaá muu gina sa qiqtlín, baraá qartadá' aa waarahhi. 26Ala gawaá qoomaarihe loohirós gan laqaamár wa slaa', ar hee nguwa gan'amkú i harafaari. Inós gár i slai a kun tsaahh iwa gan'amuú kon, nee heé Yesu gwa haratlintii', nguwa gan'amuú i harafaari. 27Gár tas daara/aamaan a milá ala? Gár tas daara/aamaan i káhh. Asma milá? Gár adoorí ga laqaaqaam a hara'aya gaalá? A hara'ayár tlehhemi'iíwo? Aasla'áy, gár adoorí ga laqaaqaam a hara'ayár haratlintaao. 28Asma aga araán gídaabá, hee kun gan'amuú i harafaar ar haratlintaao, ala ar tlehhema'aá hara'ayarooká. 29Laqaá Mungú an Mungú múk Yahudi kilóse? Ahaá, a Mungú múk xoordaá hatlaeekáhe sleeme? Eeít, inós a Mungú múk xoordaá hatlá' sleeme. 30Asma Mungú a wak. Inós múk Yahudi kudá' taa al/utlín, gun gan'amuú i harafadiit as haratlintaaor'ín. Nee múk xoordaá hatlá' sleeme, kudá' taa al/utlinká, gun gan'amuú i harafadiit ar loohír haratlintaaor'ín. 31Gawaá adoorihe atén hara'aya an warqeemisaána ar haratlintaaoorí? Aasla'áy. A warqeemisaanaaká ala an gawdeemisaán.

will be added

X\