RUMI 2

1Kuúng, mulqumooeé', kuúng a múk hatlá' sakwasleemúta? Ala bar adoorihe, kuúng tam heemahe, kuúng gár ta tlank i káhh. Qoomár kuúng bar múk hatlá' sakwasleemút, a kuúng tin kilók sakwasleemút. Asma kuúng muruú ta tlehhit a kuduú kilá' oo kuúng ta sakwasleemut. 2Ala atén a xuaán gídaabá Mungú adór ganaa' gaa tleéhh, múk tlehhema'aá adoorí bur ngwa sakwasleemuút. 3Mulqumooeé', kuúng múk tlehhemi'iiká' gi tlehhahhiít un sakwasleemút. Ala kuúng kilá' baré tlehhemi'iikaáká' in tlehhaahhít. Kuúng ka xu', sakwasleemár Mungú a báqa? 4Laqaá kuúng hhooeemaá Mungú kudá' yaariir nee qiqtliingós nee daamaaraangós, in waqaaqá'a? Slám a xu'ukáhe gídaabá hhooeemaá Mungú kuúng un uuruxuná' as tawa hhu'u'un. 5Ala kuúng muunuúwók ku gawít, nee slám muunuúwók hhu'u'uungw gu slaiiká. Ala gawaá adoorihe kuúng xarasleemaá Mungú in gawaawók i tlahhamís ay bál sakwasleemár Mungú, baldá' sakwasleemár ganaa' ar Mungú kawa geehhoeesi. 6Asma Mungú umuúqo heewo gu buu' ar hariímár tlehhemi'iiwós. 7Ala bahh'alé xirif nee ilaiwa/ame nee hhitiru'uuma wasle ngina leelehhiitiyé' ar qiqtliingw baraá tlehhema'aá hhoe. Mungú slafíngw alhhe'eesay wásl gu haniis dír múk adoorí. 8Ala awa hatlá' a múk qahuuse. Inooín looeema ngina si'iyé' as muruú ganaa'aaká nguwa eeharahariya'. Mungú buhhtaawós nee xarslamaayeerós ga ku'uus gawaá múk adoorí. 9Muu sleémeero oo tlakweemaá tlehhaahhiít, gusisiingw nee slahha'amaaye gi sláy. Múk giiriím a múk Yahudi, ala tam múk Yunani sleeme. 10Ala mukdá' sleémeero oo hhooeemaá tlehhahhiít, Mungú gun xirfuú i haniis, nee ilaiwa/ame nee wayda. Múk giiriím a múk Yahudi, ala tam múk Yunani sleeme. 11Asma barqaanti i káhh dír Munguhe. 12Mukdá' hara'ayár Musa ga xuaaká, ala tlakweema kay tleéhh, inooín ki sakwasleemuut, ala tam hara'aya ka xuiikahe. Mukdá' hara'ayár Musa ga xuú', ala tlakweema kay tleéhh, inooín ki sakwasleemuut ar hara'ayaadá'. 13Asma múk ta gan'amuú i harafaari nee Mungú, a gídaabáheeká an kudá' hara'aya gaa axaas, ala múk ta gan'amuú i harafaari, an kudá' adoodá' hara'aya i kat gaa tlehhiít. 14Asma tam múk xoordaá hatlá', kudá' hara'ayár Musa ngi kooma'aaká, inooín baraá tlehhemi'ii'ine gár ta tleehhi a tidá' hara'ayár Musa i kat. 15Slafingw'ín ga laqaaqán gídaabá muruudá' hara'aya i kat kwaa gooín baraá muner'ín i alé. Asma tam muner'ín nee inslaway'ín adoorí ngi laqaaqaná'. Asma inslaway'ín oo kilá' inooín gin sakwasleemuut, laqaá gin aleekal/án. 16Adoorí an adoodá' tleehharuut bál Mungú bar lu/aaroó baraá munér muu gu sakwasleemuut ar baraá Yesu Kristo. Gaarí an adoodá' Ya/abtór hho' i kat, tidá' aníng ni alki/iit. 17Xáy kuúng a adoomá? Kuúng a daara/aán asma kuúng tawa heé Yahudi. Kuúng gár ta i tliintí' a hara'ayár Musa. Nee slám kuúng an daara/aán tawa kat, “Aníng a heé Mungú.” 18Kuúng taa intsaahhatimís hara'ayár Musawo. Gawaá adoorihe gár Mungú i slai aga tsáhh, nee muruú tlákw nee oo hhó' tsaahharo u aleesleér. 19Kuúng ti kilók xú', adór tar geeraharusmoó taampu, nee gwa/atamaayér múk baraá giwtír i dirií', 20geeraharusmoó múk gár xuaaká, nee intsaahhatusmoó na/'aá ninakw, asma kuúng xu'uti sleémeero nee looeemaawo i koón baraá hara'ayár Musawo. 21Kuúnguudá' múk hatlá' intsaahhatimisuú wa slaá', ahaá kuúng mis ti kilók intsaahhatimisaká? Kuúnguudá' múk hatlá' intsaahhatimís gídaabá, “Gár hee ma fiisaar,” ahaá kuúng kilá' mas fisisiín ala? 22Kuúnguudá' káh gídaabá, “Ma fuquusaar,” ala kuúng kilá' baré a fuqús? Kuúnguudá' munga'aá hatlá' waaqaqaá', ahaá ala kuúng kilá' mas fisisiín baraá maray'ín wa ale. 23Kuúnguudá' ti kilók xirfayeemiís as hara'ayár Musa, ahaá ala kuúng kilá' hara'ayadá' mas eeharahatká? 24Asma Gooi i kat, “Umuú Mungú ku waaqaaqaa' nee múk xoordaá hatlá' as kuungá'.” 25Kuúng barnaxes hara'ayár Musa aga sa iialooés, daqaní al/utloorók i gídaabár koón. Ala kuúng barnaxes hara'ayár Musa aga sí', daqaní al/utloorók gár i bu' i káhh. 26Heé xoorór hatlá' oo taa al/utliiká, inós barnaxes hara'aya gaa eehaár, kwí ku harafaáriíke gídaabá a heé taa al/uútl, ala tam kwaa al/utliikahe. 27Gawaá adoorihe kuúng heé Yahudi tu sakwasleemuut nee múk xoordaá hatlá'. Asma kuúng hara'aya tam a koonda baraá gooiro, nee kuúng tam taa al/utli, ala kuúng hara'aya a eeharahatká. Ala inooín hara'aya ka iialooeemiis, inooín tam kaa al/utliniikahe. 28Asma hee barnaxes a heé Yahudi baraá muruú tlehhema'aá slaqwa kilós, inós a heé Yahudír kil'eeká. Slám al/utlo tidá' taa tleéhh gawaá slaqwa, a al/utlór kil'eeká. 29Ala heé Yahudi oo kilá', an kudá' Yahudi'iimarós baraá muuná i dirii'. Nee al/utlór kilá' a tidár muuná kuwa al/utli. Al/utloorí kan tleehh nee Qeeruú hhoohhoó', slám kaa tleehhiiká nee hara'aya. Heé adoorí xirfuuwós amór i dahhi a amór mukooká, ala a amór Mungú.

will be added

X\