RUMI 12

1Gawaá adoorihe hhaee'eé', aníng kuungá' nun harhheehhe'eés as gurtleemuú Mungú, kuungá' slaqoohúng na haniisaak iwa ilahhooár slaáf tleehhitiya', tidá' hhoohhoo' ar Mungú gu qwal/atimis. Gaarí an sluufimisuuhúng kudá' gídaabár koóm. 2Kuungá' baraá slafingwhunge ma hootara' ar adoodá' múk baraaká' yaamu ir hooti. Ala masók kuungá' tundun warqees baraá inslawayhunge, ar inslawayhúng kuwa /abeemiisi, as kawa tsahha' gídaabá Mungú gár i slai a milá. Asma gár i slai a tidá' hhoo', tidá' inós gu qwal/atimis, nee tidá' qoom. 3Mungú aníng ina aleesleemuú i haniís. Gawaá aleesleemuuwí án naa slawi, án umuúqo heewo dirhunge un ádbabáw gídaabá, “Kuúng miti kilók harafadiitaar tawa heé gídaabár koóm ta adoodá' kuúng ti dir'a. Ala kuúng masók fuquraangók unar inslasleér, umuúqo heewo masók ti kilós ga/áy ar harqoomoó haratlintaaoodá' taa haniís nee Mungú dír umuúqo heewo.” 4Atén slaqwa a koomaán, a wak, ala diqaywós ku yaariír. Ala umuúqo diqto i gadiyeérós ar dimbé koón. 5Gawaá adoorihe atén sleémeero a adór slaqwtá wák baraá Kristowo, nee umuúqo heewo baraarene a diqtá kudá' hatlá' sleémeero. 6Atén aleesleemuú Qeeru oo dimbadimbé u koomaán, ar harqoomoó tsuuqaadá' Mungú naa atén i haniís. Gawaá adoorihe heé aleesleemu gu koóm oo ya/abtór amór Mungú daahh kawa alki/iiti amór múk i alé, inós ngi alki/iiti ar harqoomayduú haratlintaaoorós. 7Hee aleesleemuú i kon bar oo muu alee/iimis, heewí muu ngu alee/iimisi. Heé aleesleemuú intsaahhatimis gu koóm, i intsaahhatimisi. 8Nee heé aleesleemuú gurbu'uungw gu koóm, muu ngu gurbu'un. Heé muruuwós hanmiís, ngu hanmiisi ar muunuú /awaák. Heé múk hatlá' sageesihhimiít, muu ngu sagesihhimiiti ar ilakaaharu. Heé gurtleemuú koóm, muu ngu gurtlatlay ar qwal/amaaye. 9Sla'aarirhúng masók i hhaahhafíngw koondaaká. Tidá' tlaakw aahhaak, nee tidá' hhoo' eeharaak. 10Kuungá' ti kiloohúng ló'wa sla'aaslae' ar sla'aarír hhae, nee ti kiloohúng tlaampa'aamise' tiwa ilaiwawa/a'. 11Gadiyeét na tleehhaak ar ilakaaharu, ala ar tli/itooká. Kuungá' baraá munerhunge masók a múk ilakaaharuú koóm, Aako na sagadiyuusaak. 12Kuungá' qwalala/é' baraá haraxu'utír wa aleeró, qiitlé' baraá slahha'amaayerhunge, kumiité' baraá firooro. 13Kuungá' sleeme múk hhohhó' oo Mungú kuduú liitlakuuse alee/iimisaak, nee muu na dahi'iimisaak umuúqo daqto. 14Mukdá' kuungá' nu gusiisiím, tsuuqumaak. Kuungá' tsuuqumé', ala ma lu'umisaara'. 15Qwalala/é' dinkwa nee mukdá' qwalalaá/. /Aa/amiimé' dinkwa nee mukdá' /aa/amiím. 16Kuungá' masók ti kiloohúng axweesani slasleerá'. Kuungá' uraay mu leelehhiitara', ala masók tin niinaweemisá'. Kuungá' miti kiloohúng harafadiitara' gídaabá tawa múk sagalooár koóm. 17Tlakweema mi kuqár bu'uumara'. Ala tidá' hho' na tleehhaak dír geerá muu sleémeerowo. 18Kuungá' umuúqo loohír ya/aam leelehhiitaak ar tawa hota' ar wayda nee muu sleémeero, ar adoodá' kuungá' kar aleesleera'. 19Sla'aaruuser'eé', li/aayd mu bu'uumara', ala bu'utuú li/aay dír Mungú i mawaak. Asma kaa gooín gídaabá, “Aako i kaahi, li/aay a daanduueé', aníng li/aay u buú'.” 20Ala Gooi i malé kat gídaabá, “Wakusmoowók bir qwariit, /aymiiseek. Nee bir waxiit, wahaaseek. Asma adoorí bar aga tléhh, kuúng daqaní gil'o aga gawaá sagós i dalá/.” 21Kuúng tlakweema muwa ar ba/iyé', ala kuúng tlakweema na ar ba/eek ar hhooeema.

will be added

X\